Փաստ ինֆո

Նարեկ Մանթաշյանի առողջական վիճակը շատ ծանր է գնահատվում։ Ինսուլիանային կախվածությունն այս պահին օրական 80 միլիգրամ է, մինչդեռ, 60 միլիգրամն արդեն իսկ կալանավորման հետ անհամատեղելի է։ Այս մասին «Փաստինֆո»-ի հետ զրույցում ասաց Նարեկ Մանթաշյանի պաշտպան Ալեքսանդր Կոչուբաևը։

«Քանի որ շաքարային դիաբետի ծանր ընթացք ունեցող բնութագրիչ էր և արդեն իսկ ախտահարվել էր մյուս օրգանները, 20 օր առաջ միջնորդություն էինք ներկայացրել՝ շտապ նիստ գումարելու և Նարեկ Մանթաշյանի նկատմամբ դատաբժշկական փորձաքննություն նշանակելու մասին՝ պարզելու Նարեկ Մանթաշյանի կալանավորման անհամատեղելիությունը, սակայն ժանրի կանոնների համապատասխան՝ Ֆարխոյանն այդ նիստը չի գումարել, դեռևս հարցը չի քննարկել, ինչն անթույլատրելի է։ Հուլիսի 20-ին նիստը կայանալու է և Ֆարխոյանը՝ ուզի, թե ոչ՝ քննարկելու է այդ հարցը։ Հուսով ենք՝ օր առաջ փորձաքննություն կնշանակվի և Նարեկ Մանթաշյանին ազատության մեջ կտեսնենք»,- նշեց Կոչուբաևը։

Դիտարկմանը, որ հանձնաժողովի ձևավորումը և փորձաքննության եզրակացության ստացումը բավականին երկար ժամանակ է պահանջում՝ փաստաբանը նշեց, որ այդ ընթացքում կբարձրացվի նաև խափանման միջոցի փոփոխման հարց, բայց այս պահին հրատապ է, որ միջնորդությունը բավարարվի, նշանակվի հանձնաժողովային դատաբժշկական փորձաքննություն։

«Ակնհայտորեն առկա ախտորոշումը համապատասխանում է կառավարության ցանկի հետ, որը սահմանում է կալանքի հետ անհամատեղելի հիվանդությունների ցանկը և, այս ամենը հասկանալով, քրեական հետապնդումը սանձազերծած անձինք, պարբերաբար տարաժամկետում են այս հարցի քննարկումը և, ցավոք սրտի, պարոն Մանթաշյանը շարունակում է գտնվել ապօրինի կալանքի տակ»,- նշեց Կոչուբաևը՝ հավելելով, որ Նարեկ Մանթաշյանը պարբերաբար բերվում է հիվանդանոցներ կամ գտնվում է ՔԿՀ բուժմասում։

«Հուլիսի 20-ին կտեսնենք՝ Ֆարխոյանը համապատասխան ազատություն կունենա, թե՞ նրան հրահանգավորված է անգամ համատեղելիությունը պարզելու հարցը քննարկել»,- նշեց փաստաբանը։

Հիշեցնենք, որ 2020թ նոյեմբերի 9-ին կապիտուլյացիոն ակտի ստորագրմանը հաջորդել են զանգվածային բողոքի ակցիաներ, որոնց վերաբերյալ ԱԱԾ-ում քրեական գործ է քննվել։ Նարեկ Մանթաշյանին մեղադրանք է առաջադրվել ՀՀ քրեական օրենսգրքի 225-րդ հոդվածի 1 -ին և 2-րդ մասերով՝ այն է զանգվածային անկարգություններ կազմակերպելը և դրանց ժամանակ բռնություն գործադրելը ջարդ կամ հրկիզում իրականացնելը, գույք ոչնչացնելը կամ վնասելը, հրազեն, պայթուցիկ նյութեր կամ պայթուցիկ սարքեր գործադրելը կամ իշխանության ներկայացուցչին զինված դիմադրելը, իսկ կառավարության շենքում դրոշ ծածանելը ԱԱԾ-ն գնահատել է որպես կողոպուտ։

Հատկանշական է, որ քրեական գործը քննվում է 2020թ-ից և դեռևս այդ ժամանակ դատարանը մերժել էր Մանթաշյանին կալանավորելու մասին միջնորդությունը, Մանթաշյանը կալանավորվել է միայն 2021թ տարեմուտին, երբ պարզվել է, որ կառավարության շենքում դրոշ ծածանելը դիտարկվել է որպես կողոպուտ և վարույթն իրականացնող մարմինը լրացրել է մեղադրանքը, ապա ներկայացրել կալանավորման միջնորդությունը։ Քրեական գործով նախաքննությունն ավարտվել է, դատախազությունը հաստատել է մեղադրական եզրակացությունը և գործն ուղարկել դատարան։

Հեղինակ՝ Իզաբել Սահակյան

Աղբյուր` Փաստինֆո