Փաստ ինֆո

ՀՀ ԶՈՒ ԳՇ պետ Յուրի Խաչատուրովի որդին՝ Իգոր Խաչատուրովը, քրեակատարողական հիմնարկում կրում է Արցախի դրոշով շապիկ։ Այդ մասին լրագրողներին հայտնել է ՀՀ ԱԺ պատգամավոր Արամ Վարդեւանյանը՝ նշելով, որ նախօրեին նրա ծննդյան օրն էր, եւ ինքն այցելել է նրան՝ ՔԿՀ-ում։

«Ոչ միայն տրամադրությունն ու պայքարի վճռականությունն էր բարձր, այլեւ Արցախի դրոշով շապիկ էր կրում»,- ասել է նա։

Ինչպես արդեն տեղեկացրել ենք՝ ընդդիմադիր ուժերն այսօր ակցիա են իրականացրել Հայաստանում ԵՄ ներկայացուցչության մոտ՝ բողոքելով եվրոպական արժեքների նկատմամբ ԵՄ-ի դեսպանի կողմից դրսեւորվող երկակի ստանդարտների, Հայաստանում իրականացվող քաղաքական հետապնդումների, հալածանքների, իշխանությունների կողմից հաստատվող բռնապետական ռեժիմի նկատմամբ հանդուրժողական վերաբերմունքի դեմ։
Ա. Վարդեւանյանի փոխանցմամբ՝ այս պահին քաղաքական հայացքների համար կալանավորված անձանց թիվը 23-24 է, մյուսներն այս օրերին ազատ են արձակվել։ Հիշեցնենք, որ ավելի վաղ հաղորդվել էր մոտ 50 քաղբանտարկյալի մասին։
Փողոցային պայքարի ձեւաչափում փոփոխություններ մտցնելուց հետո՝ որոշակի փոփոխություններ են նկատվում նաեւ ընդդիմադիր դաշտում։ Այսօր արդեն պաշտոնապես հաստատվեց «Հայաստան» խմբակցության պատգամավոր Արթուր Ղազինյանի կողմից մանդատը վայր դնելու տեղեկատվությունը։ Այդ մասին հայտարարությամբ է հանդես եկել ինքը՝ Ղազինյանը։ Լրագրողների հետ զրույցում մեկնաբանելով Ղազինյանը քայլը՝ Ա. Վարդեւանյանը նշել է, թե այն առավելապես մարտավարական իմաստ ունի։

«Ես այդ գրառումը չեմ կարդացել, որ մեկնաբանեմ։ Այնուամենայնիվ նա իմ գործընկերն է, ընկերն է։ Ինքը երեւի թե առաջիկայում կմանրամասնի, միայն կարող եմ ասել, որ ինքս տեղեկացված եմ եղել, խոսել եմ հետը։ Սա ավելի շատ մարտավարական իմաստ ունի եւ Ա.Ղազինյանը ավելի լավ կմանրամասնի»,- շարունակեց բանախոսը։
Ա. Վարդեւանյանը պնդել է, որ «Դիմադրություն» շարժումը, փողոցային պայքարն այլընտրանք չունի։ Եվ ոչ միայն։ Կան նաեւ պայքարի այլ ձեւեր, որ տեսանելի չեն, բայց շուտով արդյունքը զգալի կլինի։ Այսինքն՝ ճանապարհային քարտեզն էլ է առկա։

Մանրամասները՝ տեսանյութում։

Աղբյուր` Փաստինֆո