Փաստ ինֆո

Մենք պետք է օգուտ քաղենք նոյեմբերի 9-ի եռակողմ համաձայնագրի մեջ առկա բոլոր այն կետերից, որոնցից կարող ենք։ Հայաստանի իշխանություններին և ընդդիմությանը կոչ ենք անում համատեղել ջանքերը՝ Արցախի անվտանգությանը վերաբերող հարցերում։ Պետք է հասկանալ այն փաստը, որ Արցախը Հայաստանի անվտանգության երաշխավորն է, Հայաստանը՝ Արցախի։ Իսկ ինչ վերաբերում է ՀՀ ԱԽՔ Արմեն Գրիգորյանի հայտարարությանը՝ կապված մինչև սեպտեմբեր Արցախից ՀՀ ԶՈՒ ստորաբաժանումների մնացյալ մասի դուրսբերման հետ, չէի ցանկանա մեկնաբանել։ Այդ մասին «Փաստինֆո»-ի հետ զրույցում ասաց Արցախի ԱԺ «Միասնական հայրենիք» խմբակցության պատգամավոր, ԱԺ պաշտպանության, անվտանգության և օրինապահպանության հարցերի մշտական հանձնաժողովի նախագահ Սեյրան Հայրապետյանը։

«Իհարկե, ամեն ինչ մեր սրտով չէ, բայց հիմա հուսահատվելն ու ոչինչ չանելը հավասարազոր է դավաճանության։ Հասկանում եմ, որ վերջին պատերազմի արդյունքների պատճառով ՀՀ իշխանությունները կաշկանդվում են՝ նոր պատերազմի հրահրման համար նախադրյալներ չստեղծելու համար, բայց զիջողական, պարտվողական դիրք բռնելն անընդունելի է։ Արցախի բոլոր քաղաքական ուժերը, ՀԿ-ներն իրենց հստակ դիրքորոշումը բազմիցս հայտնել են՝ շեշտելով, որ Արցախը երբևէ չի կարող լինել Ադրբեջանի կազմում և ստեղծված բարդ իրավիճակից ելքեր գտնելու ուղղությամբ հենց հիմա էլ աշխատում ենք»-ասաց Հայրապետյանը։

Մեր զրուցակցի համոզմամբ՝ անվտանգային հարցերի մասին ու համակարգում արվող ու սպասվող քայլերի մասին ցանկալի է քիչ խոսել, փոխարենը՝ շատ աշխատել։ Նրա դիտարկմամբ՝ ՀՀ ԱԽՔ Արմեն Գրիգորյանի շեշտած այն միտքը, որ Արցախի ՊԲ-ն կար ու կլինի, կարևոր արձանագրում էր և հետևություններ պետք է անել դրանից։ Հայրապետյանը նաև այն կարծիքին է, որ ամեն մի հայտարարության պետք չէ մեծ հնչեղություն տալ։

«ՀՀ Անվտանգության խորհրդի քարտուղարի ասածները չեմ ուզում մեկնաբանել, բայց կարող եմ ասել, որ «Միասնական հայրենիք» կուսակցությունը Արցախի մյուս կուսակցություններին, Կառավարության մարմիներին ներկայացրել է ստեղծված իրավիճակից դուրս գալու ճանապարհային քարտեզը։ Հիմա սպասում ենք մեր գործընկերների արձագանքին, որ կարողանանք ընտրել լավագույն տարբերակը։ Ստեղծված վիճակում մեկը մյուսին քննադատելու, ավելորդ խոսելու ժամանակ չկա, պետք է աշխատել »,-ասաց պատգամավորը։

Սեյրան Հայրապետյանն արձանագրում է՝ երկար տարիներ իր ուժերը մոբիլիզացրած, աշխարհաքաղաքական իրավիճակից օգտված Ադրբեջանը նաև մեր թույլ տված սխալներից է օգտվել։ Հիմա գոնե մենք էլ պետք է դաս քաղենք մեր սխալներից և օգտագործենք ցանկացած հնարավորություն։

«Ադրբեջանը չի կատարել եռակողմ համաձայնագրի մեջ ամրագրված այն դրույթը, որ գերիները պետք է վերադարձվեն։ Ներկա դրությամբ շուրջ 200 գերի ու անհայտ կորածներ ունենք այնտեղ, ի դեպ, նրանց մեջ կան նաև նոյեմբերի 9-ից հետո գերեվարված անձինք։ Ադրբեջանը կոպտորեն խախտելով համաձայնագիրը՝ նոյեմբերի 9-ից հետո բռնազավթել է նաև Հադրութի մնացյալ երկու գյուղերն ու գերի վերցրել մարդկանց։ Չմոռանանք, որ դրանից հետո ադրբեջանցիները ներխուժել են նաև Փառուխ։ Քանի դեռ նրանք չեն վերադարձրել առնվազն մեր գերիներին, մենք էլ պետք է չշտապենք մեր բոլոր պարտավորությունները կետ առ կետ կատարել»,-ասում է Հայրապետյանը։
Ըստ պատգամավորի՝ Արցախի անվտանգային համակարգի ամրացման առումով կարևոր է նաև եռակողմ համաձայնագրի մեջ արված այն արձանագրումը, որ խաղաղապահ զորախումբը տեղակայվում է ղարաբաղա-ադրբեջանական շփման գծում։
«Դրանով շեշտվում է, որ Արցախը՝ որպես առանձին միավոր, թեկուզ փոքր տարածքի վրա, բայց գոյություն ունի։ Մեր հետագա անելիքները պետք է կառուցենք նաեւ այդ կարևոր փաստի վրա հենվելով»,- եզրափակեց Հայրապետյանը։

Աղբյուր` Փաստինֆո