Փաստ ինֆո

Արցախի Բերձոր և Աղավնո համայնքների Ադրբեջանի վերահսկողության տակ անցնելու մասին տեղեկատվությունն այսօր պաշտոնապես հաստատել է Նիկոլ Փաշինյանը՝ առանց մանրամասնելու, թե ինչ փաստաթղթի հիման վրա դա պետք է տեղի ունենա։

Նշված համայնքների հայաթափման վտանգի մասին արդեն տեւական ժամանակ է, ինչ բարձրաձայնվում է փորձագիտական շրջանակների կողմից, ինչն այսօր հաստատվեց Փաշինյանի կողմից։

«Լաչինի հատվածում երթուղու փոփոխություն տեղի ունենալու պարագայում այն համայնքները, որոնք չեն գտնվել ԼՂ ինքնավար մարզի նախկին սահմանի մեջ՝ անցնելու են Ադրբեջանի վերահսկողության տակ»,-հայտարարել է նա՝ ավելացնելով, որ երթուղու փոփոխություն պետք է տեղի ունենա այն բանից հետո, երբ ռուս խաղաղապահները վերահսկողություն կսահմանեն նոր երթուղու նկատմամբ։

«Փաստինֆո»-ն արդեն տեղեկացրել է, որ ադրբեջանական կողմը Բերձորը շրջանցող նոր ճանապարհ է կառուցում, Լաչինի միջանցքին փոխարինող նոր ճանապարհն անցնելու է Ստեփանակերտ-Կրկժան-Ղայբալու-Զառսլու-Լիսագոր-Բերդաձորի ենթաշրջան (Մեծ Շեն, Հին Շեն, Տասը Վերստ, Կանաչ Թալա, Եղցահող) հատվածով և դուրս է գալու Գորիսի շրջանի Կոռնիձոր գյուղի մոտ:

Նոյեմբերի 9-ի եռակողմ հայտարարության մեջ հստակ ասվում է, որ երեք տարվա ընթացքում Լաչինի միջանցքի երկայնքով նոր երթուղու կառուցման նախագիծ պիտի հաստատվի կողմերի միջև, նոր ճանապարհը պետք է Հայաստանն Արցախին կապի և այնտեղ պետք է ռուս խաղաղապահներ տեղակայվեն.

«Հայաստանի Հանրապետությունն Ադրբեջանի Հանրապետությանը վերադարձնում է Քելբաջարի շրջանը մինչև 2020 թ. նոյեմբերի 15-ը, իսկ Լաչինի շրջանը՝ մինչև 2020 թ. դեկտեմբերի 1-ը: Լաչինի միջանցքը (5 կմ լայնությամբ), որը ապահովելու է Լեռնային Ղարաբաղի կապը Հայաստանի հետ, ընդորում շրջանցելով Շուշի քաղաքը, մնում է Ռուսաստանի Դաշնության խաղաղապահ զորակազմի վերահսկողության ներքո:

Կողմերի համաձայնությամբ, Լեռնային Ղարաբաղի և Հայաստանի միջև կապն ապահովելու համար առաջիկա երեք տարիների ընթացքում պիտի հաստատվի Լաչինի միջանցքի երկայնքով նոր երթուղու կառուցման նախագիծ, որից հետոռուսական խաղաղապահ զորակազմը կվերատեղակայվի՝ այդ երթուղին պաշտպանելու համար:

Ադրբեջանի Հանրապետությունը երաշխավորում է Լաչինի միջանցքով քաղաքացիների, տրանսպորտային և բեռնատար միջոցների երթևեկության անվտանգությունը երկու ուղղություններով»,-ասվում է նոյեմբերի 9-ի եռակողմ հայտարարության 6-րդ կետում:

Այսօր Փաշինյանը հաստատել է, որ երթուղին համաձայնեցվել է։ Ասել է թե՝ Հայաստանի իշխանությունները տվել են իրենց համաձայնությունը, որ նոր ճանապարհը կառուցվի այնպես, որի հետեւանքով եւս մի քանի հայկական բնակավայր կհայաթափվեն։ Ավելին՝ Փաշինյանի այսօրվա հայտարարությունները փաստում են, որ կան գաղտնի պայմանավորվածություններ, քանի նշված գյուղերը Ադրբեջանին հանձնելու մասին նոյեմբերի 9-ի հայտարարության մեջ հիշատակում անգամ չկա։ Ինչ վերաբերում է Սուս գյուղին, ապա Փաշինյանը հայտարարել է, որ այդ գյուղի ճակատագրից անտեղյակ է։

Աղբյուր` Փաստինֆո