Փաստ ինֆո

Եթե ընդդիմությանը թվում է, որ պետք է դիմենք ՍԴ և նրանց փախուստի փրկօղակ նետենք՝  սխալվում են։ Նրանք պետք է գլուխները կախ գան ԱԺ, նայեն մեր աչքերի մեջ և չկարողանան կրկնել այն, ինչ այս ամիսներին ասել են փողոցներում և ոչ միայն փողոցներում, մենք էլ՝ պետք է նայենք իրենց աչքերին և ասենք այն ամենը, ինչ ուզում ենք ասել և ասում ենք։ Այս մասին ԱԺ խորհրդի նիստից հետո լրագրողների հետ զրույցում ասաց ԱԺ փոխնախագահ Ռուբեն Ռուբինյանը։

«Փաստինֆո»-ի հաղորդմամբ՝  ԱԺ խորհուրդն այսօր ՔՊ-ի նախաձեռնությամբ նիստ էր հրավիրել՝ քննարկելու ընդդիմադիր պատգամավորներին մանդատից զրկելու միջնորդությամբ ԱԺ դիմելու հարցը և, քանի որ, ընդդիմադիր պատգամավորները չեն ներկայացել նիստին, այն, ըստ ընթացակարգի, հետաձգվել է մեկ շաբաթով, սակայն Ռուբինյանը լրագրողներին տեղեկացրել է, որ ՔՊ-ն որոշել է չդիմել ՍԴ։

Ռուբինյանը որոշումը պայմանավորել է մի քանի հանգամանքով, ապա արձանագրել, որ կարծում են՝ մեր երկրին հիմա պետք է քաղաքական կայունություն, համերաշխություն և այդ որոշումը պայմանավորում են դրանցով։

Ռուբինյանը նշել է, թե ընդդիմադիրները պետք է գլուխները կախ գնան ԱԺ՝ իրենց աչքերի մեջ նայելու։ Դիտարկմանը, որ Իշխան Սաղաթելյանը հայտարարել է՝ իրենք կգան ԱԺ միայն իրենց օրակարգով, Ռուբինյանը հակադարձեց. «Դե ես էլ ասում եմ՝ գլուխները կախ գալու են։ Չգան Խորհրդարան՝ կնշանակի, որ այդ նստաշրջանում նույնպես կծագի իրենց բացակայության հարցով ՍԴ դիմել-չդիմելու հարց և մենք կքննարկենք»։

Նրա խոսքով՝ եթե խմբակցության պատգամավորները շարունակաբար որոշում են չգալ և վերահաստատում են իրենց հարգանքի բացակայությունը՝ ժողովրդի քվեի հանդեպ, այդ առումով՝ գուցե քննարկումներ լինեն։ Ինչ վերաբերում է վարչապետին անվստահություն հայտնելու օրակարգով Խորհրդարան վերադառնալուն, Ռուբինյանը նշեց, որ պետք է նայել արդյունքները. «Նրանք նախաձեռնել էին փողոցային շարժում՝ վարչապետի հրաժարականի պահանջով։ Այդ շարժումն ինչպես ավարտվեց, ավարտվեց այնկերպ, որ ՔՊ որոշմամբ՝ ԱԺ մեծամասնությունն իրենց պաշտոններից հեռացրեց Իշխան Սաղաթելյանին և Վահե Հակոբյանին, մյուսներն իրենք հրաժարական տվեցին, երկու ընդդիմադիր պատգամավոր էլ՝ իրենց մանդատներից հրաժարվեցին։ Ես ենթադրում եմ, որ եթե իրենք նշված հարցով փորձեն օրակարգ գեներացնել ԱԺ-ում, հաշվի առնելով իրենց գործողությունների նախկին պատմությունը և տրամաբանությունը, դա կարող է ավարտվել այլ ընդդիմադիր պատգամավորների մանդատ դնելով կամ այլ գործողություններով։ Իրենց ցանկացած գործողություն բերում է իրենց շարքերի նոսրացման»։

Աղբյուր` Փաստինֆո