Փաստ ինֆո

ԱՄՆ-ում ՀՀ դեսպան են պատրաստվում նշանակել մի մարդու, որը մասնագիտացել է պետական հեղաշրջումների մեջ, սրանից կարող ենք ենթադրել, որ Հայաստանում ներքաղաքական ցնցումների նոր փուլ է սպասվում: «Փաստինֆո»-ի հետ զրույցում ասաց ռազմական փորձագետ Հայկ Նահապետյանը:

Ինչպես արդեն հայտնել ենք, ԱՄՆ նախագահ Ջո Բայդենը Հայաստանում ԱՄՆ նոր դեսպանի պաշտոնում առաջարկել է Ուկրաինայում ԱՄՆ դեսպանի նախկին պաշտոնակատար Քրիստինա Քվիենի թեկնածությունը:

Մեզ հետ զրույցում Հայկ Նահապետյանը նկատում է՝Քրիստինա Քվիենն Ուկրաինայում պաշտոնավարել է այն ժամանակ, երբ գունավոր հեղափոխության մեթոդաբանությամբ ու գործիքակազմով պետական հեղաշրջանում եղավ այնտեղ, ուստի փորձագետը չի բացառում, որ այս նշանակումից հետո Հայաստանը ևս ներքաղաքական ցնցումների փուլ մտնի.

«Այս նշանակումն ունի նաև մասնագիտական ունակությունների կիրառման անհրաժեշտություն, այդ մարդը հայտնի է Ուկրաինայում. իշխանափոխության գործընթացում ԱՄՆ դեսպանությունն ամենաակտիվ մասնակցությունն է ունեցել, եթե ավելի կոնկրետ, հեղաշրջման կառավարումն է արել։ Պատահական մարդկանց չեն նշանակում, եթե անհրաժեշտ լիներ դեսպան նշանակել մեկին, որը դիվանագիտական առաքելություն պետք է իրականացնի, ապա այդպիսի նշանակում կանեին, բայց նշանակել են մարդու, որը մասնագիտացել է պետական հեղաշրջումների մեջ, հետեւապես կարող ենք ենթադրել, որ Հայաստանում ներքաղաքական ցնցումների նոր փուլ է սպասում»,-ասաց նա:

Հայկ Նահապետյանի խոսքով՝ ԱՄՆ-ն կփորձի տարածաշրջանում քաղաքական որոշակի վերադասավորումների համատեքստում Նիկոլ Փաշինյանին փոխարինել մեկ ուրիշ անձով, բայց՝ ոչ ընդդիմադիր դաշտից.

«Չի բացառվում, որ քաղաքական թիմը մնա, ազդեցության ոլորտները մնան, բայց Փաշինյանի անձը կարող է փոխվել։ Վերջին հայտարարություններով ԱՄՆ-ն Փաշինյան Նիկոլի իշխանությանն ակնհայտ սատարում է և բարձրաձայնում է դրա մասին, բայց անգլոսաքսոնական կառավարման համակարգում՝ պետական մակարդակով, ինչ-որ բան է հայտարարվում, հետեւապես սպասեք տրամագծորեն հակառակ գործընթացի»,-ասաց նա:

Աղբյուր` Փաստինֆո