Փաստ ինֆո

Աղվան Հովսեփյանն իր փաստաբանական թիմին արգելել է բարձրաձայնել առողջական վիճակի վերաբերյալ որևէ տեղեկատվություն, պարզապես հիմա այնպիսի իրավիճակ էր ստեղծվել, որ պարոն Հովսեփյանի արգելքներին ուշադրություն դարձնելն անթույլատրելի էր։ Այս մասին դատարանում հայտարարել է Ա. Հովսեփյանի փաստաբանական թիմի անդամ Արթուր Ղամբարյանը։ Հիշեցնենք, որ Ա. Հովսեփյանի մոտ ախտորոշվել է կալանքի հետ անհամատեղելի հիվանդություն, որի հիմքով փաստաբանները միջնորդություն էին ներկայացրել նրա խափանման միջոցը փոխելու վերաբերյալ։

«Տեղեկացա, որ այս քրեական գործով կալանք տվող հայտնի դատավորներից մեկը՝ վատ համբավով, դատական ակտում նշել է, որ պարոն Հովսեփյանին կալանքի տակ պահելն արդարացված է նրանով, որ նախաքննությունն ավարտվել է և քրեական գործի նյութերին ծանոթանալով, նա կարող է ունենալ ակնհայտ հնարավորություններ՝ ճնշումներ գործադրել վարույթի մասնակիցների նկատմամբ։ Միշտ կարելի է զարմանալ մարդկանց և մասնագետների չիմացության վրա, բայց այդ զարմանքն էլ սահման ունի»,- նշեց Արթուր Ղամբարյանը՝ հիշեցնելով 1990-ականներին դատավորներից մեկի կայացրած ակտը, որով դատավորի ձևակերպումը, թե մարդուն կարելի է խոշտանգել, քանի ճշմարտությունը պետք է բացահայտվի, հետագայում ՄԻԵԴ-ում քննարկման առարկա է դարձվել։ Այսինքն՝ անձին իրավունք է տրվում նյութերին ծանոթանալու և այդ իրավունքը անձի համար առաջացնում է բացասական հետևանք, նա մնում է կալանքի տակ, իբրև վկաների նկատմամբ ճնշում կգործադրվի, ինչը, Ղամբարյանի գնահատմամբ, աներևակայելի է և վտանգն այն է, որ դա բողոքարկվել է Վերաքննիչ դատարան և Վերաքննիչ դատարանը հաստատել է այդ դիրքորոշումը, իսկ Վճռաբեկ դատարանը վարույթ չի ընդունել․ «Վճռաբեկ դատարանի այդ 6-7 հոգի նստած՝ գիտական կոչումները վրան խփած՝ բացառությամբ մեկի, որը հատուկ կարծիք է գրել, վարույթ չեն ընդունել, մնացել է նման դատական պրակտիկա»։

Ղամբարյանի խոսքով՝ այս ամբողջը մի շղթա է, եւ պետք է դիտարկել մեկ ամբողջական շղթայի մեջ։ Ինչ վերաբերում է այն հանգամանքին, որ Աղվան Հովսեփյանը նախկինում եղել է ՀՀ գլխավոր դատախազ , ՔԿ նախագահ, ինչը մեկնաբանվում է, թե կարող է ճնշում գործադրել անձանց նկատմամբ, Ղամբարյանը նշեց․«Երբ մենք այստեղ համակարգ ենք ստեղծում՝ այստեղ նստած սուբյեկտները՝ դատախազ, դատավոր, փաստաբան, համակարգեր ստեղծողները պետք է գիտակցեն, որ վաղը չէ մյուս օրը՝ համակարգն օգտագործվելու է իր դեմ։ Օրինակ, բարձր պաշտոններ զբաղեցնող անձը, օրինակ, ԲԴԽ բարձր պաշտոն զբաղեցնող անձը, որը հետագայում դառնում է մեղադրյալ, նշանակում է ավտոմատ մենք այդ մարդուն կտանենք կալանքի, քանի որ մենք այդ համակարագն ենք ստեղծել»։

Հիշեցնենք, որ Աղվան Հովսեփյանը ձերբակալվել է 2021թ սեպտեմբերի 7-ին՝ առավոտյան։ Նախաքննական մարմինը շուրջ 1.5 տարի քննվող քրեական գործի շրջանակներում մեղադրանք է առաջադրել Հովսեփյանին և նրա նկատմամբ որպես խափանման միջոց ընտրել կալանավորումը։ Ընդ որում՝ դատարանները բավարարել են քննիչի միջնորդությունները՝ կալանավորումը որպես խափանման միջոց ընտրելու կամ այն երկարացնելու մասին՝ ընդունելով հանդերձ, որ հիմքեր չկան կարծելու , որ նա կարող է թաքնվել քննությունից։ Քրեական գործի շրջանակներում Աղվան Հովսեփյանին մեղադրանք է առաջադրվել ՀՀ քրեական օրենսգրքի 310-րդ հոդվածով, 311-րդ հոդվածի 4-րդ մասի 2-րդ կետով, 38-308-րդ հոդվածի 2-րդ մասով, 38-179-րդ հոդվածի 3-րդ մասի 1-ին կետով, 190-րդ հոդվածի 3-րդ մասի 1-ին կետով (2 դրվագ) և 190-րդ հոդվածի 2-րդ մասի 1-ին կետով: Նրա նկատմամբ որպես խափանման միջոց է ընտրվել կալանավորումը: Վրեժ Մարկոսյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով: Նրա նկատմամբ որպես խափանման միջոց է ընտրվել ստորագրություն չհեռանալու մասին:
Հեղինակ՝ Իզաբել Սահակյան

Աղբյուր` Փաստինֆո