Փաստ ինֆո

Իրանը հստակ ուղերձ տվեց, որ թույլ չի տա «Զանգեզուրի» միջանցքի ծրագրի իրականացումը: Թուրքիան ուզի-չուզի պետք է հաշվի նստի իրանական կողմի հայտարարության հետ, Իրանի հայտարարությունը շատ հստակ էր, լղոզված չէր, Թուրքիան հաշվի կառնի այն: «Փաստինֆո»-ի հետ զրույցում նման տեսակետ է հայտնել թուրքագետ Ռուբեն Սաֆրաստյանը՝ անդրադառնալով Իրանի գերագույն հոգևոր առաջնորդ Ալի Խամենեի՝ Թուրքիայի նախագահի հետ հանդիպման ժամանակ հնչեցրած հայտարարությանը, որ եթե Հայաստանի հետ Իրանի սահմանները կտրելու քաղաքականություն լինի, ապա Իրանը կկանխի դա, քանի որ այդ սահմանը տարանցիկ ուղի է արդեն մի քանի հազարամյակ:

Փորձագետը ուշադրություն է հրավիրում հատկապես Խամենեի այն հայտարարության վրա, որ հայ-իրանական սահմանը հազար տարի եղել է տարանցիկ ճանապարհ.

«Այսինքն՝ Իրանը դա ընկալում է ոչ միայն այսօրվա Իրանի տեսակետից, այլ դեռևս Պարսկական կասրության տեսակետից, Իրանը թույլ չի տա, որ Թուրքիան, քաղաքական հաշվարկներից ելնելով, խոչընդոտի մի երևույթի, որը հազարամյա պատմություն ունի։ Հայ-իրանական սահմանը ոչ միայն Հայաստան-Իրան է, այլ նաև հնարավորություն է Իրանի համար դեպի Սև ծով դուրս գալու»,-ասաց նա:

Հարցին՝ իսկ թուրքական կողմն ի՞նչպես կարձագանքի Իրանի այս հայտարարությունը, արդյո՞ք այն կազդի իրանա-թուրքական հարաբերությունների վրա՝ փորձագետը նշել է, որ Թուրքիան հաշվի կառնի Իրանի հայտարարությունը, սակայն հավանական չի համարում, որ երկու երկրների հարաբերությունները կլարվեն.

«Թուրքիայի և Իրանի հարաբերությունները ժամանակակից միջազգային հարաբերությունների շատ հետաքրքիր էջ են, նրանք ունեն շատ հակասություններ, բայց կարողանում են միշտ բալանս գտնել և խուսափում են ռազմական սրացումներից»,-ասաց Սաֆրաստյանը:

Նշենք, որ Թեհրանում կայացած հանդիպումների ժամանակ Թուրքիայի և Ռուսաստանի նախագահներն առանձին քննարկել են նաև ԼՂ հարցը:

Ռուբեն Սաֆրաստյանի արձանագրմամբ՝ թեև Հայաստանը փորձում է հարցը պահել ԵԱՀԿ Մինսկի խմբի շրջանակներում, բայց Ռուսաստանն այժմ գերադասում է այն քննարկել Թուրքիայի և Իրանի հետ՝ որպես տարածաշրջանային երկրներ.

«Ֆրանսիան և ԱՄՆ-ն հայտարարեցին, որ պատրաստ են շարունակել Արցախի շուրջ քննարկումները ԵԱՀԿ Մինսկի խմբի ֆորմատով, իսկ Ռուսաստանը հայտարարեց, որ դադարեցնում է շփումները Մինսկի խմբի շրջանակներում, Ռուսաստանը նախապատվությունը տալիս ՝ Թուրքիային և Իրանին, գերադասում է Արցախի հարցը քննարկել նրանց հետ: Հայաստանն էլ փորձում է հարցը պահել Մինսկի խմբի շրջանակներում և հարցը քննարկել ԱՄՆ-ի և Ֆրանսիայի հետ, սակայն Ռուսաստանը հրաժարվում է, բայց, կարծում եմ, այս ամենը ժամանակավոր է, երբ Արևմուտքի և Ռուսաստանի հարաբերությունները կարգավորեն, Մինսկի խմբի ձևաչափը կվերակենդանանա»,-ասաց Սաֆրաստյանը

Աղբյուր` Փաստինֆո