Փաստ ինֆո

Ադրբեջանի կողմից սանձազերծված Արցախյան երրորդ՝ 44-օրյա պատերազմի հետևանքով Արցախից տեղահանված արցախցիները բողոքի ակցիա են իրականացրել ՀՀ-ում՝ ՄԱԿ-ի գրասենյակի շենքի դիմաց։ «Հանուն Հադրութի» ՀԿ նախագահ Լևոն Հայրիյանը լրագրողների հետ զրույցում հայտնեց, որ իրենց ընդունել է ՄԱԿ-ի գրասենյակի գլխավոր հանձնակատարի պաշտոնակատար Մանե Թադևոսյանը, զրույցը կառուցողական էր, սակայն իրենց կողմից բարձրացվող հիմնական պահանջը ՄԱԿ-ի գործառույթների մեջ չի մտնում։

«Ուր գնա Թահերը, ասում են՝ երկինք, երկնքում բարի են, իսկ եթե երկնքում բարի չեն՝ ու՞ր գնա Թահերը։ Հիմա մենք եկել ենք այստեղ ոչ թե այն պատճառով, որ չգիտենք, որ ՄԱԿ-ը չի կարող մեզ փախստականի կարգավիճակ տալ, այլ՝ որովհետև այն պատճառով, որ համատարած Հայաստանի պետական իշխանության, պետական մարմինների կողմից անուշադրության ենք մատնվում։ Երեք օր կառավարության շենքի մոտ հավաքվել ենք, մեկը լայաղ չարեց՝ ինչու եք այստեղ, ինչ եք ուզում»,- նշեց Հայրիյանը՝ հիշեցնելով, որ Նիկոլ Փաշինյանը ՄԱԿ-ի պաշտոնավարտ հանձնակատարի հետ հանդիպմանն ասել է՝ ափսոս, որ Արցախի փախստականներին չեն կարողանում օգնել. «Հստակ փախստական է ասել, ոչ թե՝ տեղահանված։ Ինչպես է ստացվում, որ ՄԱԿ-ի հանձնակատարին կարողանում են ասել Արցախի փախստական, բայց մեզ ասում է՝ դուք փախստական չեք։ Նույնն էլ՝ Արարատ Միրզոյանն է, որը Ֆրանսիայում խոսում է Արցախից փախստականների մասին, բայց այստեղ մեզ չի ուզում ընդունել»։

Հայրիյանը նաև տեղեկացրեց, որ կառավարությունն առանց հայտնելու, թաքուն ՄԱԿ-ից օգնություն է վերցնում, ստացված գումարը 68.000 դրամ սոցիալական աջակցության տեսքով տրամադրում արցախցիներին՝ ներկայացնելով, թե գումարն իրենք են տալիս։

Աղբյուր` Փաստինֆո