Փաստ ինֆո

Ադրբեջանը պատրաստ էր խաղաղություն կնքել դեռեւս պատերազմի առաջին օրերին, որովհետեւ այն խնդիրը, որ դրված էր իրենց զինված ուժերի առջեւ, նրանք չկատարեցին։ Այսինքն՝ այն ճեղքումները, որ պետք է իրենք ապահովեին, չի եղել։ «Փաստինֆո»-ի հաղորդմամբ՝ այսօր տեղի ունեցած մամուլի ասուլիսին հայտարարել է ռազմական փորձագետ Հայկ Նահապետյանը՝ նշելով, որ հակառակորդը կարողացել է իրավիճակը շտկել, այսպես կոչված, «Լելե-Թեփի» հայտնի օպերացիայից հետո, երբ Արցախի եւ Հայաստանի ռազմաքաղաքական ղեկավարությունը սխալ որոշում կայացրեց, ինչի հետեւանքով մենք ծանր կորուստներ ունեցանք։

Փորձագետի արձանագրմամբ՝ առաջին անգամ ռազմական գործողությունները դադարեցնելու խոսակցությունը եղել է հոկտեմբերի 8-ին, որը մերժվել է Փաշինյանի կողմից։ Երկրորդ անգամ՝ մերժվել է հոկտեմբերի 19-ին ու այդ ժամանակ մենք դեռ չունեինք կորուստներ։

«Կգա ժամանակ եւ այն մարդիկ, որոնք ողջ են մնացել, կպատմեն, թե զորամասի հրամանատարները, ստորաբաժանման հրամանատարները, շարքային անձնակազմը ինչպիսի հերոսություններ են արել։ Հրամանատարներ կան, որոնք չեն ենթարկվել նահանջի հրամանին եւ տեղեր են եղել, որ հակառակորդը չի կարողացել ճեղքումներ անել եւ այդ մասը այսօր մնացել է հայկական»,- նշել է Հայկ Նահապետյանը։

Ըստ նրա՝ պատերազմի առաջին օրերը հողերը չեն հանձնել, որովհետեւ գիտեին, որ դա կլիներ իշխանափոխության ազդակ։ Իսկ հողերը հանձնելու գործողությունը ծրագրել էին տարիներ շարունակ։ «2,5 տարի իրենք աստիճանաբար եւ գիտակցաբար չեզոքացնում էին այն օղակները, որոնք պատերազմի ժամանակ կարող էին խոչընդոտել։ Առաջինը՝ դա Մանվել Գրիգորյանն էր։ Ինչու տարան նրան, որովհետեւ դեռեւս 2016-ին նա 1-2 օրում 5 հազար կամավոր հավաքագրեց, որը այդ պատերազմում կարող էր դառնալ 50-60 հազար մարդ։ Այդ մարդիկ՝ փորձառու, պատերազմով անցած, կամային որակներով բարձր, եթե գնային այնտեղ, ապա վստահ եղեք, որ ոչ մի նահանջ չէր լինի։ Զոհվում են, բայց նահանջ չի լինում, պարտություն չի լինում։ Հետևաբար` այս իշխանությունների համար թիվ մեկ թիրախը Մանվել Գրիգորյանն էր, երկրորդը՝ դա Ռոբերտ Քոչարյանն էր։ Այսինքն ՝քաղաքական առումով, եթե պատերազմ լինի, ապա Ռ.Քոչարյանն իր կապերով եւ հնարավորություններով պիտի չեզոքացված լինի»,- ասել է Նահապետյանը՝ նշելով, որ ԱԱԾ-ից հեռացվել են նաեւ գլխավոր վարչության պետեր, ԱԱԾ-ի պետեր։ Այսինքն՝ դրանք այն օղակներն են, որոնք պատերազմի ժամանակ ամենաէական դերակատարությունն ունեին։

«Պաշտոններից հեռացվեցին բազմաթիվ գեներալներ, ինչպես օրինակ, Խաչատուրովը, որոնք Արցախյան առաջին պատերազմի ժամանակ հաղթանակ էին կերտել։ Նրանցից ոչ մեկը չկար ռազմի դաշտում՝ այս պատերազմի ժամանակ, նույնիսկ խորհրդականի կարգավիճակով, էլ չեմ ասում բանակային կորպուսի հրամանատարական պաշտպանական շրջանի հրամանատար։ Չկար, որովհետեւ նրանք խոչընդոտ էին հանդիսանում, քանզի ունեին փորձառություն, կամային որակներ, մի պատերազմ հաղթել էին, թշնամուն հրաշալի գիտեին եւ դեռեւս հարց էր ինչպես կվերջանար պատերազմը»,- արձանագրել է Նահապետյանը՝ ավելացնելով, որ հենց այդ նպատակով 2,5 տարի «չիստկա» արեցին, բոլորին հանեցին։ Մի մասին պահեցին բանտերում, մի մասին էլ պաշտոններից հանեցին, բանակը վարկաբեկեցին։

Մանրամասները տեսանյութում

Աղբյուր` Փաստինֆո