Փաստ ինֆո

Էներգետիկ բնագավառում լարվել են Ռուսաստանի եւ Ղազախստանի հարաբերությունները։ Այդ մասին «Փաստինֆո»-ի եթերում ասել է ՀՀ նախկին վարչապետ Խոսրով Հարությունյանը։

«Ղազախները, ըստ էության, հայտարարեցին, որ պատրաստ են միանալ այլ երկրների այն ջանքերին, մասնավորապես Ադրբեջանին, որոնք կփորձեն փոխհատուցել էներգակիրների այն դեֆիցիտը, որը կառաջանա Ռուսաստանից էներգակիրների արտահանումը դեպի եվրոպական շուկա՝ կրճատման հետեւանքով»,- ասել է Խ.Հարությունյանը՝ նշելով, որ սա բավական լուրջ հարց է։

Նրա խոսքերով՝ Ռուսաստանը տարեկան 150 մլրդ խոր. մետր գազ էր տալիս Եվրոպային, հիմա այդ թիվն էապես կրճատվել է, այսինքն՝ հաշվի առնելով իր նկատմամբ կիրառված սանկցիաները, Ռուսաստանը կրճատել է իր էներգակիրների հոսքը Եվրոպա։ «Երկրներ կան՝ Ադրբեջանը, խոսվում է արդեն Սաուդյան Արաբիայի մասին, Կատարը, Եգիպտոսը, Ալժիրը պատրաստ են համատեղ այդ դեֆիցիտը կոմպենսացնել։ Դրանց միացավ նաեւ Ղազախստանը։ Խոսք է գնում 40-60 մլրդ խմ կոմպենսացնելու մասին եւ այս երկրները կարող են անել ավելին։ Բայդենի ուղեւորությունը Մերձավոր Արեւելք սա է հետապնդում»,- նկատել է բանախոսը։

Նրա դիտարկմամբ՝ շատ լուրջ տեղաշարժեր են տեղի ունենում։ Այդ երկու ինտեգրացիոն զուգահեռները այսօր տեղի են ունենում, մեկը Անկարայի շուրջ՝ հետխորհրդային տարածքի երկրներ, հատկապես միջինասիական երկրներ եւ Ադրբեջան, մյուսը՝ Մոսկվայի շուրջ, առայժմ միայն Բելառուսը։ Աշխարհը կանգնած բավական լուրջ աշխարհաքաղաքական վերաբաժանումների շեմին»,- փաստել է Խոսրով Հարությունյանը։

Մանրամասները՝ տեսանյութում

Աղբյուր` Փաստինֆո