Փաստ ինֆո

ԲԴԽ նախկին նախագահ Ռուբեն Վարդազարյանը պնդել է, որ 2020 թվականի նոյեմբերի 15-ի իր հայտարարությունը քաղաքական բաղադրիչ չի ունեցել։

«Երբ տեսախցիկներն անջատվում էին, ասում էի՝ եկեք միտք առ միտք, պարբերություն առ պարբերություն, բառ առ բառ կարդանք, պատրաստ եմ բացատրությունը տալ կամ դուք ինձ ապացուցեք, որ այստեղ քաղաքական ուղղվածություն կար։ Իհարկե, բոլորը խուսափում էին, որովհետև ակնհայտ է, որ որևէ քաղաքական տեքստ չեմ ասել»։ Այս մասին «Փաստինֆո»-ի եթերում ասել է ԲԴԽ նախկին նախագահ Ռուբեն Վարդազարյանը՝ անդրադառնալով դատավորներին ուղղված իր աղմկահարույց հայտարարությանը։

Հիշեցնենք, որ 2020թ նոյեմբերի 9-ի կապիտուլյացիոն ակտի ստորագրումից հետո հարուցվեցին մի շարք գործեր,որոնք օգտագործվեցին քաղաքական ընդդիմախոսներին լռեցնելու, մեկուսացնելու համար։ Ներքաղաքական լարված իրավիճակում՝ նոյեմբերի 15-ին, ԲԴԽ այն ժամանակվա նախագահ Ռուբեն Վարդազարյանը հայտարարությամբ հանդես եկավ՝ դիմելով դատավորներին։

Նա, մասնավորապես, արձանագրել էր, որ թուրք-ադրբեջանական տեռորիստական պատերազմի հետևանքով ձևավորված նոր իրողությունը գոյաբանական լուրջ մարտահրավերներ է նետել, որպիսիք հաղթահարելու համար մեզ անհրաժեշտ է բացառիկ խոհեմություն և պետականության ընդգծված զգացողություն: Օրհասական և պատմական պահն է հասունացել՝ գործնականում ի ցույց դնելու մեր` արդարադատություն իրականացնողներիս բարձր պրոֆեսիոնալիզմը, նվիրումը մեր հայրենիքին` իրավունքի գերակայության և օրենքի իշխանության պահապանի բարձր դերակատարությունը ապահովելու ճանապարհով: Հայրենիքին նվիրումը և մեր առաքելությանը հավատարիմ մնալը ապացուցվելու է այս օրերին, և մենք ենք պատասխանելու այն հարցին, թե ունենք արդյո՞ք անկախ դատական իշխանություն մեր երկրում, թե ոչ:

«Դատավորի բարձր արժանապատվությունը և պատիվը զուտ բառե՞ր են, թե՞ մեր գործունեության հիմնաքարը: Այսօր է, թերևս, առարկայական ու վերջնական տրվելու շուրջ երկու տարի ողջ հանրությանը ալեկոծած և դատավորներիս համար ամոթալի չարաբաստիկ հարցի պատասխանը. մենք պատերի տակ վնգստացող դատավորնե՞ր ենք, թե՞ հայրենիքին նվիրված ազնիվ պրոֆեսիոնալներ:

Ավելորդ չեմ համարում հիշեցնել, որ դատավորի բարձր պաշտոնը ստանձնելիս յուրաքանչյուրս Հայաստանի Հանրապետության ժողովրդի առջև երդվել ենք դատավորի պարտականությունները կատարել Հայաստանի Հանրապետության Սահմանադրությանն ու օրենքներին համապատասխան՝ ապահովելով իրավունքի գերակայությունը և բարձր պահելով դատական իշխանության հեղինակությունը:

Ես, որպես Բարձրագույն դատական խորհրդի նախագահ, երդվել եմ նաև իմ պարտականությունները կատարել Հայաստանի Հանրապետության Սահմանադրությանն ու օրենքներին համապատասխան՝ ապահովելով իրավունքի գերակայությունը, երաշխավորելով դատարանների և դատավորների անկախությունը: Ուստի կոչ եմ անում իմ բոլոր գործընկերներին. 1) ձեր առաքելությունն իրականացնելիս առաջնորդվել բացառապես սահմանադրությամբ և օրենքներով, արդարադատությունն իրականացնել ձեր իրավասության բարձր գիտակցությամբ և դատական իշխանության հեղինակության մասին մտահոգ լինելով, 2) հավատարիմ մնալ ժողովրդի առջև ձեր տված երդմանը և զերծ մնալ բոլոր տեսակի քաղաքական ճնշումներից և ազդեցություններից, 3) որևէ մեկը թե՛ իշխանական, թե՛ ընդդիմադիր, թե՛ քաղաքական, թե՛ քաղաքացիական հասարակության որևէ օղակից չի կարող միջամտել կամ ներգործել ձեր իրավասությունների դաշտ: Ցանկացած նման միջամտություն կհանդիպի անձամբ իմ կոշտ դիմադրությանը, և նման դեպքերը կդառնան քննության առարկա քրեադատավարական կանոններով»,- հայտարարել էր Վարդազարյանը, ինչից հետո Վարդազարյանի նկատմամբ ճնշումների տարափ սկսվեց, իշխանականները պնդում էին, թե հայտարարությունը քաղաքական է, սկսվեց Վարդազարյանի նկատմամբ քրեական հետապնդման գործընթաց, կասեցվեցին լիազորությունները, հունիսի 23-ին՝ դադարեցվեց։

Ռուբեն Վարդազարյանը «Փաստինֆո»-ի տաղավարում նշեց, որ իշխանությանը մոտ կանգնած մարդիկ նշել են, թե տեքստը քաղաքականացվում է՝ ժամանակահատվածի հիշատակմամբ՝ «վրա է հասել օրհասական պահը», մինչդեռ, Վարդազարյանը նշեց, որ պահն իսկապես օրհասական էր, որովհետև իշխանության քարոզիչները ցնծում էին ուրախությունից, որ ամբողջ ընդդիմությունը ձերբակալվում է և ներկայացվում են կալանքի, ընդդիմությունը փողոցներում էին, դատարանի դիմաց ամբոխ էր կանգնած, քաղհասարակության ներկայացուցիչները եթերով ինչ միտք ասես հնչեցնում էին։

«Իմ կոչը հետևյալն էր, որ այսօր այն օրն է, որ պետք է առավելապես քաղաքականությունից զերծ մնալ, չի կարելի տրվել էմոցիաներին և քաղաքական ճնշումներին, ղեկավարվել բացառապես օրենքով »,- ասաց Վարդազարյանը՝ հավելելով, որ քրեական գործերի ընթացքը հետագայում ցույց տվեց, որ դատավորները ճիշտ էին, բոլոր քրեական գործերը կարճվել են, տասնյակ քրեական գործերից մեկն է մնացել։

Աղբյուր` Փաստինֆո