Փաստ ինֆո

Վերաքննիչ քրեական դատարանի դատավոր Տիգրան Սիմոնյանն այս պահին ավելի Արմեն Դանիելյան է, քան ինքը՝ Արմեն Դանիելյանը։ Այս մասին «Փաստինֆո»-ի հետ զրույցում ասաց փաստաբան Ալեքսանդր Կոչուբաևը։

«Տիգրան Սիմոնյանն ամենամեծ Արմեն Դանիելյանն է, որովհետև հավակնում է այն գահին, որտեղ եղել է Արմեն Դանիելյանը։ Այդ դատավորն իրեն թույլ է տալիս վեց ամիս դատական ակտ չուղարկել կողմերին կամ առանց պաշտպանին, մեղադրյալին ծանուցելու՝ նիստ հրավիրել, հետին թվով ծանուցագրեր կազմել՝ ուղարկել դատավարության կողմերին, հետին թվով որոշումներ կայացնել՝ ուղարկել կողմերին։ Տիգրան Սիմոնյանն այսօր արտացոլում է մեր դատաիրավական համակարգի ամբողջ պատկերը, սիմվոլն է։ Վստահաբար հաղորդում լինելու է »,- նշեց Ալեքսանդր Կոչուբաևը՝ ավելացնելով, որ այս փուլում կփորձեն օգտագործել միայն ՀՀ արդարադատության նախարարին և Դատավորների ընդհանուր ժողովի Էթիկայի և կարգապահական հարցերի հանձնաժողովին դիմելու մեր գործիքը, իսկ հետագա քայլերի վերաբերյալ որոշում կկայացվի վստահորդների հետ առարկայական քննարկումների արդյունքում։

Չմանրամասնելով քրեական գործի հանգամանքները՝ Կոչուբաևը հայտնեց, որ դատավոր Տիգրան Սիմոնյանն առանց մեղադրյալին ծանուցելու, առանց պաշտպանի ներկայության՝ քննարկել է անձի խափանման միջոցի հարցը և կալանավորելու որոշում կայացրել։ Ընդ որում, դա այն դեպքում, երբ պաշտպանը նախապես միջնորդություն էր ներկայացրել՝ խնդրելով հետաձգել դատական նիստը, քանի որ պետք է ներկայանա նախապես նշանակված այլ դատական նիստին։

«Այդ հանգամանքը նա ճանաչել է անթույլատրելի։ Ես որպես պաշտպան դատավորների նախասիրություն, նախապատվություն չեմ տալիս, առաջնորդվում եմ այն սկզբունքով, թե որ դատավորն է ինձ նախապես ծանուցել, որ դատական նիստն է նախապես ծանուցվել, ես գնացել էի ընդամենը նախապես նշանակված այլ դատական նիստի, պատշաճ ձևով դիմում էի հասցեագրել Տիգրան Սիմոնյանին, որ նախապես նշանակված դատական նիստ ունեմ։ Սա նա համարել է անթույլատրելի։ Ընդ որում՝ մեղադրյալն առհասարակ որևէ ծանուցում չի ունեցել։ Սա արդարադատության էության ծայրահեղ խաթարում է, սրանից ավել անձի ազատության իրավունքը ոտնահարել, դժվարանում եմ պատկերացնել, թե էլ ինչպես պետք է լինի։ Հատկապես մտահոգիչ է, որ հենց այդ գործով ընդամենն օրեր առաջ Տիգրան Սիմոնյանը կեղծ ծանուցագիր է ուղարկել մեզ, իբր թե ինքը դատական նիստ էր նշանակել՝ եռօրյա ժամկետում, մինչդեռ, ծանուցագիրն ուղարկվել էր այն հաշվարկով, որ ես այն ստանամ դատական նիստից հետո արդեն»,-նշեց փաստաբան Կոչուբաևը։

Դիտարկմանն ի պատասխան, որ ԲԴԽ-ն Արմեն Դանիելյանի վերաբերյալ համանման վարույթով արդեն մերժել էր միջնորդությունը, այսպես ասած՝ «նախադեպ» է ձևավորվել, Կոչուբաևն արձագանքեց՝ ԲԴԽ-ն կմերժի, թե ոչ՝ սթափեցնող ազդեցություն կունենա։

«Ունենք այսպիսի իրավիճակ և դա չի ազատում մեզ գործելու պարտականությունից։ Եթե անգամ փաստաբաններով նստենք, ասենք՝ դա է իրավիճակը, դա մեզ ոչ մի լավ տեղ չի հասցնի, որովհետև, ցավոք, այսօր դատաիրավական համակարգի դիմադրողականությունը, որը դեռևս շարունակում է լինել, դա փաստաբանների, լրագրողների և որոշ պատվախնդիր դատավորների շնորհիվ է, եթե մենք էլ կորցնենք էնտուզիազմը և պայքարելու մեր ցանկությունը, վստահաբար տեղ չենք հասնի, իսկ, հրապարակային դատավարության պայմաններում, եթե հանրությունն իմանա, որ Տիգրան Սիմոնյանը նման ապօրինություններ է անում, առհասարակ դատավարության հետ աղերս չունի՝ աշխատող գործիք է»,- նշեց Կոչուբաևը։

Հեղինակ՝ Իզաբել Սահակյան

Աղբյուր` Փաստինֆո