Փաստ ինֆո

Արցախի Ներդրումային և Գյուղի ու գյուղատնտեսության աջակցության հիմնադրամները 2020թ․ մայիսից առայսօր կամայականություններ և ոչ արդարացված ծախսեր թույլ են տվել, թե ոչ, կպարզի ստեղծվելիք քննիչ հանձնաժողովը։ Քննիչ հանձնաժողով կազմելու նախաձեռնությանը միացած Արցախի ԱԺ 9 պատգամավորներ համապատասխան դիմումի տակ արդեն ստորագրել են, դիմումն էլ մուտքագրվել է ԱԺ։ Այդ մասին «Փաստինֆո»-ի հետ զրույցում ասաց Արցախի «Արդարություն» խմբակցության ղեկավար Դավիթ Գալստյանը, ով առաջադրվել է որպես ստեղծվելիք քննիչ հանձնաժողովի ղեկավար։

«Որպես ընդդիմություն՝ մենք 3 պատգամավոր ունենք․ 5 պատգամավոր էլ ընդդիմադիր դաշտի մեր գործընկերները՝ ՀՅԴ-ն ու ԱԺԿ-ն ունեն։ Նմանատիպ հանձնաժողով ստեղծելու մտադրություն վաղուց ունեինք, ուղղակի մեր ունեցած ընդհանուր 8 ձայնով չէինք կարող նման նախաձեռնությամբ հանդես գալ։ Շատ ողջունելի է «Միասնական հայրենիք»-ից մեր գործընկերոջ վճռականությունը, որ միացավ այս նախաձեռնությանը՝ կարևորելով հանրության շրջանում առկա հարցերի քննությունը»,-նշեց պատգամավորը։

Գալստյանի խոսքով՝ քննիչ հանձնաժողով ստեղծելու նպատակը պետության հանդեպ վստահության բարձրացումն է կամ, եթե իրոք վերոհիշյալ կառույցների կողմից եղել են չարաշահումներ ու յուրացումներ, ապա դրանք պետբյուջե վերադարձնելը։

«Հանրության շրջանում այդ հիմնադրամների կողմից չարաշահումներ թույլ տալու, գումարները ոչ նպատակահարմար ծախսելու մասին շատ են խոսակցությունները և ակնհայտ անվստահության մթնոլորտ կա դրանց հանդեպ։ Եթե իրոք խախտումներ թույլ են տրվել, ապա հանձնաժողովը պետք է դրանք ջրի երես հանի և հետայսու կանխի նման դեպքերը, իսկ եթե չեն եղել, ապա մարդկանց անվստահությունը փարատի։ Ընդհանուր առմամբ, փորձելու ենք պետությանը ուղղորդել, որ ճիշտ քայլերով առաջ գնա»,-շեշտեց Գալստյանը։

Թե ինչու ստեղծվելիք հանձնաժողովը չի քննելու հիմնադրամների գործունեությունը նաև մինչև 2020թ․ մայիս ընկած ժամանակահատվածի համար, պատգամավորը բացատրեց նրանով, որ ինքը կոնկրետ, ինչպես և այլ պատգամավորներ, պատգամավորական մանդատ ստացել է 2020 մայիսին և այդ պահից սկսած Արցախում տեղի ունեցող գործընթացների համար իրեն ևս պատասխանատու է համարում։

ԱԺ կանոնակարգ օրենքի համաձայն` հանձնաժողովն իրավունքի ուժով ձևավորվում է եռօրյա ժամկետում։ Մեկ օր արդեն անցել է․առաջիկա երկու օրերին ստորագրությունը հետ վերցնող կլինի, թե ոչ, պատգամավորը, դժվարացավ միանշանակ բացառել, բայց նշեց՝ համոզված եմ, որ մեր նախաձեռնությունը կյանքի կկոչվի։

Աղբյուր` Փաստինֆո