Փաստ ինֆո

Ընդդիմադիրներին մանդատներից զրկելու հարցը քննարկման փուլում է, պայմանավորված հետագա զարգացումներով ու ընդդիմադիր պատգամավորների պահվածքով՝ մենք կկայացնենք որոշումներ: Այս մասին ԱԺ-ում լրագրողների հետ զրույցում հայտարարել է ՔՊ խմբակցության քարտուղար:

Նշենք, որ քիչ առաջ ՔՊ-ն ԱԺ փոխնախագահ Իշխան Սաղաթելյանին և Տնտեսական հանձնաժողովի նախագահ Վահե Հակոբյանին պաշտոնանկ արեց:
Լրագրողների հետ զրույցում Արթուր Հովհաննիսյանը չբացառեց, որ Իշխան Սաղաթելյանին և Վահե Հակոբյանին պաշտոններից հեռացնելուց հետո այդ պաշտոնները թափուր մնան, ըստ ՔՊ խմբակցության քարտուղարի, սրանով խորհրդարանում լեգիտիմության խնդիր չի առաջանա.

«Լեգիտիմության խնդիր չկա, ԱԺ-ն լեգիտիմ է, ՀՀ քաղաքացին արտահայտել է իր կամքը: Խորհրդարանի ձևավորման փուլում է անհրաժեշտ, որ բոլոր պաշտոնները լրացվեն, հետագայում նման խնդիր չի առաջանում: Այսինքն ընդդիմադիրները կարող են առաջադրել թեկնածուներ այս երկու պաշտոնի համար, իսկ ՔՊ-ն ունի իրավունք ընտրելու կամ չընտրելու»:

Արթուր Հովհաննիսյանը հայտարարեց, թե ՔՊ-ի՝ Իշխան Սաղաթելյանին և Վահե Հակոբյանին պաշտոնանկ անելու որոշման համար հիմք է հանդիսացել այն, որ պատգամավորները «սանձարձակությունների են դիմում եւ լկտի պահվածք են դրսևորում»:

Հարցին՝ ընդդիմադիրները կարող են այս որոշումը բողոքարկել ՍԴ-ում, Արթուր Հովյաննիսյանն ասաց՝ կարող են, սակայն որևէ արդյունքի չեն հասնի, քանի  որ հարցը բացառապես ԱԺ ներքին կանոնակարգման հարց է:

Արթուր Հովհաննիսյանը նաև հայտնեց, որ խմբակցությունը քննարկում է ԱԺ հանձնաժողովների մյուս երկու ընդդիմադիր նախագահներին՝ Թագուհի Թովմասյանին և Արմեն Գևորգյանին պաշտոններից հեռացնելու մասին հարցը, սակայն դեռ որոշում չկա: Նա հերքեց մամուլի տեղեկությունները, թե ՔՊ-ում որոշ պատգամավորներ պաշտպանել են Արմեն Գևորգյանի շահերը:

Հարցին, թե ի՞նչ է լինելու, եթե ընդդիմությունը այդ պաշտոններում նոր թեկնածուներ չառաջադրի, նա պատասխանեց, որ, ըստ ԱԺ կանոնակարգ օրենքի, այդ պաշտոններն անցնում են քաղաքական մեծամասնությանը.

«Բայց ես կարող եմ նախնական ասել, որ մենք չենք պատրաստվում այդ պաշտոնները լրացնել»,-ասաց Հովհաննիսյանը:

Աղբյուր` Փաստինֆո