Փաստ ինֆո

«Գորշ գայլեր» կոչվող կազմակերպության, Թուրքիայի նպատակն է կուլ տալ Հայաստանը, այն մի շարք ահաբեկչություններ է իրականացրել։ «Փաստինֆո»-ի հաղորդմամբ՝ այսօր տեղի ունեցած մամուլի ասուլիսում այս մասին հայտարարել է ՀՀԿ ԳՄ անդամ, ՀՀ ԱԺ նախկին փոխխոսնակ Էդուարդ Շարմազանովը։

Նրա արձանագրմամբ՝ «Գորշ գայլերը» ազգայնական կուսակցություն է. դեռեւս 1960թ. նրանց հոգեւոր հայր Ասլան Թուրքեշը վերակազմավորել է «Ազգայնական շարժում» կուսակցությունը եւ այնտեղ երիտասարդական գաղափարական մի թեւ ստեղծել՝ Մուսոլինիի ֆաշիստների եւ Հիտլերի նացիոնալ-սոցիալիստների օրինակով, «շտուրմավիկների» ջոկատներ, որոնք պաշտոնապես կոչվում են գաղափարական ուժ, իսկ ոչ պաշտոնապես՝ «գորշ գայլեր»։

«Սրանց նպատակը պանթուրքիզմն է։ Դեռեւս 70-80-ական թվականներին, կազմակերպել է բազմաթիվ տեռորիստական ակտեր, օրինակ՝ ԱՍԱԼԱ-ի նկատմամբ, 1984թ. Փարիզում պայթեցվել է Ցեղասպանության զոհերի հուշարձանը, նրանք լուրջ դերակատարություն ունեն նաեւ Կիպրոսում։ 1981թ. գորշ գայլերը կազմակերպեցին Հռոմի պապի մահափորձը»,- հիշեցրել Շարմազանովը՝ ավելացնելով, որ «Գորշ գայլերը Արցախյան պատերազմում պայքարել են մեր դեմ։ Նրանց նպատակը թուրքական աշխարհի վերակերտումն է»։

Շարմազանովի փոխանցմամբ՝ 2015-ից «Գորշ գայլեր» կուսակցությունը դարձել է Ռեջեփ Թայիփ Էրդողանի դաշնակիցը։ «Դա պարզ երեւաց Թուրքիայում հեղաշրջման փորձի ժամանակ, երբ գեներալների մի մասը, որոնք «Գորշ գայլերի» ազդեցության տակ էին, դուրս չեկան փողոց, այսինքն՝ չընդվզեցին Էրդողանի դեմ եւ ցույց տվեցին, որ իրենք ունեն միասնական ծրագիր։ Էրդողանը նույնիսկ միտինգի ժամանակ հրապարակայնորեն ցույց տվեց «Գորշ գայլերի» նշանը։ Ավելին՝ մի քանի ամիս առաջ Թուրքիայի արտգործնախարար Չավուշօղլուն Ուրուգվայում՝ Մոնտեվիդեոյում, այդ նշանը ցույց տվեց մեր հայ համայնքի ներկայացուցիչներին»,- ասաց Էդ.Շարմազանովը՝ նկատելով, թե այսքանից հետո ինչպես կարելի է խոսել դրական ազդակների մասին, դրանից առավել էլ ինչ պետք է թուրքերն անեին։

«Գորշ գայլերի, Թուրքիայի պաշտոնական նպատակն է կուլ տալ Հայաստանը, որովհետեւ երբ չես խոսում Ցեղասպանությունից, Շուշիի հայկական լինելուց, մշակութային ցեղասպանությունից, թուրքական էքսպանսիայից, երբ հպարտանում ես, որ սեպտեմբերից Հայաստանից որեւէ զինվոր չի լինելու Արցախում, դա հենց Թուրքիայի նպատակն է եւ ինչու նա չպետք է սահմանը։ Բացի այդ՝ ինչ ասում է Թուրքիան, այստեղ անում են։ Այդ ինչպես եղավ, երբ 2020թ. Նիկոլ Փաշինյան անուն-ազգանունով ոմն մեկը հայտարարում էր, թե Թուրքիան գալիս է Կովկաս, որպեսզի տարածվի դեպի Արեւելք, եւ նրա միակ նպատակը հայերին ցեղասպանելն է, իսկ այսօր նույն Փաշինյանն ու իր նիկոլիստական կառավարությունը չի խոսում Ցեղասպանության մասին, մոռացել է մեր հինգ հազար զոհերին ։ Սրանք իշխանության շահն ու պետության շահը իրարից չեն տարբերում»,- հայտարարել է ՀՀ ԱԺ նախկին փոխնախագահը։

Մանրամասները՝ տեսանյութում։

Աղբյուր` Փաստինֆո