Փաստ ինֆո

ՔՊ-ն ԱԺ արտահերթ նիստում ՀՀ գլխավոր դատախազի պաշտոնում պաշտոնապես ներկայացրեց Նիկոլ Փաշինյանի օգնական Աննա Վարդապետյանի թեկնածությունը:

Նրա կենսագրությունը ներկայացրեց ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանը։

Գլխավոր դատախազի թեկնածու Աննա Վարդապետյանն իր ելույթում առանձնացրեց մի շարք խնդիրներ, որոնք տեսնում է դատական համակարգում:
Ըստ նրա՝ առաջին խնդիրը ուշացած արդարադատության է, որը մշտապես պահելու է իր ուշադրության կենտրոնում.

«Մենք ունենք անթիվ քննչական և դատավարական գործողություններ՝ ֆորմալ առումով ճիշտ, բայց բովանդակային առումով ոչ լիարժեք, արդյունքում ունենում ենք ծանրացված վարույթներ, ծանրաբեռնվածություն, ահռելի քանակի հայցեր, բայց ունենում ենք հատվածային կամ շատ քիչ քանակով լուծված գործեր, որը հանգեցնում է նրան, որ մարդու մոտ ձևավորվում է անարդարության զգացողություն, թիվ մեկ խնդիրը, որը իմ ուշադրության կենտրոնում է լինելու միշտ, դա ուշացած արդարադատությունն է և պրոցեսների, այլ ոչ թե արդյունքի վրա կենտրոնացվածությունն է»,-ընդգծեց Գլխավոր Դատախազի թեկնածուն:

Վարդապետյանը նշեց, որ դատախազական արդյունավետ վերահսկողություն իրականացնելու միջոցով հնարավոր կլինի լուծել մինչդատական վարույթում առկա ձգձգումները:

«Մենք այլևս իրավունք չունենք գործի վերաբերյալ տեղեկություն ստանալ բացառապես վերբալ ապացույցներից կամ տուժողների բողոքներից, մենք, կարծես, ամբողջ քրեադատավարական մեխանիզմը ծանրացնում ենք տուժողի կամ վկայի ուսերին, ասում ենք՝ արի ցուցմունք տուր, լավագույն դեպքում առաջարկում ենք պաշտպանություն, բայց 21-րդ դարում, երբ մեր սոցիալական ողջ կենսագործունեությունը թողնում է փաստաթղթավորված հետքեր, պահանջել, որ անձը գա և ստանձնի բեռ՝ հանցագործության մասին մեզ հայտնելու համար, սա ժամանակավրեպ է, պետք է այս մոտեցումից ազատվել»,-ասաց նա:
Նրա խոսքով՝ վերբալ ապացույցները պետք է նվազեն քրեադատավարական մեխանիզմների մեջ՝ տեղը զիջելով փաստաթղթավորված գործունեությանը։

Հաջորդ խնդիրը, ըստ Վարդապետյանի, համագործակցված աշխատանքի պակասն է.

«Լինում են դեպքեր, երբ քննիչը և դատախազը իրար հետ չեն շփվում, սա վերածվում է մի երկար փաստաթղթաբանության՝ արդյունքում խոցելի վիճակի մեջ դնելով տուժողից,տուժողը ստիպված տեղապտույտի մեջ է ընկնում»,-ասաց Վարդապետյանը:

Գլխավոր դատախազի թեկնածուն նաև նշեց, որ կարևորում է , որպեսզի հովանավորչությունը մերժվի, քանի որ կոռուպցիան միայն կաշառքով չի դրսևորվում.
«Բացի այդ, պետք է այնպես անել, որ կանխարգելման մեխանիզմն աշխատի, այլ ոչ թե բանը հասնի քրգործ հարուցելուն, քանի որ այդ դեպքում «մաղով ջուր են կրում» պարզապես»,-ասաց նա:

Հիշեցնենք, որ ԱԺ–ը հրավիրած արտահերթ նիստում, որին մասնակցում են միայն իշխանական պատգամավորները, ՀՀ գլխավոր դատախազ է ընտրում։

Աղբյուր` Փաստինֆո