Փաստ ինֆո

ՔՊ-ական Անդրանիկ Քոչարյանի «հրահանգից» հետո «Դիմադրության» շարժման կողմնակիցներին շարունակվում են առաջիկա եռամսյա հավաքներին մասնակցելու ծանուցումներ ուղարկվել:

Վանաձորի ավագանու «Հայրենիք» խմբակցության ղեկավար Վահե Դոխոյանը, որն ակտիվորեն մասնակցում էր «Դիմադրության» շարժման ակցիաներին, նույնպես բացառություն չէ:

Նշենք, որ ՔՊ խմբակցության պատգամավոր Վահագն Ալեքսանյանն այսօր ԱԺ-ում հայտարարեց, թե Վանաձորի ավագանու նիստն այսօր դարձյալ չի կայացել, քանի որ ընդդիմադիր «Ասլանյան» դաշինքի ու «Հայրենիք» կուսակցության ներկայացուցիչները բոյկոտել են այն:

Մեզ հետ զրույցում «Հայրենիք» խմբակցության ղեկավար Վահե Դոխոյանը պարզաբանեց՝ ունեցել են քաղաքական որոշում՝ չմասնակցել ՔՊ-ի հրավիրած նիստերին, բացի այդ՝ ինքը անգամ ցանկության դեպքում չէր կարող, քանի որ եռամսյա հավաքներին մասնակցելու ծանուցում է ստացել և նույն ժամին ինքը ՊՆ կենտրոնական ռազմաբժշկական հանձնաժողով պետք է ներկայանար.

«Ավագանու նիստի նույն ժամին ես անցնում էի գենկոմիսիա, որ օգոստոսի մեկին գնամ ծառայության, ինձ եռամսյա հավաքին մասնակցելու ծանուցում է եկել, ինչպես Անդրանիկ Քոչարյանը խոստացել էր։ Բացի այն, որ ունեինք հստակ դիրքորոշում, ես նաեւ ֆիզիկապես չէի էի կարող մասնակցել նիստին»,-ասաց Դոխոյանը և նշեց, որ իր տեղեկություններով՝ Վանաձորի ընդդիմադիրներից ոմանց նույնպես ծանուցում է ուղարկվել:

Մեզ հետ զրույցում Վահե Դոխոյանը նշեց, որ սա ՔՊ-ի նախաձեռնած երկրորդ ավագանու նիստն է, որին ընդդիմությունը չի ներկայանում, քանի որ ՔՊ-ն էլ հրաժարվում է մասնակցել ընդդիմության նախաձեռնած արտահերթ նիստերին՝ քննարկելու իրենց բարձրացրած հարցերը։

«Երբ 6 ամիս ՔՊ-ականների պատճառով նիստ չէր լինում, ինչ-որ մեկը հիշե՞ց, քննադատե՞ց դա, ուղիղ 6 ամիս իրենց պատճառով Վանաձորում ավագանին նիստը չի կարողացել անի ու այսօր էլ, որ չենք կարողացել նիստ գումարել կրկին ՔՊ-ականների պատճառով է, որովհետև մենք պարզ մի բան ենք ասում, այն է՝ պետք է ընտրվի քաղաքապետ և համայնքը ձևավորված համարվի։ Մենք ո՞նց բյուջե հաստատենք, երբ, օրինակ, բնակավայրերի ղեկավարներ չկան, եթե 6 օրը մեկ արտահերթ նիստ անեն՝ նույն օրակարգով, միեւնույն է, դրանով մեր դիրքորոշումը չի փոխվելու։ Ընդ որում, անցած նիստի նույն օրակարգն այսօր նորից դրել են օրակարգում, իսկ մեր առաջարկությունները, դիրքորոշումը, մեր կողմից բարձրացված խնդիրները ինչո՞ւ չեն քննարկվում։ Այսինքն, փաստացի, մեծամասնության ձայնն արհամարհվում է, բայց մենք պետք է գնանք խայծն ուտելո՞ւ, շատ կներեք, եթե այդքան ուզում են համայնքում խնդիրները լուծվեն, թող թույլ տան համայնքապետ ընտրել»,- արձանագրեց մեր զրուցակիցը:

«Փաստինֆո»-ի հարցին ի պատասխան՝ Վահե Դոխոյանը չբացառեց, որ ՔՊ-ն ավագանու նիստերը տապալում է՝ Վանաձորում արտահերթ նոր ընտրություններ անցկացնելու նպատակով.

«ՔՊ-ի պարագայում ամեն ինչ հնարավոր է , ոչինչ չի բացառվում»,-եզրափակեց զրուցակիցը:

Հիշեցնենք, որ վարչական դատարանը արգելանք էր սահմանել, որով Վանաձորի ավագանին իրավունք չունի համայնքի ղեկավարի ընտրության օրակարգով նիստ գումարել:ԼՀԿ-ն ,որը դեկտեմբերի 5-ի ՏԻՄ ընտրությունների արդյունքներով Վանաձորում ստացել էր ընտրողների ձայների 3,97 տոկոսը և զբաղեցրել 6-րդ տեղը, աջակցելով ՔՊ-ին, դիմել էր Վարչական դատարան, որպեսզի անվավեր ճանաչվեն Վանաձորի համայնքապետի ընտրությունները, սակայն դատարանը մերժեց ԼՀԿ-ի հայցը։ ԼՀԿ-ն նաև առանձին միջնորդություն էր ներկայացրել Վարչական դատարան՝ պահանջելով պարտավորեցնել Վանաձոր համայնքի ավագանուն ձեռնպահ մնալ Վանաձոր միավորված համայնքի ղեկավար ընտրելուն ուղղված գործողություններից, այն է՝ համայնքի ղեկավար ընտրելու օրակարգով նիստ անցկացնելուց և ղեկավար ընտրելուց, ինչը բավարարվել էր։

Թեև դատարանն անփոփոխ է թողել Վանաձորի ՏԻՄ ընտրության արդյունքներն ամրագրող որոշումը, սակայն ավագանին նիստ չի կարողանում անել, քանի որ չի վերացվել նիստ հրավիրելն արգելող դատարանի որոշումը։Այս ամենի հետևանքով՝ Վանաձորում քաոսային իրավիճակ է ստեղծվել, փաստացի, համայնքը տևական ժամանակ ոչ ղեկավար ուներ, քանի որ համայնքապետ Մամիկոն Ասլանյանը, որը դեկտեմբերի 5-ի ՏԻՄ ընտրություններով համայնքի ղեկավար էր ընտրվել, կալանավորված է, ոչ էլ ավագանին էր կարողանում իր աշխատանքը կատարել:

Իշխող ՔՊ խմբակցությունը, իբրև խնդրի լուծում, արտահերթ նիստով փոփոխություններ կատարեց ՏԻՄ մասին օրենքով, որով վարչապետին համայնքապետի ԺՊ նշանակելու լիազորություն տրվեց, ինչից հետո Նիկոլ Փաշինյանի որոշմամբ՝Արկադի Փելեշյանը նշանակվեց Վանաձորի համայնքապետի պաշտոնակատար:

Մեզ հետ զրույցում Վահե Դոխոյանն ավելի վաղ հայտնել էր, որ Վարչական դատարանը հուլիսի 20-ին Վանաձորի ավագանու նիստ գումարելու արգելքի վերաբերյալ որոշում կկայացնի:

Աղբյուր` Փաստինֆո