Փաստ ինֆո

ԲԴԽ նախկին նախագահ Ռուբեն Վարդազարյանն այսօր հարցաքննվել է ՔԿ-ում՝ Գագիկ Ջհանգիրյանի վերաբերյալ հրապարակված աղմկահարույց ձայնագրության առնչությամբ հարուցված քրեական վարույթի շրջանակներում։ Տեղեկությունը «Փաստինֆո»-ի հետ զրույցում հաստատեց Ռուբեն Վարդազարյանը՝ նշելով, որ ցուցմունք տվել է, սակայն բովանդակության վերաբերյալ ոչինչ չի կարող ասել՝ նախաքննական գաղտնիքը պահելու նպատակով։

Հարցին՝ արդյո՞ք ձայնագրության ամբողջական տարբերակը քննիչը պահանջել է, Վարդազարյանը պատասխանեց՝ պահանջելն ամպագոռգոռ է ասված. «Հարցրել է՝ տրամադրում եմ, թե՝ ոչ, պատասխանել եմ՝ ոչ, չեմ տրամադրում»։

Վարդազարյանի արձանագրմամբ՝ քննիչը բարձր պրոֆեսիոնալ անձ էր, հարցերն իրականում տեղին էին, այս պահին որևէ խնդիր նախաքննության որակի հետ կապված չի տեսնում։

«Ամեն ինչ գնում է իր հունով՝ օրենքով նախատեսված կարգով։ Մանավանդ, որ նոր քրեական դատավարության օրենսգրքի շրջանակներում է, քննիչը տեղյակ էր, բանիմաց էր, օրենսդրության նոր պահանջները պահպանելով է հարցաքննություն իրականացրել»,- նշեց Վարդազարյանը։

Հիշեցնենք, որ հունիսի 20-ին Ռուբեն Վարդազարյանը հրավիրած ասուլիսում աղմկահարույց ձայնագրություն էր հրապարակել, որի համաձայն՝ Վարդազարյանին վարչապետի անունից առաջարկվել է հրաժարական տալ, իսկ Ջհանգիրյանն էլ ստանձնել է միջնորդի դեր՝ երաշխավորելով, որ նրա նկատմամբ հետապնդումներ չեն իրականացվի, եթե հրաժարական ներկայացնի։ Ջհանգիրյանը հանրայինի եթերում անձամբ խոստովանել է, որ բանակցություններ իսկապես վարել է Վարդազարյանի հետ՝ հրաժարական տալու համար։ Ավելին, հայտարարել է, ԲԴԽ նախագահին հրաժարական պարտադրելն այնքան էլ հեշտ գործ չէ ու ինքը նրա նկատմամբ հոգեբանական հնարքներ է կիրառել, «կուտ» տվել։ Աղմկահարույց ձայնագրությունից և առավել անհասկանալի հարցազրույցից օրեր անց հայտարարվեց, թե Գագիկ Ջհանգիրյանն ունի առողջական խնդիրներ և ենթարկվել վիրահատության։ Ակնառու էր, որ Ջհանգիրյանը առողջական խնդիրների քողի ներքո պատրաստվում է հրաժարական տալ, իսկ հուլիսի 1-ին արդեն պաշտոնապես հաստատվեց՝ Ջհանգիրյանը հրաժարականի դիմում է ներկայացրել։

ՀՀ քննչական կոմիտեում Ռ. Վարդազարյանի կողմից հրապարակված ձայնագրության կապակցությամբ նախապատրաստված նյութերով նախաձեռնվել է վարույթ՝ ՀՀ քրեական օրենսգրքի երկու հոդվածի հատկանիշներով՝ ՀՀ քրեական օրենսգրքի 441-րդ հոդվածի 1-ին մասով (Պաշտոնատար անձի կողմից իր իշխանական կամ ծառայողական լիազորությունները կամ դրանցով պայմանավորված ազդեցությունն ի վնաս պետական կամ ծառայողական շահերի օգտագործելը կամ իր ծառայողական պարտականությունը չկատարելը կամ ոչ պատշաճ կատարելը կամ այնպիսի արարք կատարելը, որը չի բխում իր լիազորություններից կամ դուրս է իր լիազորությունների շրջանակից, որն էական վնաս է պատճառել անձի կամ կազմակերպության իրավունքներին, ազատություններին կամ օրինական շահերին կամ հասարակության կամ պետության օրինական շահերին) մասով և 486-րդ հոդվածի 2-րդ մասի 2-րդ կետով (իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով՝ արդարադատության կամ որպես դատարան` օրենքով նախատեսված այլ լիազորությունների իրականացումը խոչընդոտելու նպատակով դատարանի գործունեությանը կամ գործի քննությունը խոչընդոտելու նպատակով դատախազի, քննիչի, քննչական մարմնի ղեկավարի, հետաքննության մարմնի, փաստաբանի կամ ներկայացուցչի գործունեությանը ցանկացած ձևով միջամտելը)։

Հեղինակ՝ Իզաբել Սահակյան

Աղբյուր` Փաստինֆո