Փաստ ինֆո

ՀՀ թաեքվոնդոյի ֆեդերացիայում խմորումները չեն դադարում՝ Ֆեդերացիայի նախագահի ընտրությունից հետո։ Ֆեդերացիայի նախագահության անդամներն ահազանգում են՝ ֆեդերացիայի նախկին ղեկավար անձանց և ՀՀ ԿԳՄՍ փոխնախարար Կարեն Գիլոյանի, վերջինիս ենթակայության տակ գտնվող մի շարք աշխատակիցների ենթադրյալ անօրինական գործողությունների մասին և պահանջում քրեական գործ հարուցել։ Ֆեդերացիայի նախագահության անդամ, փաստաբան Վրեժ Խաչիկյանը «Փաստինֆո»-ի հետ զրույցում հայտնեց, որ հանցագործության մասին հաղորդում է ներկայացվել դատախազություն։

Նրա փոխանցմամբ՝ հունիսի 16-ին ՀՀ ԿԳՄՍ նախարարությունում համաժողով է հրավիրվել, որին, սահմանված կարգի համաձայն, պետք է մասնակցեին բոլոր մարզիչները, սակայն նախարարությունում ոստիկանության ծառայողները թույլ չեն տվել մարզիչներին, այդ թվում՝ վաստակավոր մարզիչին բարձրանալ շենք, հետագայում Խաչիկյանին պարզաբանել են, որ Ֆեդերացիայի նախկին փոխնախագահը՝ Վարդան Ղահրամանյանը։ Համաժողովի ընթացքում Ղահրամանյանը ընտրվել է ֆեդերացիայի նախագահ, իսկ Կարեն Գիլոյանը՝ պատվավոր նախագահ։ Ընդ որում՝ փաստաբանի դիտարկմամբ՝ նախարարությունն իր աշխատակիցների միջոցով իրավասու է և պարտավոր է միայն վերահսկել ֆեդերացիային պետության կողմից տրամադրված ֆինանսական միջոցների արդյունավետ ծախսման գործընթացը, նախարարության աշխատակիցները, որպես պաշտոնատար անձիք, այդ թվում նաև փոխնախարար՝ Կարեն Գիլոյանը, որևէ իրավասություն չունեն խառնվել «Հայաստանի թաեքվոնդոյի ֆեդերացիա» ՀԿ գործունեությանը, առավել ևս համաժողով կազմակերպել։ Այլ խոսքով՝ փաստաբանը գտնում է, որ համաժողովը հրավիրվել է ոչ լիազոր անձանց կողմից։ Գլխավոր դատախազություն հանցագործության մասին հաղորդում է ներկայացվել՝ պաշտոնատար անձանց կողմից իրենց պաշտոնեական դիրքը չարաշահելու, լիազորություններն անցնելու վերաբերյալ հատկանիշներով։ Դիմում է ներկայացվել նաև պետական ռեգիստր՝ խնդրելով չգրանցել համաժողովի արդյունքներով ֆեդերացիայի ղեկավար կազմի փոփոխությունը, սակայն դեռևս պատասխան չի ստացվել։

Բացի այդ՝ մեր զրուցակիցը հայտնեց, որ Վարդան Ղահրամանյանը 2018թ-ից նախարարության կողմից անօրինական կերպով ստացել է 21 մլն դրամ։

«Եթե անձը ռեգիստրում գրանցված չէ, Ֆեդերացիայի նախագահ չէ, լիազորագիր չունի, ինչպե՞ս եք այդ գումարներն իրեն տրամադրում՝ 2017թ նախարարի որոշման խախտմամբ»,- նշեց փաստաբանը՝ տեղեկացնելով, որ այդ հարցով դիմել են ԿԳՄՍ՝ պահանջելով փաստաթղթերի պատճենները՝ պարզելու, թե ինչ հիմքով են նրան տրամադրվում այդ գումարները։ Բացի այդ՝ դեռևս 2018թ հաղորդում է ներկայացվել Վարդան Ղահրամանյանի դեմ՝ ՀՀ պետ բյուջեից ֆեդերացիային տրված գումարների ենթադրյալ յուրացման, մարզիկներից գումար վերցնելու, ինչպես նաև հավաքականի երկրորդ գլխավոր մարզիչ և ընդհանրապես մարզիչ չլինելով Վարդան Ղահրամանյանի կողմից պետությունից պատվովճար ստանալու վերաբերյալ, ինչի վերաբերյալ հարուցվել է քրեական գործ, որն առ այս պահը քննվում է։

Հեղինակ՝ Իզաբել Սահակյան

Աղբյուր` Փաստինֆո