Փաստ ինֆո

Արմեն Գրիգորյանի մահը քաղաքական սպանություն էր. Ոչ միայն քաղաքական շինծու գործ էր, քաղաքական կալանավորում, քաղաքական դատավարություն, այլև՝ քաղաքական սպանություն: Սպանության ձևերը տարբեր են, անպայման չէ հենց այդ պահին գնդակահարել և մարդ վերացնել, մարդկանց դեմ քաղաքական ռեժիմները կիրառում են շատ տարբեր պրակտիկաներ: Այս մասին լրագրողների հետ զրույցում ասաց ՀՀԿ փոխնախագահ Արմեն Աշոտյանը:

«Վաղուց ենք ընտելացել, որ, այսպես կոչված, եվրոպական, ժողովրդավարական համույթը, ԵԽ տարածքը, որն իբրև մարդու իրավունքների նկատմամբ ուներ պաշտանմունքային վերաբերմունք, ցույց է տալիս իր երկդիմի վերաբերմունքը Հայաստանում տեղի ունեցող գործընթացների նկատմամբ: Ես, ավաղ, որևէ ակնկալիք չունեմ, որ Արմենի մահը կարող է դառնալ այն վերջին ապտակն այդ կառույցներին, որոնք ստիպված կլինեն ուշքի գալու և հայտարարված արժեքներին համահունչ առնվազն ձև տան, որ քաղաքականություն են իրականացնում:

Նման սպանությունները ոչ ոք չի մարսում, այդ սպանությունների մեղավորներն անպայման պատժվում են՝ կամ մարդկանց կողմից, կամ օրենքով, կամ Աստծո կողմից»,- նշեց Աշոտյանը՝ հավելելով, որ Արմեն Գրիգորյանի նման ինտելեկտուալի կորուստը մեծ կորուստ էր հասարակության , հայրենիքի համար: Աշոտյանը նշեց՝ ապրում ենք մի սարսափելի ժամանակահատվածում, որ մահն էլ է դառնում ռեալիթի շոու, տեսանք Արմեն Գրիգորյանի մահը՝ ուղիղ եթերում, այսպիսին է դարձել մեր այսօրվա կյանքը:

Աղբյուր` Փաստինֆո