Փաստ ինֆո

Տարբեր երկրներ քննարկում են Հայաստանի ճակատագիրը, բայց յուրաքանչյուրն իր օգուտի մասին է մտածում, սա նորմալ է, պետք չէ հույս դնել, որ Իրանը, Ռուսաստանը պետք է մեր մասին մտածեն, իրենք իրենց շահերով են առաջնորդվում  և Հայաստանը դիտարկում են իրենց շահերի տեսանկյունից, իսկ թե որքանով սա կհամընկնի մեր շահերի հետ, սա արդեն հարցի մյուս կողմն է: «Փաստինֆո»-ի հետ զրույցում ասել է անվտանգության հարցերով փորձագետ Արմեն Մանվելյանը՝ անդրադառնալով նախօրեին Թեհրանում կայացած Ռուսաստանի, Իրանի և Թուրքիայի առաջնորդների հանդիպմանը, որի ընթացքում քննարկվել  են նաև Հայաստանի և Արցախի հետ կապված մի շարք հարցեր:

Արմեն Մանվելյանն ընդգծում է՝ Ռուսաստանի և Իրանի հետ Հայաստանն ընդհանուր շահեր ունի, բայց այս երկրներն առաջին հերթին իրենց շահերով են առաջնորդվում, հատկապես, երբ տեսնում են, որ Հայաստանում իշխանության են ոչ ադեկվատ անձիք, որոնք իրենց քաղաքական ապագան կապում են Անկարայի և Բաքվի հետ պայմանավորվածություններով.

«Նրանք հասկանում են, որ մաքսիմում պետք է նրանցից օգուտ քաղել, իսկ հետո ինչ կլինի-կլինի »,-ասաց Մանվելյանը:

Ուշագրավ էր, հատկապես,  Իրանի գերագույն ղեկավար՝ հոգևոր առաջնորդ  Ալի Խամենեի հայտարարությունը՝ Թուրքիայի նախագահի հետ հանդիպման ժամանակ, որ եթե Հայաստանի հետ Իրանի սահմանները կտրելու քաղաքականություն լինի, Իրանը կկանխի դա, քանի որ այդ սահմանը տարանցիկ ուղի է արդեն մի քանի հազարամյակ:

Արմեն Մանվելյանը կարծում է , որ Իրանի հոգևոր առաջնորդի այս հայտարարությունը երկու կողմից պետք է դիտարկել:

Ըստ նրա՝  Իրանը նախ ցույց է տալիս այն կարմիր գծերը,որոնք հստակ ունի՝ հատկապես, ադրբեջանա-թուրքական տանդեմի ագրեսիվ քաղաքականության հետ կապված, որոնք ուզում են Հայաստանից տարածքներ վերցնել և միջանցքներ ստեղծել՝ կտրելով Հայաստանի հարավը մնացած հատվածից: Հոգեւոր առաջնորդի հայտարարությունը հստակ  մեսիջ էր նաև առ այն, որ Հայաստանը, որպես քաղաքական սուբյեկտ, այլևս գոյություն չունի և նրա ճակատագիրը  որոշում են այլ երկրների ղեկավարները, իսկ Հայաստանն այս քննարկումներին չի մասնակցում.

«Նման բան 5-6 տարի առաջ պատկերացնել անհնար էր, իսկ այսօր մենք ուրախանում ենք, որ հարևան երկրի ղեկավարը մի հայտարարություն է անում, որը մեր շահերի հետ համընկնում է»,-նկատում է զրուցակիցը:

Մեր դիտարկմանը՝ արդյո՞ք Իրանը նաև հստակ մեսիջ չտվեց Թուրքիային և Ադրբեջանին, որ թույլ չի տալու «Զանգեզուրի» միջանցքի ծրագրի իրականացումը, որքան էլ դրա մասին փափագեն, Արմեն Մանվելյանը նշեց, որ դա կախված է նրանից թե, այն ինչ կարգավիճակ է ունենալու:

Ըստ Մանվելյանի՝ եթե միջանցքի կարգավիճակ ունենա, շատ խնդիրներ կառաջանա, իսկ եթե ճանապարհի կարգավիճակ ունենա, այդ դեպքում վերաբերմունքը շատ ավելի մեղմ կլինի

«Չնայած՝ Թուրքիան և Ադրբեջանը միջանցքի գաղափարն են առաջ տանում, եթե միջանցքի մասին է խոսքը գնում, ապա միջանցքը պետք է վերահսկվի երրորդ ուժի կողմից, սա կնշանակի, որ Հայաստանը կտրվում է հարավից, այս միջանցքի և Լաչինի միջանցքի միջև հավասարության  նշան է դրվում, իսկ Իրանի համար միջանցքի գաղափարն անընդունելի է, ինչի մասին վկայում էր Իրանի հոգևոր առաջնորդի հայտարարությունը, իսկ եթե ճանապարհի մասին է խոսքը, որը հայ սահմանապահների հսկողության տակ լինի, սա հնարավոր է ընդունելի տարբերակ լինի Իրանի համար»,-ասաց Մանվելյանը:

Խամենեին՝ Էրդողանին. Իրանը դեմ կլինի Հայաստանի հետ Իրանի սահմանը փակելու քաղաքականությանը

Աղբյուր` Փաստինֆո