Փաստ ինֆո

Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, հեռացել է խորհրդակցական սենյակ ՝ ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի նկատմամբ ընտրված խափանման միջոց կալանավորումը գրավով փոխարինելու մասին միջնորդության վերաբերյալ որոշում կայացնելու։

Ինչպես արդեն տեղեկացրել ենք՝ դատարանն այսօր հրատապ նիստ է հրավիրել՝ քննության առնելու Աղվան Հովսեփյանի խափանման միջոցի փոփոխման հարցը՝ պայմանավորված նրա առողջական վիճակի վատթարացմամբ։ Պաշտպաններն արձանագրել են, որ Աղվան Հովսեփյանի մոտ առկա հիվանդություններն անհամատեղելի են կալանքի հետ, նրան կալանքի տակ պահելը խոշտանգում է և միջնորդել են դատարանին՝ Ա․ Հովսեփյանի նկատմամբ ընտրված խափանման միջոց կալանավորումը փոխարինել գրավով՝ գրավի չափը թողնելով դատարանի հայեցողությանը, միևնույն ժամանակ տեղեկացնելով, որ կարող են վճարել որպես գրավի չափ՝ սկսած 80 մլն ՀՀ դրամից։

Մեղադրող դատախազ Գևորգ Սաֆարյանն առարկություններ ներկայացրեց՝ հայտարարելով, թե անհրաժեշտ է փորձաքննություն իրականացնել՝ պարզելու, թե արդյոք առկա հիվանդություններն անհամատեղելի են կալանքի հետ, թե ոչ։ Ըստ մեղադրողների՝ պետք է միջնորդության լուծումը հետաձգել՝ մինչև փորձաքննության եզրակացությունը։

Պաշտպանության կողմը,սակայն, հակադարձեց՝ դատարանը պետք է այս փուլում քննարկի խափանման միջոցի հարցը, իսկ առողջական վիճակի վատթարացումը նոր հանգամանք է դիտարկվում՝ խափանման միջոցի փոփոխման հարցը։ Պաշտպան Էրիկ Ալեքսանյանն էլ, անդրադառնալով դատախազների փաստարկներին, նշեց՝ եթե Աղվան Հովսեփյանին կալանքի տակ պահելն ինքնանպատակ չէ, ապա ինչ տարբերություն կա՝ խափանման միջոցը կփոխվի հիմա, թե մի քանի ամսից՝ փորձաքննության եզրակացությունը ստանալուց հետո։

Լսելով կողմերի դիրքորոշումը՝ դատարանը հեռացավ խորհրդակցական սենյակ՝ որոշում կայացնելու։ Որոշումը կհրապարակվի այսօր՝ ժամը 15:30-ին։
Հիշեցնենք, որ Աղվան Հովսեփյանը ձերբակալվել է 2021թ սեպտեմբերի 7-ին՝ առավոտյան։ Նախաքննական մարմինը շուրջ 1.5 տարի քննվող քրեական գործի շրջանակներում մեղադրանք է առաջադրել Հովսեփյանին և նրա նկատմամբ որպես խափանման միջոց ընտրել կալանավորումը։ Ընդ որում՝ դատարանները բավարարել են քննիչի միջնորդությունները՝ կալանավորումը որպես խափանման միջոց ընտրելու կամ այն երկարացնելու մասին՝ ընդունելով հանդերձ, որ հիմքեր չկան կարծելու , որ նա կարող է թաքնվել քննությունից։ Քրեական գործի շրջանակներում Աղվան Հովսեփյանին մեղադրանք է առաջադրվել ՀՀ քրեական օրենսգրքի 310-րդ հոդվածով, 311-րդ հոդվածի 4-րդ մասի 2-րդ կետով, 38-308-րդ հոդվածի 2-րդ մասով, 38-179-րդ հոդվածի 3-րդ մասի 1-ին կետով, 190-րդ հոդվածի 3-րդ մասի 1-ին կետով (2 դրվագ) և 190-րդ հոդվածի 2-րդ մասի 1-ին կետով: Նրա նկատմամբ որպես խափանման միջոց է ընտրվել կալանավորումը: Վրեժ Մարկոսյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով: Նրա նկատմամբ որպես խափանման միջոց է ընտրվել ստորագրություն չհեռանալու մասին:

Հեղինակ՝ Իզաբել Սահակյան

Աղբյուր` Փաստինֆո