Փաստ ինֆո

Հայ ավանդական սփյուռքը քայքայելու քաղաքականությունը նոր չէ և փաշինյանական դիկտատուրայով չէ, որ սկսվել է։ Այս քաղաքականության սկիզբը դրվել է դեռևս ՀՀ առաջին նախագահ Տեր-Պետրոսյանի օրոք, երբ իշխանությունների հրահանգով ֆեյք- կուսակցություններ էին ստեղծվում՝ սփյուռքահայ գաղթօջախներում գործող ավանդական կուսակցությունների միջև պառակտում հրահրելու համար։

2018-ից իշխանության եկած ուժն ուղղակի շարունակում է նույն քաղաքականությունը։ Ընդ որում, այսօր իրավիճակը բոլորովին այլ է, քանի որ ավանդական սփյուռքն էլ առաջվանը չէ, բազմաշերտ է դարձել՝ ներառելով տարբեր տարիների ընթացքում և տարբեր դրդապատճառներով արտագաղթած հայաստանցիների մի ստվար հատվածի։ Բնականաբար, անցած տասնամյակներում սփյուռքյան գործընթացները՝ բնական և կենսական փոխազդեցություններից և փոխներթափանցումներից մինչև Սփյուռքը պառակտելուն ուղղված՝ հհշական և ներկա իշխանության հհշակերպ քաղաքականությունը՝ իրենցն արել են։ Ի հավելումն, զուգահեռաբար թուրքադրբեջանական լոբբիստական գործունեությունը՝ նույն ընթացքում։

Մի կողմից՝ ավանդական կուսակցություններին, մյուս կողմից՝ Հայ Առաքելական եկեղեցուն՝ տարբեր տոտալիտար աղանդների միջոցով հարվածող պառակտիչ քայլերով ջլատելով սփյուռքը, իսկ 2018-ի գունավոր հեղափոխությունից հետո՝ սորոսյան թրքահաճ ծրագրերով և Սփյուռքի նախարարության լուծարումով արդեն լուրջ հարված հասցվել է հայկական սփյուռքին։

Սփյուռքի նախարարության փոխարեն այսպես կոչված՝ սփյուռքի գործերի գլխավոր հանձնակատարի գրասենյակի ստեղծումը՝ «անունը կա, ամանում՝ չկա» տրամաբանությամբ՝ ավանդական սփյուռքն ի սկզբանե օտար մարմին համարեց։

Ինչ վերաբերվում է այն ներկայացնող անձին, ապա ըստ գրասենյակի լրահոսի՝ վերջինիս անունը հաճախ հիշատակվում է կոնկրետ կրոնական կազմակերպությունների ներկայացուցիչներին ընդունել-ճանապարհելու լուրերով։ Թերևս, մեկ էլ՝ վարչապետի տիկնոջը սփյուռքահայ կոնկրետ շրջանակների հետ հանդիպումների ուղեկցելիս։

Ի դեպ, նախօրեին Սինանյանի կողմից հերոսական քայլի ականատեսը եղանք՝ անդրադառնալով ՀՀ ԱԱԾ-ի առաջարկին, ըստ որի, փոփոխվելու է սփյուռքահայերի համար ՀՀ քաղաքացիություն ստանալու կարգը, Սփյուռքի գլխավոր հանձնակատարը հայտարարել էր, թե՝ իրենց գերատեսչությունը կողմ չէ առաջարկվող փոփոխությանը: Մալադեց, Սինանյան։

Դեմ չէ, բայց օրինակ, ստացվում է, որ Սփյուռքի գլխավոր հանձնակատարը դեմ է «Հայ դատ»-ն առաջ տանելուն, դեմ է մեր սահմանների անվտանգությանը, վերջապես՝ դեմ է Ցեղասպանության հարցի միջազգային ճանաչմանն ու արդար հատուցմանը։ Այլապես, ինչու՞ պիտի կատեգորիկ դեմ լիներ Ֆրանսիայի հայկական կազմակերպությունների համակարգող խորհրդի համանախագահ, ՀՅԴ Բյուրոյի անդամ Մուրադ Փափազյանի՝ Հայաստանի Հանրապետություն ազատ ելումուտին։ Փաստորեն, այս չինովնիկն ունի նախընտրելի և ոչ նախընտրելի սփյուռքահայե՞ր։

Վարչապետը սեպ է փորձում խրել Սփյուռքի և Հայաստանի ամուր կապերի միջև, չի հաջողելու, սա թող իմանա.Մուրադ Փափազյան

Հետաքրքիր է՝ ի՞նչով է առաջնորդվում իր նախընտրություններում սույնը։ Այս հարցին լույս է սփռում դեռևս տարեսկզբին «Փաստինֆո» լրատվականին Ֆրանսիայի հայկական ընկերության (CCAF) համակարգող խորհրդի նախագահ, ՀՅԴ Բյուրոյի անդամ Մուրադ Փափազյանի տված հարցազրույցը, որտեղ նա Սինանյանի հետ կապված՝ ասել է՝ «Տպավորություն է, թե նա նպատակ ունի խնդիրներ ստեղծել ֆրանսահայ համայնքի ներսում»: Պարզվում է՝ Սինանյանը ոչ միայն նախնական պայմանավորվածություններ է խախտել Ֆրանսիա կատարած իր այցի ընթացքում, այլև նորահայտ և անուժ ինչ-որ կազմակերպությունների միջոցով փորձել է ամեն կերպ խանգարել՝ ֆրանսահայ համայնքում արդեն ավանդական և մեծ հեղինակություն վայելող հայկական կազմակերպությունների գործունեությանը։ Մուրադ Փափազյանը զարմանում է՝ «Ինչո՞ւ դրանք ստեղծվեցին, երբ տարիներ շարունակ CCAF-ը լուրջ հաջողություններ էր արձանագրել՝ ի նպաստ Հայաստանի, Արցախի ու «Հայ Դատ»-ի: Ստացվում է, որ այս կազմակերպությունները կրեդիտ են ստանում պարոն Սինանյանից, ինչն այլ բանի մասին չի խոսում, քան այն, որ Սինանյանն այստեղ է գործուղվել՝ պառակտելու ֆրանսահայ համայնքը»։

Դեռ տարեսկզբի ՀՅԴ հայտնի գործիչն ուղղակի ասել էր՝ «ամեն պարագայում, պարոն Սինանյանը պետք է գիտենա, որ նրան չի հաջողվելու սեպ խրել հայկական ավանդական կազմակերպությունների դերի և արժեքի միջև, ինչին ակնհայտորեն ձգտում է այդ մարդը»։

Բնականաբար, ակնհայտ է, տեսանելի և հասկանալի, որ Սինանյանն իրականացնում է ներկա իշխանության և նրա լիդերի՝ ՀՀ վարչապետի աթոռն զբաղեցնողի քաղաքականությունը՝ ի վնաս Հայաստանի, Արցախի ու «Հայ Դատ»-ի, Ցեղասպանության հարցի միջազգային ճանաչման ու արդար հատուցման դեմ: Իսկ Հայաստանի Հանրապետություն Մուրադ Փափազյանի մուտքն արգելելու վարչապետի աշխատակազմի «պարզաբանող» տեքստը անվարժ մի փորձ է ներկա թրքասեր իշխանության կողմից՝ թուրքադրբեջանական ցանկությունների շարունակական բավարարումը՝ «ռագատկայի մանր քարերից» /եթե այդպիսիք եղել են/սարսահար «ժողովրդավարի» կերպարով փոխարինելու։

Աղբյուր` Փաստինֆո