Փաստ ինֆո

Վանաձորի համայնքի ղեկավարի ընտրության համար ավագանու նիստ հրավիրելու արգելքի պահպանելը դատարանի կողմից լավագույնս է ի ցույց դնում դատական համակարգի՝ ինքնությունը չպարզված դիակ լինելը, որը հայտնվել է սրբություն չունեցող անձանց մոտ ու անարգվում է բոլոր հնարավոր ու անհնար ձեւերով։

ՏԻՄ ընտրությունների արդյունքները հաստատվել են դատարանի կողմից, ձեւավորվել է քաղաքային իշխանություն, բայց ԼՀԿ-ի ակտիվ դերակատարմամբ դատարանը որոշել է արգելել համայնքի ղեկավար ընտրելու համար ավագանու նիստ հրավիրելը։

Նշված արգելանքը դեռևս կշարունակվի գործել, դատարանն անորոշ ժամանակով հետաձգել է հարցի քննարկումը:

Ավելի վաղ հայտնել էինք, որ Վարչական դատարանը հուլիսի 20-ին Վանաձորի ավագանու նիստ գումարելու արգելքի վերաբերյալ որոշում պետք է կայացներ:

«Փաստինֆո»-ի հետ զրույցում Վանաձորի ավագանու «Հայրենիք» խմբակցության անդամ Վահե Դոխոյանը հայտնեց, որ երեկվա նիստն անորոշ ժամանակով հետաձգվել է այն պատճառաբանմամբ, որ նիստի մասին կողմերը պատշաճ չեն ծանուցվել.

«Փորձում են ամեն կերպ ավագանու նիստ հրավիրելու արգելանքը ուժի մեջ պահել, եթե ուզենային , կողմերին պատշաճ կծանուցեին, նույն հաջողությամբ, երբ դեկտեմբերին առաջին նիստը պետք է կայանար, բոլորին կարողացել էին պատշաճ ծանուցել՝ ընդհուպ կուսակցություններ, գրասենյակներ, տներ, եթե իրենց պետք լինի, սրճարանում նստած լինես, կգան ու կծանուցեն, ուղղակի սա պատճառաբանություն էր, թե ծանուցող հիմնարկը չի կարողացել ծանուցի նիստի մասին և նիստը հետաձգվել է, բոլորիս համար պարզ է դառնում, որ այլ որոշում չուներ կայացնելու, քան հանել արգելանքը, հակառակ դեպքում նիստ կանեին ու արգելանքը կթողեին, դրա համար արհեստական ձևով հետաձգում են»,-ասաց Դոխոյանը:

Նա նաև հայտնեց, որ Վճռաբեկ դատարան ևս դիմել են, որպեսզի արգելանքը հանվի, սակայն Վճռաբեկ դատարանը պարզաբանել է, թե ձևավորման փուլում է և դատական նիստի օր չի կարողանում նշանակել:

Նկատենք, որ ԼՀԿ-ն ոչ միայն խորհրդարան չկարողացավ մուտք գործել, այլ անգամ Վանաձորի բնակիչները նրան վստահության քվե չտվեցին. դեկտեմբերի 5-ի ՏԻՄ ընտրությունների արդյունքներով Վանաձորում ստացել է ընտրողների ձայների ընդամենը 3,97 տոկոսը և զբաղեցրել 6-րդ տեղը, աջակցելով ՔՊ-ին, դիմել էր Վարչական դատարան, որպեսզի անվավեր ճանաչվեն Վանաձորի համայնքապետի ընտրությունները, սակայն դատարանը մերժեց ԼՀԿ-ի հայցը։ ԼՀԿ-ն նաև առանձին միջնորդություն էր ներկայացրել Վարչական դատարան՝ պահանջելով պարտավորեցնել Վանաձոր համայնքի ավագանուն ձեռնպահ մնալ Վանաձոր միավորված համայնքի ղեկավար ընտրելուն ուղղված գործողություններից, այն է՝ համայնքի ղեկավար ընտրելու օրակարգով նիստ անցկացնելուց և ղեկավար ընտրելուց, ինչը բավարարվել էր։

Ինչպես վերեւում նշել ենք՝ դատարանն անփոփոխ է թողել Վանաձորի ՏԻՄ ընտրության արդյունքներն ամրագրող որոշումը, սակայն ավագանին նիստ չի կարողանում անել:

Իշխող ՔՊ խմբակցությունը, իբրև խնդրի լուծում, արտահերթ նիստով փոփոխություններ կատարեց ՏԻՄ մասին օրենքով, որով վարչապետին համայնքապետի ԺՊ նշանակելու լիազորություն տրվեց, ինչից հետո Նիկոլ Փաշինյանի որոշմամբ՝Արկադի Փելեշյանը նշանակվեց Վանաձորի համայնքապետի պաշտոնակատար: Ակնհայտ է, որ ՔՊ-ն ամեն ինչ անում է Վանաձորի ընտրողների քվեն փոշիացնելու ու նոր ընտրություն նշանակելու համար։

Աղբյուր` Փաստինֆո