Փաստ ինֆո

Հրապարակված ձայնագրության մեջ արտացոլված խոսակցությունը որևէ տարակուսանք, զարմանք չառաջացրեց, որովհետև միշտ էլ իմացել եմ, որ մեր դատաիրավական համակարգում նման խայտառակ վիճակ է տիրում, հասարակությունն էլ չպետք է զարմանա։ Լսեցինք այն, ինչ օբյեկտիվ իրականության մեջ միշտ եղել է, ուղղակի այս անգամ դա լսեցինք բառացիորեն։ Այս մասին «Փաստինֆո»-ի հետ զրույցում ասաց փաստաբան Էրիկ Ալեքսանյանը։

Ինչպես արդեն տեղեկացրել ենք՝ հունիսի 20-ին Ռուբեն Վարդազարյանը հրավիրած ասուլիսում աղմկահարույց ձայնագրություն է հրապարակել, որի համաձայն՝ Վարդազարյանին վարչապետի անունից առաջարկվել է հրաժարական տալ, իսկ Ջհանգիրյանն էլ ստանձնել է միջնորդի դեր՝ երաշխավորելով, որ նրա նկատմամբ հետապնդումներ չեն իրականացվի, եթե հրաժարական ներկայացնի։ ԲԴԽ նախագահի պաշտոնակատար Գագիկ Ջհանգիրյանը երեկ Հանրային ՀԸ եթերում փորձել է պարզաբանումներ ներկայացնել՝ հայտարարելով, թե իբրև «կուտ է» տվել Վարդազարյանին, իսկ «իր վզին դրված» ասելով՝ նկատի է ունեցել իր ճիտին պարտքը, առաքելությունը ։

Փաստաբան Էրիկ Ալեքսանյանը զերծ մնաց գնահատականներ տալուց՝ ձայնագրության մեջ առկա խոսակցությանը։

«Այնտեղ այնպիսի բառամթերք է օգտագործվում, որը ես արժանի չեմ համարում որևէ կերպ մեկնաբանել՝ որպես մասնագետ, բայց ինձ համար, անկեղծ ասած, պարզ չդարձավ, թե, ի վերջո, Գագիկ Ջհանգիրյանի վզին ինչ էր դրած՝ նյութական աշխարհի առարկա, թե այլ բան, թե բոլորը միասին»,- նշեց Էրիկ Ալեքսանյանը, ապա, անդրադառնալով երեկ Գագիկ Ջհանգիրյանի կողմից ներկայացված պարզաբանումներին, թե դա իր ճիտին պարտքն է, նշեց, որ ավելի լավ կլիներ Ջհանգիրյանն ընդհանրապես որևէ բան չխոսեր, քան տար այն հարցազրույցը, որը տվել էր երեկ. «Ինձ համար նաև պարզ չդարձավ, ի վերջո, դա կտի սեղան էր, թե հացի սեղան էր, որովհետև հացի սեղան արտահայտությունն օգտագործել է նա, կուտ տալ արտահայտությունն օգտագործել է նա։ Այնպիսի պրիմիտիվ հայտարարություններ է արել պարոն Ջհանգիրյանը, որը, կրկնում եմ, ավելի լավ է՝ չասեր։ Տպավորություն է, որ Գագիկ Ջհանգիրյանն ընդամենը ցանկանում է որևէ կերպ տակից դուրս գալ, բայց տակից դուրս գալուն էլ, մանյովրին էլ ձև կա, այն ինչ ասում էր պարոն Ջհանգիրյանը՝ արժանի չեմ համարում նույնիսկ որևէ կերպ մեկնաբանելը»։

Ալեքսանյանի գնահատմամբ՝ ձայնագրությունում առնվազն երկու հանցագործության հատկանիշների տարրեր կան, պետք է պատշաճ քրեաիրավական գնահատական տրվի։

Նշենք, որ այս պահին ՔԿ-ում նյութեր են նախապատրաստվում՝ ձայնագրության հիման վրա, որի շրջանակներում Ռուբեն Վարդազարյանն արդեն բացատրություն է տվել։

Երեկ հարցազրույցի ընթացքում Գագիկ Ջհանգիրյանը հայտարարել է, թե գործը պետք է բացառապես Հակակոռուպցիոն կոմիտեն քննի՝ ըստ քննչական ենթակայության և, որ դատախազությունը չէր կարող նյութերի նախապատրաստումը հանձնարարել ՔԿ-ին։ Այս հայտարարության առնչությամբ Ալեքսանյանը նշեց. «Ինչ վերաբերում է պարոն Ջհանգիրյանի այն հայտարարությանը, որ Հակակոռուպցիոն կոմիտեն պետք է այս հարցով կոնկրետ զբաղվեր, ինչու՞, որովհետև Սասուն Խաչատրյա՞նն է հանդիսանում այդ կառույցի ղեկավարը։ Նա նման պնդում է անում՝ վստահ լինելով, որ Սասուն Խաչատրյանի պարագայում նյութեր նախապատրաստելու արդյունքում քրեական գործի հարուցումը կմերժվե՞ր»։

Հեղինակ՝ Իզաբել Սահակյան

Աղբյուր` Փաստինֆո