Փաստ ինֆո

Նիկոլ Փաշինյանը հայտարարում է, որ Արցախին մոտ 144 մլրդ դրամի ֆինանսական աջակցություն է ցուցաբերվելու, բայց չի ասում,թե ինչու է ցուցաբերվող աջակցությունը կրկնապատկվել։ Այսօր կառավարության շենքի մոտ տեղի ունեցած ակցիայի ժամանակ հայտարարել է հադրութցի Արթուր Ստեփանյանը։

Նշենք, որ արդեն տեւական ժամանակ է, ինչ հադրութցիները բողոքի ակցիաներ են իրականացնում ՀՀ կառավարության շենքի մոտ՝ պահանջելով հստակեցնել իրեն կարգավիճակը։

«Համարյա 1 տարի երկու ամիս ՀՀ կառավարությունը փաստացի տվել է քաղաքական ապաստան, հոգացել սոցիալական կարիքները, բայց տարեվերջին սոցապծառայությունը, ՀՀ կառավարությունը հասկացրել են, որ այլեւս Հայաստանի կառավարությունը սոցիալական աջակցություն չի ցուցաբերելու։ Այսինքն՝ բոլոր տեսակի ֆինանսական աջակցությունները ՀՀ կառավարությունը տրամադրելու է Արցախի կառավարությանը, որն էլ պարտավորվելու է փախստականների կարիքները հոգալ»,- ասաց Ա.Ստեփանյանը՝ նշելով. «2022թ. Տարեմուտի ուղերձում ՀՀ վարչապետն իր 10-րոպեանոց ելույթում ընդամենը մի քանի վայրկյան անդրադարձավ նաեւ Արցախին՝ ասելով, թե Հայաստանի կառավարությունը Արցախին ֆինանսական աջակցություն է ցուցաբերելու՝ 144 մլրդ-ի մասին է խոսքը։ Նաեւ ասել է, որ ֆինանսական աջակցությունը կրկնապատկվել է, բայց, չգիտես ինչու, չի նշել, թե ինչի համար է կրկնապատկվել»։

Իր բնակության վայրից ու ապրուստից զրկված Ստեփանյանը նկատել է, որ Ն. Փաշինյանը չի ասել, որ իրենց եւ Արցախի կառավարության օրոք եղել է դաժան պատերազմ եւ 40 հազար մարդ փախստական է դարձել, տունուտեղը, ապրուստի միջոցը կորցրել եւ դրա համար էլ այս գումարները հատկացնում են։

« Իշխանությունների գործելաոճը բոլորս էլ գիտենք, Արցախի Հանրապետության ղեկին այսօր նստած է կոռուպցիայի արքա Արայիկ Հարությունյանը։ Այդ մարդն էլ գիտի, թե այդ գումարները տվել են, որ ինքը բիզնես անի։ Ու այդպես արդեն հինգ ամիս է ժողովուրդն հայտնվել է բարձիթողի վիճակում»,- հայտարարել է հադրութցի փախստականը՝ նշելով, որ եկել են կոչ անեն ՀՀ իշխանություններին, որ հիշեցնեն Արայիկ Հարությունյանին, որ գումարը չի հատկացվեն բիզնեսի համար։

Աղբյուր` Փաստինֆո