Փաստ ինֆո

Ձեզ դնում եք մեղադրանքի կողմում և իրականացնում ինկվիզիցիոն արդարադատություն։ Խնդրում եմ՝ գործողությունները կատարել քրեական դատավարության օրենսդրության տրամաբանությունից ելնելով՝ թույլ չտալով իրավունքների առկա խախտումների շարունակականություն և նոր խախտումներ։ Այս մասին դատական նիստի ընթացքում հայտարարեց ՀՀ երկրորդ նախագահ Ռոբերտ Քոչարյանի պաշտպան Հովհաննես Խուդոյանը՝ դիմելով նախագահող դատավոր Աննա Դանիբեկյանին։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, ընթանում է ՀՀ երկրորդ նախագահ Ռոբերտ Քոչարյանի և ՀՀ նախկին փոխվարչապետ. ԱԺ «Հայաստան» խմբակցության պատգամավոր Արմեն Գևորգյանի գործով դատական նիստը։ Նշենք, որ գործը գտնվում է ապացույցների հետազոտման փուլում։ Արմեն Գևորգյանի պաշտպանը միջնորդություն է ներկայացրել՝ Արմեն Գևորգյանին՝ երկրից ժամանակավորապես բացակայելու թույլտվության վերաբերյալ, որին դատարանը կանդրադառնա օրվա ավարտին։ Մինչ դատարանը կշարունակեր ապացույցների հետազոտումը, պաշտպան Հովհաննես Խուդոյանը հայտարարեց, որ միջնորդություն է ցանկանում ներկայացնել՝ նախաքննության ընթացքում ՀՔԾ քննիչ Հրաչյա Մուշեղյանի կողմից ձեռք բերված ապացույցներն անթույլատրելի ճանաչելու մասին, որի բավարարման արդյունքում դատարանը կարող է հանգել նրան, որ հրապարակայնորեն չի կարող հետազոտել գործի հիմքում ընկած ապացույցները։ Մեղադրող դատախազ Պետրոս Պետրոսյանն առարկեց՝ նշելով, որ հրապարակվելիք ապացույցներն այդ միջնորդության հետ կապ չունեն։

Նախագահողը որոշեց անդրադառնալ միջնորդությանը՝ Արմեն Գևորգյանի միջնորդությունը քննարկելուց առաջ։ Արմեն Գևորգյանի պաշտպան Լուսինե Սահակյանն էլ նկատեց՝ նախագահող դատավորը շարունակում է խախտել քրեադատավարական իրավունքի նորմերը։ Պաշտպան Խուդոյանը հայտարարեց, որ դատավորի գործողություններից տպավորություն է ստեղծվում, որ նա արդեն իսկ կողմնակալ մոտեցում ունի ներկայացվելիք միջնորդությունների նկատմամբ։ Փաստաբանն ընդգծեց՝ նախաքննության ընթացքում ձեռք բերված անթույլատրելի ապացույցները գործում չեն կարող օգտագործվել։ Բացի այդ՝ պաշտպանները հիշեցրին, որ հուլիսի 1-ից ուժի մեջ կմտնի ՀՀ քրեական նոր օրենսգիրք, որը ենթադրում է, որ ապացույցը չի կարող հանրային դառնալ, եթե այն անթույլատրելի է։

Արդյունքում՝ պաշտպան Լուսինե Սահակյանը միջնորդեց իրեղեն ապացույցները հետազոտել դռնփակ ռեժիմով։ Դատական նիստը շարունակվում է դռնփակ։
Ըստ մեղադրական եզրակացության՝ Ռոբերտ Քոչարյանը մեղադրվում է այն բանի համար, որ նա, 1998-2008թ զբաղեցնելով ՀՀ նախագահի պաշտոնը, իր պաշտոնեական դիրքն օգտագործելով Սիլվա Համբարձումյանի օգտին գործողություններ կատարելու, նպաստելու, այն է՝ ընկերությանը տրամադրված ընդերքն օգտակար հանածոների շահագործման համար հատուկ լիցենզիաներով ընկերության 100 տոկոս բաժնեմասերի ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար 2008թ փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով 927 մլն ՀՀ դրամին համարժեք 3 մլն ԱՄՆ դոլարի չափով կաշառք։

Ըստ մեղադրական եզրակացության՝ Արմեն Գևորգյանը մեղադրվում է այն բանի համար, որ նա, 2006թ փետրվարից մինչև 2008թ ապրիլի 21-ը զբաղեցնելով ՀՀ նախագահի աշխատակազմի ղեկավարի և ԱԽ քարտուղարի պաշտոնները, օգտագործելով իր պաշտոնեական դիրքը, Սիլվա Համբարձումյանի օգտին գործողություններ կատարելուն նպաստելու համար 2008թ ապրիլին Սամվել Մայրապետյանի օժանդակությամբ ստացել է 309 մլն ՀՀ դրամին համարժեք 1 մլն ԱՄՆ դոլար կաշառք, ինչպես նաև՝ խեղաթյուրելով և թաքցնելով նման գումարի իրական բնույթն ու ծագումը, օրինականացրել է առանձնապես խոշոր չափերով հանցավոր ճանապարհով ստացված եկամուտները։

Հեղինակ՝ Իզաբել Սահակյան

Աղբյուր` Փաստինֆո