Փաստ ինֆո

ՀՅԴ անդամ Գերասիմ Վարդանյանի կալանավորման ժամկետը երկարացնելու որոշման դեմ բողոքի քննությունը Վերաքննիչ քրեական դատարանում՝ դատավոր Լուսինե Հովհաննիսյանի նախագահությամբ, նախատեսված էր  այսօր, սակայն այն այդպես էլ տեղի չի ունեցել։  Փաստաբան Բենիկ Գալստյանը լրագրողների հետ զրույցում հայտնեց, որ շուրջ 45 րոպե գտնվել է դատական նիստերի դահլիճում, սակայն իրեն տեղեկացրել են, որ դատարանը մեկ այլ գործով խորհրդակցական սենյակում է և տեղեկություն չունեն՝ երբ է վերադառնալու, միևնույն ժամանակ, տեղեկացրել են, որ դատախազը միջնորդել էր հետաձգել դատական նիստը։

«Ըստ էության՝ նիստը չկայացավ, ես ուղղակի 45 րոպե սպասեցի»,-նշեց Գալստյանը։

Հատկանշական է, որ այսօր պետք է կայանար Վարդանյանի կալանավորման ժամկետը երկարացնելու որոշման դեմ բողոքը, իսկ Վարդանյանին կալանավորելու որոշման դեմ բուն բողոքի քննությունը՝ Ռուբիկ Մխիթարյանի նախագահությամբ, դեռևս տեղի չի ունեցել։ Մինչդեռ  Գերասիմ Վարդանյանի գործն ուղարկվել է դատարան, այսինքն, մինչև հուլիսի 12-ը՝ պետք է արդեն դատարանում քննվի խափանման միջոցի հարցը։

«Փաստը մնում է փաստ, որ անձը 50 օրից ավել է, ինչ գտնվում է կալանքի տակ, ըստ էության, մեղմ ասած, սահմանափակվել է վերջինիս արդյունավետ պաշտպանության իրավունքը։ Յուրաքանչյուր անձ, որը քրեական հետապնդման է ենթարկվում, գտնվում է անազատության մեջ, իրավունք ունի բողոքարկելու այդ անազատության վերցնելու որոշումը և իրավունք ունի լսված լինելու։ Փաստացի այդ իրավունքը հասցվել է զրոյական մակարդակի»,- նշեց Գալստյանը։

Աղբյուր` Փաստինֆո