Փաստ ինֆո

ՀՀ բարձրագույն դատարան խորհուրդը՝ Սերգեյ Չիչոյանի նախագահությամբ, հեռացել է խորհրդակցական սենյակ՝ Երևանի ընդհանուր իրավասության դատարանի դատավոր Վարդան Գրիգորյանին կարգապահական պատասխանատվության ենթարկելու միջնորդության վերաբերյալ որոշում կայացնելու։

«Փաստինֆո»-ի թղթակցի հաղորդմամբ՝ մինչ Խորհուրդը կանցներ միջնորդության բուն քննությանը՝ ԲԴԽ անդամ Դավիթ Խաչատուրյանը բարձրաձայնեց ինքնաբացարկի հիմքերի մասին։ Մասնավորապես, ինչպես արդեն հայտնի է դատավոր Վարդան Գրիգորյանի վարույթում է գտնվում «Դատապարտյալների հիվանդանոց» ՔԿՀ պետ Արտակ Սարգսյանի վերաբերյալ քրեական գործը, որը Դավիթ Խաչատուրյանի ազգականն է՝ հորաքրոջ թոռը։ Այս հանգամանքով պայմանավորված՝ Խաչատուրյանն ինքնաբացարկի միջնորդություն ներկայացրեց՝ նշելով, որ, թեև բարեկամական հարազատության աստիճանն այնքան էլ մոտիկ չի թվում, բայց տեսանելի անաչառության կանոնները պահպանելու համար խնդրում է բավարարել միջնորդությունը։ ՀՀ արդարադատության նախարարության ներկայացուցիչները դիրքորոշում չհայտնեցին՝ թողնելով Խորհրդի հայեցողությանը, դատավոր Վարդան Գրիգորյանն էլ նշեց՝ առաջին անգամ Խաչատուրյանից է լսում, որ վերջինիս ազգականի վերաբերյալ գործն իր վարույթում է գտնվում, այնուամենայնիվ վստահեցնում է, որ բոլոր գործերով ինքը ձգտում է օբյեկտիվ լինել, իր համար տարբերություն չկա։ ԲԴԽ-ն խորհրդակցական սենյակում որոշեց բավարարել Խաչատուրյանի՝ ինքնաբացարկի միջնորդությունը, ինչից հետո անցավ Գրիգորյանին կարգապահական պատասխանատվության ենթարկելու մասին միջնորդության բուն քննությանը։

ՀՀ ԱՆ ՎԾ վարչության պետ Հայկ Սանոյանը ներկայացրեց միջնորդությունը, համաձայն որի՝ դատավորի նկատմամբ կարգապահական վարույթը հարուցվել է գլխավոր դատախազի կողմից ներկայացված հաղորդումը։ Ըստ նախարարության՝ դատավորի կողմից իբրև թույլ է տրվել դատավարական իրավունքի նորմերի խախտումներ, մասնավորապես, դատավորը քրեական գործով բավարարել է անձի նկատմամբ որպես խափանման միջոց կալանավորումը գրավով փոխարինելու մասին պաշտպանների միջնորդությունը՝ գրավի չափ սահմանելով 1.5 մլն ՀՀ դրամը, նախարարության ներկայացուցչի պնդմամբ՝ դատարանի որոշումը պատճառաբանված չէ։

«Դատարանը գրավի թույլատրելիության հարցը լուծելիս որոշման պատճառաբանական մասում ընդհանրապես չի անդրադարձել և գնահատման չի ենթարկել ամբաստանյալի կողմից վարույթն իրականացնող մարմնից թաքնվելու հիմքին այն պայմաններում, երբ տվյալ քրեական գործով նախկինում ամբաստանյալի նկատմամբ քննությունից թաքնվելու հիմքով հայտարարված է եղել հետախուզում»,- նշեց Սանոյանը։

Դատարանը որպես նոր հանգամանք է մատնանշել ամբաստանյալի վատառողջ լինելը, ունի բուժման կարիք, խնամքին է գտնվում մանկահասակ երեխա։ Դատարանը գտել է, որ ամբաստանյալի կողմից խափանման միջոցի պայմանը խախտելը կարող է հանգեցնել գրավը պետության եկամուտ դարձնելուն, իսկ տվյալ պարագայում հաշվի առնելով ամբաստանյալի ընտանեկան դրությունը, դատարանը գտել է, որ գումարի կորստի մտավախությունը բավարար երաշխիք կարող է հանդիսանալ ամբաստանյալի պատշաճ վարքագիծն ապահովելու համար։ Խնդիրն այն է, որ ամբաստանյալի նկատմամբ գրավի կիրառումից հետո վերջինս թաքնվել է գործի քննությունից, հայտարարվել է հետախուզում, վերջինս բերման է ենթարկվել և ներկայացվել վարույթն իրականացնող մարմնին։ Այժմ գործով դատաքննությունը շարունակվում է։

Անդրադառնալով միջնորդությանը՝ ԲԴԽ անդամներից Մեսրոպ Մակյանն արձանագրեց, որ տպավորություն է, որ գնահատողական դաշտ են մտել՝ դատավորի ներքին համոզմունքի, փաստերը յուրովի գնահատելու հետ կապված, ապա հարց ուղղեց՝ արդյոք սա կարելի է դիտարկել որպես դատավարական օրենքի ակնհայտ կոպիտ խախտում, ինչին ի պատասխան ԱՆ ներկայացուցիչ Հայկ Սանոյանը նշեց, թե դա ոչ թե գնահատման դաշտի տիրույթում է, այլ՝ դատավարության օրենսգրքով սահմանված պահանջների խախտում։ Դատավոր Վարդան Գրիգորյանը եզրափակիչ խոսքում նշեց, որ որևէ հանգամանքով երբևէ կաշկանդված չի լինում, փորձում է առավելագույնս օբյեկտիվ քննություն իրականացնել, սակայն խնդրում է հաշվի առնել, որ այս գործով քննությունը դեռևս պետք է շարունակվի և եթե այն երկար տևի, ապա կարող է կրկին քննարկվել խափանման միջոցի փոփոխման հարցը, հետևաբար, կողմերը նայելու են նաև ԲԴԽ կայացված որոշմանը և ենթադրություններ կատարելու՝ իր վարքագծի վերաբերյալ։

Լսելով կողմերին՝ ԲԴԽ-ն հեռացել է խորհրդակցական սենյակ՝ որոշում կայացնելու։ Դատարանի որոշումը կհրապարակվի հուլիսի 18-ին։

Հեղինակ՝ Իզաբել Սահակյան

Աղբյուր` Փաստինֆո