Փաստ ինֆո

Մանվել Փարամազյանի ու Գևորգ Փարսյանի քայլը, մեղմ ասած, ճիշտ չեմ համարում, իմ դիրքորոշումը գիտեք ու անփոփոխ է, ինձ համար Նիկոլը ոչ թե վարչապետ է՝ այլ աթոռ զբաղեցնող, իսկ իր տիկինն էլ առաջին տիկին չէ, այլ՝ պարզապես աթոռը զբաղեցնողի տիկին է:«Փաստինֆո»-ի հետ զրույցում ասաց «Հայաստան» խմբակցության պատգամավոր, Սյունիքի նախկին մարզպետ Վահե Հակոբյանը:

Ինչպես հայտնել ենք, վարչապետի տիկին Աննա Հակոբյանը այս օրերին շրջում է Սյունիքի համայնքներով, այցելում մշակույթի կենտրոններ, ժամանցի վայրեր, թանգարաններ:

Սյունիքի համայնքապետերը, որոնք դեռևս ամիսներ առաջ «սյունյաց ողջույններով» էին դիմավորում Նիկոլ Փաշինյանին, որի վարած պատերազմի արդյունքում Սյունիքի մի շարք հատվածներ անցան թշնամուն, այս օրերին մեծ ոգևորությամբ են դիմավորում վարչապետի տիկնոջը և ուղեկցում նրան:

Քաջարանի համայնքապետ Մանվել Փարամազյանը, որը ամիսներ առաջ պնդում էր, որ Նիկոլ Փաշինյանի հրահանգով են կալանավորել իրեն, երեկ ծաղիկներով դիմավորեց Նիկոլ Փաշինյանի տիկնոջը, այսօր էր Կապան համայնքի ղեկավար Գևորգ Փարսյանն է Կապանում դիմավորել Աննա Հակոբյանին և ուղեկցել նրան:

Սյունիքի նախկին մարզպետ Վահե Հակոբյանը մեզ հետ զրույցում նշեց, որ թեև չի մեղադրում համայնքապետերին, բայց նրանց այս քայլը ճիշտ չի համարում.

«Այստեղ տարբերությունն այն է, որ Մանվել Փարամազյանը, իհարկե, նախկինում մեզ հետ ճանապարհ է անցել, նա «Վերածննվող Հայաստան» կուսակցության անդամ է եղել, բայց նրա անդամակցությունը դադարեցրել ենք դեռևս հունիսին։ Անձամբ ինձ համար կանխատեսելի էր, այն, ինչ երեկ կատարվեց, բայց Գևորգ Փարսյանը մեր թիմի անդամ չի եղել, երկուսի դեպքում էլ կարող եմ մի բան ասել՝ Աստված իրենց հետ:

Ամեն մեկն ունի իր պնդության աստիճանը, մարդ կա պինդ է, իր սկզբունքներին չի դավաճանում, մարդ կա շուտ է փշրվում, սա է ամբողջը, բայց ես ոչ մեղադրում եմ իրենց, ոչ էլ դատապարտում»,-ասաց նա:

Ի դեպ, Մանվել Փարամազյանի կալանքի տակ գտնվելու ընթացքում «Հայաստան» խմբակցության բոլոր պատգամավորները տարբեր միջոցներով պայքարում էին նրա ազատության համար, անգամ նրա նկարով շապիկով գնացել էին խորհրդարան.

«Մենք մի գրամ չենք փոշմանել, որ իր ազատության համար պայքարել ենք, մենք անօրինական կայանքի տակ վերցված ցանկացած քաղաքացու համար պայքարելու ենք, լինի դա Մանվել Փարամազյանը, թե մեկ ուրիշը»,- մեզ հետ զրույցում ասաց Հակոբյանը:

Աղբյուր` Փաստինֆո