Փաստ ինֆո

Ընդունելության այս տարվա քննությունները ցույց տվեցին կրթության աղետալի վիճակը: «Փաստինֆո»-ի հետ զրույցում ասել է կրթության ոլորտի փորձագետ Ատոմ Մխիթարյանը:

Նրա արձանագրմամբ՝ թեև դիմորդների թիվը նախորդ տարվա համեմատ այս տարի մի փոքր աճել է, բայց փոխարենը ընդունվողների թիվը նվազել է, քանի որ դիմորդների մեծ մասն անբավարար գնահատական է ստացել, հատկապես՝ մաթեմատիկայից և բնագիտական առարկաներից.

«Ընդունելության այս տարվա քննությունները շատ վատ արդյունքներ ցույց տվեցին, դիմորդների ավելի քան 20%-ն անբավարար գնահատական է ստացել, ինչը, հատկապես, ակնհայտ էր մաթեմատիկայի և բնագիտական առարկաների ոլորտում, ընդ որում, պետք է ասել, որ ոչ թե դպրոցն ավարտող աշակերտների 20%-ի մասին է խոսքը, այլ՝ լավագույն աշակերտների, որովհետև այն երեխաները, որոնց գիտելիքները պակաս են, չեն դիմում ԲՈՒՀ և քննություն չեն հանձնում, միայն լավագույններն են հանձնում բայց, փաստորեն, նրանց 5-ից 1-ը անբավարար է ստանում»,-ասաց փորձագետը:

Ատոմ Մխիթարյանը ցավով արձանագրում է, որ հայոց լեզվից անբավարար ստացողների թիվը նույնպես մեծ է եղել, ինչը պայմանավորում է երիտասարդների՝ հայոց լեզվի և գրականության նկատմամբ քիչ հետաքրքրվածությամբ.

«Մեր «որոշում կայացնողները» որոշեցին, որ շրջանավարտները ԲՈՒՀ կարող են ընդունվել ընտրելով՝ կա՛մ հայերենը կա՛մ անգլերենը, ստացվում է՝ շատ ուսանողներ վերջին տարում ընդհանրապես հայոց լեզու չպարապեցին, որովհետև մտադրություն չունեին հանձնելու հայոց լեզվի քննություն, փոխարենն անգլերեն հանձնեցին, սա բերում է նրան, որ հայերեն լեզվամտածողությունն արմատախիլ ենք անում, երեխաները չեն պարապում հայոց լեզու, գրականություն, փոխարենն անգլերեն են պարապում, որովհետև, ըստ իրենց, դա ավելի հեշտ է հանձնելը, արդյունքում ստացվում է այս պատկերը»,-ասաց զրուցակիցը՝ նկատելով՝հետագայում ԲՈՒՀ-երում ունենալու ենք ուսանողներ, որոնք կտրված են իրենց ազգային արմատներից, որոնք չգիտեն հայոց լեզու և գրականություն կամ էլ հետաքրքրված չեն դրանով:

Փորձագետն ընդգծում է, բացի այն, որ անբավարար գնահատական ստացողների թիվն ավելացել է, նախորդ տարվա համեմատ՝ միջին գնահատականները նույնպես անկում են ապրել, ինչը նշանակում է, որ ընդհանուր գիտելիքի մակարդակը շրջանավարտների մոտ ավելի վատն է, քան նախորդ տարի.

«Միտումն ակնհայտ է, գիտելիքի որակն ընկնում է»,-ասաց նա:

Ատոմ Մխիթարյանը ուշադրություն է հրավիրում նաև այն փաստի վրա, որ այս տարի բուհերում բազմաթիվ թափուր տեղեր են մնացել, ինչը, ըստ իրեն, պայմանավորված է վերջին տարվա ընդունելության կարգի փոփոխությամբ, երբ որոշվեց, որ դիմորդները կարող են դիմել ընդամենը մեկ ԲՈՒՀ և մեկ մասնագիտությամբ.

«Սա բերեց նրան, որ գիտելիք ունեցող երիտասարդները դիմեցին ավելի բարձր վարկանիշ ունեցող մասնագիտությունների համար, իսկ բազմաթիվ այլ մասնագիտություններում պետպատվերով հատկացված բազմաթիվ տեղեր թափուր մնացին, որովհետև երկրորդ հայտով հնարավոր չէր դիմել և հետևանքը եղավ այսպիսին»,-ասաց Ատոմ Մխիթարյանը:

Փորձագետն ահազանգում է, ոլորտում առկա այս խնդիրները հանգեցնելու են նրան, որ ապագայում ունենալու ենք վատ մասնագետներ.

«ԲՈՒՀ-երին անհրաժեշտ են համապատասխան թվով ուսանողներ, որպեսզի ամբիոնը կամ ֆակուլտետը գործի, սա նշանակում է, որ ովքեր ընդունվում են ԲՈՒՀ, նրանք, ամենայն հավանականությամբ, ավարտելու են, բայց քանի որ ընդունվել են նվազագույն գնահատականներով և ԲՈՒՀ-ն էլ մտադիր չէ նրանց ուսման վատ որակի պատճառով դուրս թողնելու պետական ուսումնական հաստատությունից, մենք ունենալու ենք վատ մասնագետներ, երկրորդ հանգամանքը՝ պետությունն անհասկանալի ձևով բաշխում է պետպատվերի տեղերը, բայց ավարտելուց հետո պատասխանատվություն չի կրում որևէ ուսանողի համար»,-ասաց Ատոմ Մխիթարյանը:

Աղբյուր` Փաստինֆո