Փաստ ինֆո

2020թ․ նոյեմբերի 9-ի եռակողմ համաձայնագրի 6-րդ կետի կատարումը կամ չկատարումը մեր միակ հաղթաթուղթն է։ Այդ մասին Արցախի Ազգային ժողովում նախագահ Արայիկ Հարությունյանի հետ հարցուպատասխանի ժամանակ հայտարարեց Աժ պատգամավոր Դավիթ Գալստյանն ու առաջարկեց չշտապել Ադրբեջանին հանձնել, այսպես կոչված, «Լաչինի միջանցքը», քանի դեռ Ադրբեջանը նույն համաձայնագրով ստանձնած իր պատավորություններից գրեթե ոչ մեկը չի կատարել։

«Եթե Արցախի իշխանությունների հետ, ինչպես Նիկոլ Փաշինյանն է վստահեցնում, բոլոր հարցերը համաձայնեցվում են և Արցախի իշխանությունները հնարավորություն ունեն կարծիք հայտնելու, ապա ի՞նչն է խանգարում կասեցնել 2020թ․ նոյմեբերի 9-ի եռակողմ համաձայնագրի 6-րդ կետի իրագործումը, քանի դեռ Ադրբեջանի իշխանությունները համաձայնագրով ստանձնած իրցն պարտավորությունները չեն կատարել մասնավորապես՝ գերիների վերադարձի հետ կապված, Քարագլխից հետ քաշվելու և բազմաթիվ այլ պարտավորություններ չեն կատարել»,-հարց ուղղեց Դավիթ Գալստյանը։

Արցախի նախագահն ի պատասխան պատգամավորի հարցի՝ ասաց, որ նախ՝ Բերձորով անցնող ճանապարհը դեռչի հանձնվել, բացի այդ, Լաչինի միջանցքը, ըստ նրա, կարելի է և չհանձնել, բայց այդ դեպքում հետևանքների համար պետք է պատրաստ լինել պատասխան տալ։

«Կարող ենք շրջանցել այդ կետը (համաձայնագրի 6-րդ կետը,-խմբ․), բայց մենք քննարկում ենք հետևանքները ևս։ Կարող ենք քննարկել նաև, թե որ ճանապարհն է մեզ համար լինելու անվտանգ։ Երբ շինարարական աշխատանքներն ավարտվեն, այն ժամանակ մենք մեր կարծիքը հնարավորություն կունենանք ասելու, բայց եթե պիտի փոխվի մայրուղին, ապա կառուցվող մայրուղին այն կոորդինատներով է գնում, որը մենք հաստատել ենք ԱԽ-ում»,-ասաց Արայիկ Հարությունյանը՝ հավելելով, որ մայիսի 18-ն իր կյանքի ամենածանր օրերից մեկն էր, քանի որ 1992թ․ Բերձորն ազատագրողների և այնտեղով անցած առաջին խմբի մեջ եղել է նաև ինքը։

Աղբյուր` Փաստինֆո