Փաստ ինֆո

Արմեն Գրիգորյանի նկատմամբ քաղաքական հետապնդում էր իրականացվում՝ իր հայացքների համար։ Այս մասին «Փաստինֆո»-ի հետ զրույցում ասաց իրավապաշտպան Լարիսա Ալավերդյանը։

Ինչպես արդեն տեղեկացրել ենք՝ պրոդյուսեր Արմեն Գրիգորյանը հանկարծամահ է եղել՝ հենց դատական նիստերի դահլիճում՝ իր գործով նախնական դատական լսումների ընթացքում։ Գրիգորյանը կալանքի տակ էր գտնվում մայիսի 17-ից՝ մի արարքի համար, որը ՀՀ քրեական օրենսգրքով հանցագործություն չէր համարվում։ Մասնավորապես, Գրիգորյանին մեղադրանք էր առաջադրվել ՀՀ քրեական օրենսգրքի 226-րդ հոդվածի 2-րդ մասով՝ հրապարակայնորեն ազգային արժանապատվությունը նվաստացնելու համար, իսկ որպես հիմք ներկայացվել է մամուլի ասուլիսի ժամանակ Ա. Գրիգորյանի հայտնած կարծիքը ՀՀ բնակավայրերից մեկի բնակիչների վարքագծի մասին, մինչդեռ, ՀՀ Քրեական արդեն նախկին օրենսգրքի 226-րդ հոդվածում արգելվում է միայն «ազգային արժանապատվությունը նվաստացնելուն ուղղված գործողությունները, ուստի ներազգային սոցիալական խմբերի միջև արժանապատվությունը նվաստացնելուն ուղղված գործողությունն արգելված չէ։ Այս հանգամանքը բարձրացվել էր իրավագիտության դոկտոր Արթուր Ղամբարյանի, ինչպես նաև՝ նախկին դատավոր Պարգև Օհանյանի կողմից։

«Գործող քր․ օր-ի 226-րդ հոդվածում արգելվում է միայն «ԱԶԳԱՅԻՆ արժանապատվությունը նվաստացնելուն ուղղված գործողությունները, ուստի ՆԵՐԱԶԳԱՅԻՆ սոցիալական խմբերի միջև արժանապատվությունը նվաստացնելուն ուղղված գործողությունն արգելված չէ (արգելի բացակայության՝ լավ է կամ վատ լինելը դուրս է քննարկվող հարթությունից)։

Ընդ որում, սա քրեական օրենքի տեքստի մեկնաբանման կամ ցանկությունների կամ էմոցիաների հարց չէ։ Գործ ունենք քրեական օրենքի բացի հետ․ այդ բացն ակնառու է, եթե գործող օրենքը համեմատում ենք ՌԴ քր․ օր-ի 282-րդ և ՀՀ նոր քր․ օր-ի 329-րդ հոդվածների հետ, որտեղ, ըստ էության, լրացվել է ներազգային ատելություն հրահրելու բացը։ Նշված արգելքներում խոսվում է «անձանց խմբի» նկատմամբ (․․․) «ոչ միայն ազգային, այլ նաև էթնիկ կամ սոցիալական բնույթի ԱՅԼ հանգամանքներով պայմանավորված» կամ «սոցիալական խմբին պատկանելու հանգամանքով պայմանավորված» ․․․ անհանդուրժողականության կոչերը (․․․), որը թերևս կարող է վերաբերել նաև ներազգային ատելության դրսևորումներին։ Ցավով եմ եզրակացնում, որ Հայաստանում երկու ամսով մարդ են կալանավորում օրենքով չարգելված արարքի պայմաններում»,- հայտարարել էր իրավագիտության դոկտոր, պրոֆեսոր Արթուր Ղամբարյանը։

Իսկ նախկին դատավոր Պարգեւ Օհանյանը, կրկին արձանագրելով հիմնավոր կասկածի բացակայությունը, նշել էր. «Ազգայինի համար պայքարող հայը՝ հային, շիրակցին՝ շիրակցուն ինչպես կարող է ազգային թշնամանք հարուցելու կամ ազգային արժանապատվությունը նվաստացնելու ցանկություն ունենալ...ԵՎ որքան էլ շիրակցին, լոռեցին, արարատցին, ապարանցին, ղարաբաղցին, սիրիահայը, պարսկահայը, կախված տարածաշրջանային տարբեր գործոններից, որոշակի տարբեր մշակույթներ ունենան, տարբեր բարբառներով խոսեն, նրանք բոլորը,մենք մի ազգ ենք,ՀԱՅ,խոսում ենք,գրում ենք հայերեն,ընդհանուր հայկական մշակույթի կրողներ ենք...»։

Լարիսա Ալավերդյանը մեզ հետ զրույցում նախ ցավակցություն հայտնեց Արմեն Գրիգորյանի հարազատներին, ապա արձանագրեց, որ Արմեն Գրիգորյանի նկատմամբ իրականացվել է քաղաքական հետապնդում՝ օրվա իշխանությունների վարած քաղաքականության նկատմամբ ունեցած անհամաձայնության համար։

Ալավերդյանի խոսքով՝ ՀՀ-ում իշխանության կողմից խտրականությունն ինստիտուցիոնալ ձևով ուղղակիորեն դարձել է ապրելու ձևը, այն է՝ խտրականություն քաղաքական կարծիքների և մոտեցումների ձևով, ինչը նույն կերպ մերժելի է, ինչպես խտրականությունը՝ ազգային, սեռական հիմքով։

Նշենք, որ Արմեն Գրիգորյանի ինքնազգացողությունը վատացել է հենց դատական նիստերի դահլիճում, իսկ նրա առողջական խնդիրների մասին պաշտպանության կողմը բարձրաձայնել է բազմիցս։

«Տարբեր ձևով է դրսևորվում քաղաքական հետապնդումը։ Հիշեցնեմ՝ արդեն մի քանի մահեր ենք ունեցել այս իշխանությունների ոչ միայն վարած քաղաքականության, այլև՝ մարդու իրավունքների վերաբերյալ իրենց մոտեցումների հետեւանքով։ Դա ամենակոշտ ձևն է հետապնդումների և այս իշխանությունը չի կարող իրեն արդարացնել նրանով, որ չի լինում բացեիբաց սպանություն, խիստ հակառակը։ Միջազգային պրակտիկայում հայտնի են քաղաքական հետապնդումների մեթոդները, սրանք են ամենատարածված աշխարհով մեկ այն պետություններում, որոնք հայտարարում են իրենց ժողովրդավարական, իրականում իրականացնում են կամայական և ավելի քան միանձնյա կառավարում և ամբողջ թիմը ծառայում է այդ նպատակին, այն է՝ ոչնչացնել, Հայաստանում արմատախիլ անել այլակարծությունը։ Այդպիսի նպատակի համար որևէ պատնեշ չի տեսնում այս իշխանությունը»,- նշեց Ալավերդյանը։

Հեղինակ՝ Իզաբել Սահակյան

Աղբյուր` Փաստինֆո