Փաստ ինֆո

Խորհրդային դպրոցը դաստիարակում էր երկրի քաղաքացի։ Կրթական համակարգի անկման պատճառով, կրթությունը վերածվել է կրթական համակարգի ոչնչացման փուլի։ Այս մասին «Փաստինֆո»-ի եթերում ասել է ԵՊՀ դասախոս, գրականագետ Սերժ Սրապիոնյանը։

«Հայ երեխան արդեն չի գնում բարձրագույն կրթություն ստանալու, որովհետեւ տեսնում է թե ինչպես մի կիսագրագետ, անլվա, օրերով հագուստ չփոխող մեկը կարող է դառնալ նախարար եւ, օրինակ, հայտարարել, որ կարեւորը ոչ թե սխալ ղեկավարելն է, այլ կարեւորը ղեկավարելն է»,-նշեց գրականագետը։ 

Մտավորականի կարծիքով՝ վերջին մարտնչող սերունդը խորհրդային դպրոցն ավարտած սերունդն էր։ Թեև գրականագետն ամենևին էլ հիացած չէ  Խորհրդային դպրոցով, որովհետեւ գաղափարախեղդ էին արել, բայց կարծում է, որ այդ դպրոցը դաստիարակում էր երկրի քաղաքացի, ժողովրդի քաղաքացի։ 

«Երբ ընկանք Բոլոնիաների գիրկը, երբ ընկանք, այսպես կոչված, վիճակագրության գիրկը, թե Սորբոնի համալսարանն այսքան միավոր ունի, այսինչ տեղն է գրավում, իսկ մեր համալսարանը հեգնում էինք, թե ընդամենը 100 տարվա համալսարան է, թե Սորբոնի համալսարանի նման ուսանողներ չի տվել։ Եթե այդ ուսանողների թվի տոկոսային հարաբերությունը հաշվենք, թե քանի գիտնական Սորբոնն է տվել, քանի գիտնական՝ մեր համալսարանը,  կերեւա տարբերությունը մեր եւ Սորբոնի համալսարանի»,-ասաց Սրապիոնյանն՝ ավելացնելով, որ եվրոպական կեղծ վիճակագրությունը երբեք ճշմարտությունը չի արտացոլում։

Գրականագետը նկատեց, որ Սորբոնի համալսարանի բյուջեն մեր հանրապետության բյուջեի 20-ապատիկ անգամ ավելին է, այսինքն՝ մեր բյուջեն Սորբոնի համալսարանի մեկ բաժնի բյուջեից էլ պակաս է։

«Մենք կրթական համակարգ ստեղծողից վերածվել ենք՝ ընդօրինակողի և խոր անկման պատճառով, այս պահին կրթական համակարգի ոչնչացման փուլում ենք»,-կարծում է Սերժ Սրապիոնյանը։   

նա համոզված է, որ պարարտ հիմքերը դրվեցին, որ մարդիկ մտածեն միայն ստամոքսի մասին։ Տեղին էր մեջբերել Ամենայն հայոց բանաստեղծի խոսքերը, որն ասել էր դեռևս 1904 թ.-ն, որ գալու է հոգու սով։ Մենք անգամ այդ բանստեղծին չլսեցինք։ 

«Մտավորականությունն էլ շատ պասիվ գտնվեց։ Հասարակության այն գիտակից մասը, որը գենետիկորեն կրում է իր նախապապերի արյունն ու միտքը, այդ հասարակությունն ուզում է արժանապատիվ կյանք, արժանապատիվ պետություն, ազգերի մեծ ընտանիքում իր հավասար տեղը»,-եզրափակեց գրականագետը։

Աղբյուր` Փաստինֆո