Փաստ ինֆո

Քաշաթաղի շրջանի Աղավնո գյուղի բնակիչներն ու գյուղապետը գյուղից դուրս գալու մտադրություն չունեն․ նման առաջարկ կամ քննարկում Արցախի իշխանությունների կողմից չի եղել, իսկ լինելու դեպքում անգամ՝ գյուղացիները գիտեն իրենց անելիքները։ Այդ մասին «Փաստինֆո»-ի հետ զրույցում ասաց Աղավնոյի գյուղապետ Անդրանիկ Չավուշյանը։

«Հայաստանի վարչապետն ասել է, թե Արցախի իշխանությունները կզբաղվեն այդ հարցով (Աղավնոյի բնակիչների հարցերով,-խմբ), իսկ Արցախի իշխանությունները մինչև օրս ոչ մի ձևով չեն արձագանքել։ Ես Փաշինյանի կամ Ալիևի ցանկությունները կատարողը չեմ։ Մենք տեղում ենք, չենք պատրաստվում դուրս գալ։ Իսկ եթե կտրուկ քայլեր փորձեն անել, օրինակ՝ որոշեն տարհանել մեզ, արդեն նաև կոչով հանդես կգամ»,-ասաց գյուղապետը։

Հիշեցնենք, որ հունիսի 27-ին առցանց ասուլիսի ժամանակ Նիկոլ Փաշինյանն ասել էր, որ Աղավնոն և Բերձորը պետք է հանձնվեն Ադրբեջանին և հավելել․ «Աղավնո գյուղի բնակիչների խնդիրները Արցախի կառավարության միջոցներով, կարծում եմ, կլուծվեն»։

Այս հայտարարության հետ կապված՝ Աղավնոյի գյուղապետն արձանագրում է․ Նիկոլ Փաշինյանն Աղավնոյի ճակատագիրը չի կարող որոշել իր հայեցողությամբ, քանի որ նա դրա համար մանդատ չի ստացել։ Չավուշյանը շեշտում է՝ Աղավնոն հանձնել կնշանակի՝ 1․ կտրել Արցախի պորտալը և 2․ մեծ վտանգի տակ դնել Սյունիքը։

Վարչապետն ինքնուրույն որոշումներ է կայացնում ու, ցավոք, չունենք այն հասարակությունը, որ իրեն կհակադրվի, կասի՝ դու նման քայլեր անելու իրավունք չունես։ Հասարակությունը չպիտի հիասթափվի ձերբակալություններից ևս։ Եթե մենք այստեղ չենք հիասթափվում, չենք հանձնվում, ավելի հանգիստ պայմաներում ապրեղներն ի՞նչ իրավունքով պետք է հիասթափվեն»,-ընդգծում է Չավուշյանը։

Զիջողական քաղաքականության փոխարեն կորցրածը հետ բերելու վճռականություն և խիզախություն է ակնկալում տեսնել իշխանությունների կողմից Աղավնոյի գյուղապետը։ Ասում է՝ թող ասեն այս տարածքը պետք է ազատագրենք և կանենք դա։

Միևնույն ժամանակ, որոշակի անհանգստություն ունի Չավուշյանը, որ գուցե և տեղահանության ուղղությամբ կաշխատեն ներքին կարգով, ինչը 2020թ․ պատերազմի ընթացքում չի հաջողվել, բարեբախտաբար։

«Պատերազմի ժամանակ մեր ընտանիքներն այստեղ էին․ չէինք հանել, որ մենք դիրքում ավելի ամուր լինենք։ Բայց ծրագրավորած շատ վայրերից տեղահանեցին մարդկանց։ Ճիշտ է, հիմա կա որոշակի մտահոգություն, որ այստեղ կարող է ներքին կարգով նման բան անեն, բայց բնակիչները հիմա ավելի մարտական են։ Պատերազմի ընթացքում շատ բան սովորեցին, հասկացան, որ պետք չէ խառնվել իրար։ Երկու բառ էլ որ իրենք ասեն (նկատի ունի Արցախի իշխանություններին, -խմբ) , ժողովուրդը կհանգստանա»,-ասում է Անդրանիկ Չավուշյանն ու շեշտում՝ Հայաստանի վարչապետի անընդունելի հայտարարություններին Արցախից համապատասխան արձագանքը պետք է չուշանա։

Աղբյուր` Փաստինֆո