Փաստ ինֆո

ՔԿ-ն ձգձգում է Գագիկ Ջհանգիրյանի կողմից պաշտոնեական լիազորություններն առերևույթ անցնելու, չարաշահելու, արդարադատության իրականացմանը խոչընդոտելու, առանձի դրվագներով՝ սպառնալիքներ հնչեցնելու փաստի առթիվ քրեական գործի հարուցումը։ ԲԴԽ արդեն նախկին նախագահ Ռուբեն Վարդազարյանի կողմից աղմկահարույց ձայնագրության հրապարակումից անցել է շուրջ 7 օր, իսկ ՔԿ-ն դեռ խուսափում է համարժեք իրավական քայլեր ձեռնարկել։

Հիշեցնենք, որ հունիսի 20-ին Ռուբեն Վարդազարյանը հրավիրած ասուլիսում աղմկահարույց ձայնագրություն էր հրապարակել, որի համաձայն՝ Վարդազարյանին վարչապետի անունից առաջարկվել է հրաժարական տալ, իսկ Ջհանգիրյանն էլ ստանձնել է միջնորդի դեր՝ երաշխավորելով, որ նրա նկատմամբ հետապնդումներ չեն իրականացվի, եթե հրաժարական ներկայացնի։

Դատախազությունից «Փաստինֆո»-ին հայտնել էին, որ ՀՀ գլխավոր դատախազությունում իրականացվող ԶԼՄ-ների և համացանցային տեղեկատվական ռեսուրսների մշտադիտարկման արդյունքում Ռուբեն Վարդազարյանի հրապարակած ձայնագրությունը վեր է հանվել և դրանում առկա՝ քրեական գործով Ռուբեն Վարդազարյանի նկատմամբ իրականացված քրեական հետապնդման գործընթացում առերևույթ ապօրինի միջամտության հնարավոր հանգամանքները քրեադատավարական ընթացակարգով լրիվ, օբյեկտիվ և բազմակողմանի ստուգելու նպատակով ուղարկվել է ՀՀ քննչական կոմիտե։

Մեկ շաբաթ անց՝ այսօր, ՔԿ-ից «Փաստինֆո»-ի հետ զրույցում հայտնեցին, որ դեռևս նյութեր են նախապատրաստվում։
Նշենք, որ նյութերի նախապատրաստման շրջանակներում հունիսի 23-ին ՔԿ-ում բացատրություն է տվել ԲԴԽ նախկին նախագահ Ռուբեն Վարդազարյանը, ըստ էության, որևէ լրացուցիչ տեղեկություն չհայտնելով։ Փորձել ենք ՔԿ-ից պարզել՝ արդյոք Ջհանգիրյանն արդեն բացատրություն տվել է, սակայն այս մասով հստակ տեղեկություն ստանալ չհաջողվեց։ Նկատենք, որ Ջհանգիրյանն այս պահին հիվանդանոցում է՝ վիրահատության, հետեւապես այս հիմքով նախաքննական մարմինը եւս կձգձգի նրա հարցաքննությունը։

Ամեն ինչ վկայում է սույն գործի նկատմամբ քաղաքական հովանավորչության մասին։ Համեմատության համար հարկ է նշել, որ, օրինակ, ԱԺ «Հայաստան» խմբակցության պատգամավոր Արմեն Չարչյանի վերաբերյալ տելեգրամյան ալիքներում տարածված՝ անհայտ աղբյուրից՝ ձայնագրության հիման վրա քրգործը հարուցվել է անմիջապես, Չարչյանին ձերբակալել են, ապա՝ ամիսներ շարունակ կալանքի տակ պահել։ Նույն իրավիճակն է նաև Ավետիք Չալաբյանի պարագայում, երբ ոմն Թոռնիկ Ալեյանի մասնակցությամբ տարածված ձայնագրության հիման վրա խուզարկություններ են իրականացրել Չալաբյանի բնակարանում, ձերբակալել և մինչ այժմ կալանքի տակ են պահում, ընդ որում, Ավետիք Չալաբյանն անգամ տեղեկացված չի եղել այդ ձայնագրության, նյութերի նախապատրաստման մասին, քանի որ իրավապահներն անգամ չէին հրավիրել բացատրություն տալու, այլ՝ անմիջապես «կացնային» եղանակով քրգործ էին հարուցել ու սահմանափակել վերջինիս իրավունքները։ Նախկին զինդատախազ, իսկ այսօր՝ ԲԴԽ նախագահի պաշտոնակատար և «Գռզո»-ի խնամի Գագիկ Ջհանգիրյանի նկատմամբ իրավիճակը այլ է, պատճառը թերեւս այն է, որ նրա բոլոր գործողություններն ուղղված են եղել՝ կանխելու ՀՀ երկրորդ նախագահ Ռոբերտ Քոչարյանի հնարավոր իշխանության գալը։ Ասել է թե՝ գործել է քաղաքական նպատակներով՝ Վարդազարյանին մեկուսացնելու ճանապարհով ԲԴԽ-ն դարձնելով քաղաքական գործիք։

Նկատենք, որ անգամ հանրայինի եթերում իր այսօր կոչված արդարացումները ներկայացնելիս Ջհանգիրյանը խոստովանել է, որ այդքան էլ հեշտ չէ ԲԴԽ նախագահին հրաժարական պարտադրելը, ուստի փորձել է նրան «կուտ» տալ։ Այլ խոսքով՝ խոստովանել է ԲԴԽ նախագահի վրա ունեցած իր անօրինական միջամտությունը։

Աղբյուր` Փաստինֆո