Փաստ ինֆո

Մուրադ Փափազյանի մուտքը ՀՀ արգելելու իշխանությունների քայլը անձնական վրեժխնդրություն էր՝ ի պատասխան Փարիզում Նիկոլ Փաշինյանի ավտոշարասյան ուղղությամբ նետված քարերի։ «Փաստինֆո»-ի հետ զրույցում նման կարծիք է հայտնել քաղաքագետ Արա Պողոսյանը։

ՀՅԴ Բյուրոյի անդամ, Ֆրանսիայի հայկական ընկերության (CCAF) համակարգող խորհրդի նախագահ Մուրադ Փափազյանի մուտքը ՀՀ արգելելու փաստի մասին հայտնի դարձավ երեկ. Երեւանի օդանավակայանում նրան թույլ չեն տվել դուրս գալ քաղաք ու սահմանապահներն ուղեկցել են դեպի վերադարձի օդանավ։ Թեման շարունակում է ակտիվորեն քննարկվել հանրային դաշտում։
Քաղաքագետ Արա Պողոսյանի գնահատմամբ՝ Մուրադ Փափազյանի նկատմամբ իշխանությունների արած քայլը անձնական վրեժխնդրություն էր։ Քաղաքագետն այդ եզրահանգմանն է եկել՝ դատելով հանրային դիսկուրսում որոշ շրջանակների կողմից ակտիվորեն քննարկվող հայտնի միջադեպից, երբ Նիկոլ Փաշինյանի Ֆրանսիա կատարած այցի ժամանակ մեր մի խումբ հայրենակիցներ քարեր են նետել նրա շարասյան ուղղությամբ։

«Այդ միջադեպից անմիջապես հետո Փափազյանը թիրախավորվել է Հայաստանի ներկա իշխանությունների կողմից, քանի որ կատարվածը նրանք կապում էին ՀՅԴ-ի և մասնավորապես՝ Մուրադ Փափազյանի հետ։ Հանրային դիսկուրսում հենց շեշտվում է, թե դա, իբր, պետության դեմ ուղղված քայլ էր, բայց նախ՝ միֆ է այն, թե պառլամենտական համակարգի դեպքում վարչապետը պետության խորհրդանիշ կարող է լինել։ Դա, առնվազն, տգիտություն է։ նման բան չկա․ անգամ նախագահական համակարգի դեպքում է վիճելի, թե նախագահը երբ կարող է լինել պետականության խորհրդանիշ։ Բացի այդ, Փափազյանն այն գործիչն է, որը Սփյուռքում ակտիվորեն առաջ է տարել ու տանում հայկական շահը»,-«Փաստինֆո»-ի հետ զրույցում ասում է քաղաքագետը։

Արա Պողոսյանը դժվարանում է միանշանակ ասել՝ Փափազյանին Հայաստան չթողնելը նաև Թուրքիայի ու Ադրբեջանի անմիջական պահանջով կարող էր լինել, թե ոչ, սակայն նկատում է՝ Թուրքիան և Ադրբեջանն ամեն կերպ փորձում են չեզոքացնել այն գործիչներին, ովքեր աշխարհի տարբեր երկրներում, միջազգային տարբեր հարթակներում հետապնդում են հայկական շահը, բարձրաձայնում Ցեղասպանության, Արցախի հիմնախնդրի մասին։

«Փափազյանը մեծ ներդրում ու ազդեցություն ունի Հայ դատի պաշտպանության գործում և հեղինակություն ֆրանսիական բարձրաստիճան պաշտոնյաների մոտ։ Չմոռանանք, որ որոշ ժամանակ առաջ իր ուղեկցությամբ Հայաստան էր եկել Փարիզի քաղաքապետը։ Այս ամենը չէր կարող վրիպել Հայաստանի ներկա իշխանությունների աչքից։ Հայաստան-Արևմուտք հարաբերությունների մերձեցման մենաշնորհը փորձում են պահել իրենց ձեռքում և մեկ էլ հայտնվում է Հայաստանում ընդդիմադիր քաղաքական ուժի ներկայացուցիչ դրսում, ով ավելի մեծ հեղինակություն ունի և ավելի արդյունավետ է աշխատում ու պաշտպանում հայկական շահը, քան իրենք՝ իշխանությունները»-նշում է մեր զրուցակիցը։

Որ անձնական դրդապատճառներով նման պատժիչ քայլերը շարունակական լինելու դեպքում լուրջ խնդիրներ ենք ունենալու համահայկական օրակարգերի վտանգման առումով, քաղաքագետը վստահ է։ Պողոսյանը շեշտում է՝ նման նախադեպերի կրկնությունը տանելու է Հայաստան-Սփյուռք կապերի անշրջելի խաթարման և քաոսիկ քաղաքական վիճակի։

Նման քայլերի նպատակը նաև մարդկանց անունը վարկաբեկելն ու հիասթափեցնելն է։ Եթե գրավիչ դառնա, այսպես կոչված, անցանկալի մարդկանց լռեցնելու՝ իշխանության գործելաոճը, ապա անխուսափելի կդառնա ազգի քաղաքական ջլատումը։ Կսկսեն կիրառվել տարբեր քաղաքական խոսույթներ և որպես ազգ, ուղղակի, կմասնատվենք»,-համոզված է Պողոսյանը։

Աղբյուր` Փաստինֆո