Փաստ ինֆո

ՔՊ-ն ընդամենը շանտաժ է անում ընդդիմությանը, թե կզրկի մանդատներից, քանի որ իրենց իրականում իրենց պառլամենտում պետք է ընդդիմությունը, իրենք ամեն ինչ պետք է անեն, որ այս կամ այն կերպ ընդդիմություն լինի խորհրդարանում: «Փաստինֆո»-ի հետ զրույցում նման կարծիք է հայտնել քաղտեխնոլոգ Կարեն Քոչարյանը:

Ինչպես ավելի վաղ հայտնել էինք, ՔՊ-ն հայտարարել էր, թե մտադիր է ընդդիմադիր պատգամավորների մեծ մասին մանդատից զրկելու հարցով դիմել ՍԴ, այս օրակարգով անգամ ԱԺ արտահերթ նիստ արեցին, սակայն իշխող ֆրակցիան «փոշմանեց» ու հայտարարեցին, որ որոշել են առայժմ չդիմել Սահմանադրական դատարան: ՔՊ-ականները, սակայն, չեն բացառում, որ այս հարցը կրկին օրակարգ կբերեն սեպտեմբերին:
Մեզ հետ զրույցում քաղտեխնոլոգ Կարեն Քոչարյանը պնդեց, որ ՔՊ-ն սրանով ընդամենը շանտաժ է անում ընդդիմությանը, որպեսզի վերջիններս վերադառնան խորհրդարան, քանի որ ՔՊ-ն ցանկանում է իր հետագա որոշումների պատասխանատվությունը կիսել ընդդիմության հետ.

«Այն ինչ պետք է ստորագրի Նիկոլ Փաշինյանը, իրենք ուզում են դա գցել նաև ընդդիմադիրների գրպանը, ընդ որում, կապ չունի ո՞ր ընդդիմադիրների, իրենք անգամ կարող է նոր արտահերթ ընտրությունների գնալ, որպեսզի ուրիշ ընդդիմություն ունենան և ինչ-որ մեկի հետ պատասխանատվություն կիսեն»,-ասաց նա:
ԱԺ փոխնախագահ Ռուբեն Ռուբինյանը հիմնավորել էր, թե իրենց այս որոշման հիմքում « հարգանքն է առ ժողովրդի տված քվեն»:

Կարեն Քոչարյանը, սակայն, կարծում է, որ ժողովրդի քվեն որևէ նշանակություն չունի.

«Իսկ երբ մտածում էին ՍԴ դիմելու մասին, այդ ժամանակ չէի՞ն հարգում ժողովրդի քվեն, թե՞ չգիտեին՝ դա ինչ բան է, նոր իմացա՞ն, նոր պատմեցի՞ն դրա մասին, դա բլեֆ է ընդամենը»,-ասաց նա:

Քաղտեխնոլոգը կարծում է, որ ՔՊ-ին ընդդիմադիրներին մանդատից զրկելու որոշում կայացնելու մեջ կաշկանդել է նաև միջազգային հանրության արձագանքը, ըստ նրա՝ միջազգային հանրությանը դուր չէր գա, որ այսպես կոչված «դեմոկրատիայի ռահվիրաները» պառլամենտում ունենան ընդամենը մեկ իշխանական ֆրակցիա, քանի որ կստացվեր, որ Հայաստանը միակ երկիրն է աշխարհում, որի խորհրդարանը միակուսակցական է:

Կարեն Քոչարյանը նշեց, որ ՔՊ-ն սեպտեմբերին նույնպես զերծ կմնա ընդդիմադիրներին մանդատներից զրկելուց.
«Չի կարող այդպիսի բան լինել, կա՛մ չեն զրկում մանդատներից, կա՛մ եթե զրկում են, նախօրոք խոսում են հաջորդ համարների հետ, որպեսզի մանդատները չդնեն ու խորհրդարանում ընդդիմություն լինի, կամ արտահերթ ընտրությունների են գնում, այլ տարբերակ չի կարող լինել, չի կարող խորհրդարանը միակուսակցական լինել»,-ասաց նա:

Աղբյուր` Փաստինֆո