Փաստ ինֆո

Դատարան ներկայացնելու համար մեղադրյալին ինքնաշխատ ձերբակալելու կարգի վերաբերյալ առաջիկայում նախադեպային որոշում կկայացվի։ Վճռաբեկ դատարանը աղմկահարույց մի քանի գործերով բողոքները վարույթ չընդունելուց հետո, ի վերջո, որոշել է մեկ այլ գործով ընդունել։ Խոսքը գնում է իշխանության ներկայացուցչի նկատմամբ բռնություն կիրառելու վերաբերյալ քրեական գործով ազատության մեջ գտնվող մեղադրյալին ձերբակալելու, ապա՝ կալանավորելու որոշման դեմ բողոքի մասին։

Մեղադրյալ Հ. Հ.-ի պաշտպան Ալեքսանդր Կոչուբաևը, ում կողմից ներկայացված բողոքը Վճռաբեկ դատարանը վարույթ է ընդունել, «Փաստինֆո»-ի հետ զրույցում հայտնեց, որ բողոքով բարձրացրել է այն հանգամանքը, որ մեղադրյալին ձերբակալելու, ապա՝ կալանավորելու ներկայիս կարգն ինքնաշխատ է կիրառվում, մինչդեռ, նորմը չպետք է գործի ինքնաշխատ, պետք է կիրառվեն որոշակի չափանիշներ։

«Բոլոր դեպքերում խնդիրը վերաբերում է անձի անձնական ազատության իրավունքին և այդտեղ առանց որևէ չափանիշի կիրառմամբ ազատազրկումն անթույլատրելի է»,- նշեց Ալեքսանդր Կոչուբաևը՝ հավելելով, որ նույնանման իրավաբանական դիրքորոշումներով ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի, հասարակական-քաղաքական գործիչ Նարեկ Մանթաշյանի գործերով ներկայացված բողոքները վարույթ չեն ընդունվել, բայց ամենաբարձր մակարդակում թերեւս որոշում է կայացվել, որ այս հարցը պետք է լուծվի։

«Պետք է սպասենք տեսնենք, թե Վճռաբեկն ինչպես կարձագանքի։ Կարծում ենք՝ Վճռաբեկ դատարանը չափորոշիչներ կսահմանի բոլոր դեպքերում և կունենանք արդեն նախադեպային որոշում, որով կկարգավորվի, թե ազատության մեջ գտնվող մեղադրյալին որ դեպքերում կարելի է ձերբակալել և առհասարակ դրա իրավաչափության պայմանները»,- ընդգծեց Կոչուբաևը։

ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի փաստաբան Աննա Մանթաշյանը «Փաստինֆո»-ի հետ զրույցում արձանագրեց երկակի մոտեցումները։ Մասնավորապես, փաստաբանը հիշեցրեց, որ, երբ 2021թ սեպտեմբերի 7-ին վարույթն իրականացնող մարմինը կայացրել էր Աղվան Հովսեփյանին ձերբակալելու մասին որոշում, ինչի իրավաչափության դեմ պաշտպանական կողմը բողոք է ներկայացրել առաջին ատյանի դատարան, դրան զուգահեռ վարույթն իրականացնող մարմինը կալանքի միջնորդություն ներկայացրել։ Արդյունքում, ինչպես և սպասվում էր, դատարանը մերժել է ձերբակալման իրավաչափության բողոքը, կալանավորելու վերաբերյալ միջնորդությունը՝ բավարարել։ Դատարանի որոշման դեմ վերաքննիչ բողոք է ներկայացվել, որը մերժվել է, ներկայացվել է նաեւ վճռաբեկ բողոք, սակայն Վճռաբեկ դատարանը մերժել է վարույթ ընդունել բողոքը, թեև առկա էր Վճռաբեկ դատարանի քրեական պալատի դատավոր Սերժիկ Ավետիսյանի հատուկ կարծիքը։ Պաշտպանության կողմը դիմում է ներկայացրել ՍԴ՝ վիճարկելով ձերբակալման որոշման սահմանադրականությունը, քանզի այդպիսով խախտվել է Աղվան Հովսեփյանի ֆիզիկական ազատությունը, ազատությունից զրկվելու պատճառների մասին տեղեկացված լինելու իրավունքը, իրեն ազատությունից զրկելու իրավաչափությունը վիճարկելու իրավունքը. «Այսինքն՝ Սահմանադրության 27-րդ հոդվածի 1-ին մասին հակասող գործողություններ են տեղի ունեցել»։ ՍԴ-ն վարույթ է ընդունել դիմումը, նշանակել դատական նիստի օր, սակայն հուլիսի 1-ին ՍԴ-ն, պաշտպանության կողմի համար անհասկանալի պատճառներով, կասեցրել է վարույթը՝ պատճառաբանելով, թե պետք է ճշտումներ իրականացնել։

«Այսօր մենք տեղեկացանք, որ նույն փաստական հանգամանքներով մեկ այլ քրեական գործով մեկ այլ անձի վերաբերյալ մեկ այլ փաստաբանի բերած վճռաբեկ բողոքը՝ բառացիորեն նույն մեկնաբանություններով Վճռաբեկ դատարանը վարույթ է ընդունել։ Փաստորեն տարբերակված մոտեցում է ցուցաբերվում՝ կախված անձի ով լինելուց։ Քաղաքական իշխանությունների հետաքրքրվածությունից, ինչ-ինչ անձանց անձնական վրեժխնդրությամբ պայմանավորված՝ բողոքներին տարբերակված մոտեցում է ցուցաբերվում։ Եթե մեր բողոքի պայմաններում հարցը վերաբերում էր Աղվան Հովսեփյանին, դատական բոլոր ատյանները, կարծես, իրար հետ համախմբված և համագործակցված, մերժում են և նույնիսկ վարույթ չեն ընդունում այն դեպքում, երբ ակնհայտ է խնդիրը, պետք է ձևավորվի օրենքի միատեսակ կիրառման պրակտիկա»,- նշեց Աննա Մանթաշյանը՝ հավելելով. «Պատճառը միանշանակ քաղաքական հետապնդումն է և վրեժխնդրությունը։ Սա տարբերակված մոտեցում է»։

Փաստաբանի արձանագրմամբ՝ մեկ անգամ եւս ապացուցվում է, որ Աղվան Հովսեփյանի նկատմամբ իրականացվում է ոչ թե քրեական վարույթ, այլ՝ այստեղ պարզապես գործ ունենք քաղաքական պատվերի և վրեժխնդրության հետ։

Մանթաշյանը մտահոգություն հայտնեց, որ ՍԴ-ն Աղվան Հովսեփյանի դիմումի հիման վրա վարույթը կասեցրել է՝ Վճռաբեկ դատարանի հետ ներքին պայմանավորվածությամբ, մասնավորապես, փաստաբանը չի բացառում, որ Վճռաբեկ դատարանը մեկ այլ գործով պետք է վարույթ ընդունի բողոքը, կկայացնի նախադեպային որոշում, ինչից հետո ՍԴ-ն կմերժի Աղվան Հովսեփյանի դիմումը՝ հղում կատարելով Վճռաբեկ դատարանի նախադեպային որոշմանը։

Հեղինակ՝ Իզաբել Սահակյան

Աղբյուր` Փաստինֆո