Փաստ ինֆո

«Փաստինֆո»-ի տեղեկություններով՝ ԲԴԽ նախագահի ընտրությունը տեղի կունենա մյուս շաբաթվա ընթացքում, ամենայն հավանականությամբ՝ երկուշաբթի՝ հուլիսի 4-ին։

Հիշեցնենք, որ հունիսի 23-ին ԲԴԽ-ն դադարեցրեց Ռուբեն Վարդազարյանի լիազորությունները՝ որպես կարգապահական տույժ, իսկ վարույթը հարուցվել էր Գրիգոր Բեքմեզյանի, Լիպարիտ Մելիքջանյանի, Դավիթ Խաչատուրյանի նախաձեռնությամբ՝ որպես հիմք մատնանշելով լրատվականներից մեկում հրապարակված հարցազրույցը, որտեղ Վարդազարյանն անդրադարձել է ՍԴ որոշմանը՝ Գագիկ Ջհանգիրյանի՝ ԲԴԽ անդամ ընտրվելու դիմումի վերաբերյալ։ Ռ. Վարդազարյանին կարգապահական պատասխանատվության ենթարկելու միջնորդությունը քննարկվել է առանց Ռ. Վարդազարյան ու նրա փաստաբանի ներկայության՝ խախտելով նրանց՝ լսելի լինելու իրավունքը։

Հունիսի 20-ին հրավիրած ասուլիսում Ռ.Վարդազարյանը աղմկահարույց ձայնագրություն է հրապարակել, որի համաձայն՝ Վարդազարյանին վարչապետի անունից առաջարկվել է հրաժարական տալ, իսկ Ջհանգիրյանն էլ ստանձնել է միջնորդի դեր՝ երաշխավորելով, որ նրա նկատմամբ հետապնդումներ չեն իրականացվի, եթե հրաժարական ներկայացնի։ Ջհանգիրյանը հանրայինի եթերում՝ խոստովանել է, որ բանակցություններ վարել է Վարդազարյանի հետ՝ հրաժարական տալու համար։ Ավելին, հայտարարել է, ԲԴԽ նախագահին հրաժարական պարտադրելն այնքան էլ հեշտ գործ չէ ու ինքը նրա նկատմամբ հոգեբանական հնարքներ է կիրառել, «կուտ» տվել։

Աղմկահարույց ձայնագրության հրապարակումից և առավել անհասկանալի մեղայական-հարցազրույցից երկու օր անց հայտարարվեց, թե Գագիկ Ջհանգիրյանի առողջական վիճակը կտրուկ վատթարացել է, ինչից հետո Ջհանգիրյանը տեղափոխվել է հիվանդանոց և ենթարկվել վիրահատության։ Ակնառու էր, որ Ջհանգիրյանը առողջական խնդիրների քողի ներքո պատրաստվում է հրաժարական տալ, իսկ այսօր արդեն պաշտոնապես հաստատվեց՝ Ջհանգիրյանը հրաժարականի դիմում է ներկայացրել։ Ընդ որում՝ Ջհանգիրյանի հնարավոր հրաժարականի մասին հունիսի 20-ի ասուլիսում ակնարկել էր նաեւ Վարդազարյանը՝ նշելով, որ խնդիր է դրվել ոչ միայն իր լիազորությունները դադարեցնել, այլ նաեւ Ջհանգիրյանը կհեռանա ԲԴԽ-ից, քանի որ իշխանություններն, ըստ տեղեկությունների, ԲԴԽ նախագահի պաշտոնում ուզում են տեսնել Արթուր Դավթյանին, ում լիազորությունները գլխավոր դատախազի պաշտոնում լրանում է սեպտեմբերին։

«Փաստինֆո»-ի տեղեկություններով՝ այս փոխատեղմանը մեղմ ասած կողմնակից չի եղել Ջհանգիրյանը, եւ իրադարձություններն այլ կերպ զարգացան ու ԲԴԽ նախագահի ընտրությունը կկայանա՝ նախքան Արթուր Դավթյանի լիազորությունների ավարտը։

Նշենք, որ ըստ օրենքով սահմանված կարգով նախատեսված հաջորդականության՝ այժմ ԲԴԽ նախագահ պետք է ընտրվի Խորհրդի գիտնական անդամներից մեկը՝ ձայների բացարձակ մեծամասնությամբ, այսինքն՝ պետք է քննարկվի ԲԴԽ անդամներ Գրիգոր Բեքմեզյանի, Դավիթ Խաչատուրյանի, Վիգեն Քոչարյանի թեկնածությունը։

Ինչպես արդեն հայտնել ենք՝ ԲԴԽ արդեն նախկին նախագահ Ռուբեն Վարդազարյանի լիազորությունները դադարեցվել են Խորհրդի երեք գիտնական անդամների՝ Գ. Բեքմեզյանի, Դ. Խաչատուրյանի, Լ. Մելիքջանյանի կողմից հարուցված կարգապահական վարույթի հիման վրա, որոնք էլ մատուցած ծառայության դիմաց կստանան իրենց խրախուսումը։ Լիպարիտ Մելիքջանյանն արդեն իսկ ստացել է խրախուսանքը՝ ընտրվելով Վճռաբեկ դատարանի դատավոր, չի բացառվում, որ առաջիկայում կնշանակվի նաև Վճռաբեկ դատարանի Հակակոռուպցիոն քաղաքացիական պալատի նախագահ, հետևաբար, հիմնական պայքարը կլինի Բեքմեզյանի և Խաչատուրյանի միջև։ Հատկանշական է, որ Դավիթ Խաչատուրյանը Հակակոռուպցիոն կոմիտեի նախագահ Սասուն Խաչատրյանի հարազատ եղբայրն է, ինչը կարող է ի վնաս իրեն աշխատել, քանի որ նախ՝ իշխանությունները չեն ցանկանա ավելի ուժեղացնել Խաչատրյան եղբայրների դիրքերը, երկրորդ՝ առերևույթ է կառույցների միջև հնարավոր շահերի բախումը, հետևաբար, ԲԴԽ նախագահի պաշտոնում ընտրվելու համար մեծ են Գրիգոր Բեքմեզյանի շանսերը, թեեւ Ջհանգիրյանը որպես իր հետնորդ նշանակել է Խաչատուրյանին։

Դատական օրենսգիրք սահմանադրական օրենքի համաձայն՝ ԲԴԽ նախագահի հրաժարականից հետո 10-օրյա ժամկետում ԲԴԽ-ն փակ քվեարկությամբ ընտրում է նախագահ՝ ձայների մեծամասնությամբ, եթե առաջին քվեարկությամբ նախագահ ընտրել չի հաջողվում, լրացուցիչ քվեարկություն է իրականացվում, որին մասնակցում են առավել ձայներ ստացած երկու թեկնածուները: Եթե ձայների հավասարության պատճառով հնարավոր չէ որոշել առավել ձայներ ստացած երկու թեկնածուներին, ապա նախապատվությունը տրվում է մասնագիտական աշխատանքի առավել երկար փորձառություն ունեցող թեկնածուին, իսկ փորձառության հավասարության դեպքում՝ տարիքով ավագին:

Հեղինակ՝ Իզաբել Սահակյան

Աղբյուր` Փաստինֆո