Փաստ ինֆո

Օգոստոսի վերջերին-սեպտեմբերի սկզբին լինելու է փողոցային պայքարի նոր ալիք։ Այդ մասին «Փաստինֆո»-ի եթերում հայտնել է քաղաքագետ Արա Վարդանյանը։

«Դիմադրություն» շարժումը մեկուկես ամսում ի զորու էր ապացուցել ամբողջ աշխարհին, որ երբ իրենք վստահորեն դուրս են գալիս փողոց, ՀՀ գործող իշխանությունն սկսում է խուսափել շփվել մարդկանց հետ»,- հայտարարել է Արա Վարդանյանը։

Դիտարկմանը, որ ընդդիմությունն ա՞յս տեմպերով է աշխարհաքաղաքական մարտահրավերներին դիմակայում՝ բանախոսն արձագանքել է. «Ընդդիմությունն ի զորու է եղել ցույց տալ ամբողջ աշխարհին, որ հայ ժողովուրդը դեմ է այս ձեւով հայ-թուրքական մերձեցմանը։ Եվ բոլոր աշխարհագրական կենտրոններից ազդակները կան, որ իրենք դա հասկացել են»։

Փողոցային պայքարի դադարից հետո՝ Աննա Հակոբյանը մեկնեց Սյունիք, իսկ Փաշինյանն էր Արմավիր։ Ա. Վարդանյանի դիտարկմամբ՝ ակնհայտ է, որ Նիկոլն ու Աննան ուզում են «իրենց«տերերին ցույց տալ, որ իրենք դեռեւս տիրապետում են Հայաստանի ներքաղաքական իրավիճակին», բայց նրա համոզմամբ՝ աշխարհաքաղաքական կենտրոններում շատ լավ գիտակցում են, որ Նիկոլը այլեւս չունի լեգիտիմություն։

«Աշխարհում չկա նախադեպը, որ պառլամենտական երկրում ընդդիմությունը բոյկոտում է խորհրդարանական նիստերը, ինչքան էլ փորձեն դա ներկայացնել որպես սովորական բան։ Դա սովորական չէ, դա միանշանակ խանգարում է եւ բերելու է իր հանգուցալուծմանը։ Հայաստանում կա ճգնաժամ եւ լինելու է այնքան ժամանակ մինչեւ Նիկոլը չհեռանա»,- ասել է նա՝ ավելացնելով, որ օգոստոսի վերջ-սեպտեմբերի սկզբին ականատես կլինենք նոր ալիքի։

Այդուհանդերձ, ըստ նրա, եթե հայ ժողովուրդը միասնաբար չկանգնի ոտքի, ապա մենք դատապարտված ենք որպես ազգ եւ երկիր կործանվելու։ «Եթե հայ ժողովուրդը թքած ունի, ապա Հայաստանում չկա որեւէ ընդդիմադիր գործիչ կամ ընդդիմություն, որ կկարողանա իշխանություն փոխել»,- նկատել է բանախոսը։

Մանրամասները՝ տեսանյութում

Աղբյուր` Փաստինֆո