Փաստ ինֆո

Աշխատանքային այցով Ադրբեջանում գտնվող  ՌԴ արտգործնախարար Սերգեյ Լավրովը հանդիպել է Իլհամ Ալիեւի հետ, որի ընթացքում քննարկվել է նաեւ Հայաստանի, Ռուսաստանի ու Ադրբեջանի ղեկավարների եռակողմ հայտարարությունների կատարման ընթացքին վերաբերող հարցեր։

«Պատրաստ ենք  ամեն կերպ աջակցել երեք առաջնորդների ստորագրած երեք փաստաթղթերի՝ 2020 թվականի նոյեմբերի 9-ի, 2021 թվականի հունվարի 11-ի եւ նոյեմբերի 26-ի, իրագործմանը: Այս մասին ներածական խոսքում ասել է ՌԴ արտգործ նախարար Սերգեյ Լավրովը։

Նրա գնահատմամբ՝ հաղորդակցության ապաշրջափակման եռակողմ աշխատանքային խումբը որոշակի առաջընթաց է արձանագրում: «Հարցերը, որոնք պետք է համաձայնեցվեն, մենք քննարկում ենք հայկական կողմի հետ։ Մեզ մոտ ուրվագծվում է ընդհանուր ըմբռնում, թե ինչպես լուծել ավտոմոբիլային տեղաշարժի կազմակերպման խնդիրը մաքսիմալ հարմարավետ եղանակով, որպեսզի ոչ մի արհեստական խոչընդոտներ չստեղծվեն։ Ռուսաստանը կնպաստի այդ աշխատանքին մինչև արդյունքի հասնելը։ Հուսով եմ, որ դա շուտով տեղի կունենա»,- ասել է Լավրովն ու ավելացրել, որ,  պայմանավորվածությունների համաձայն, պատրաստ են խորհրդատվական ծառայություններ մատուցել նաեւ  Ադրբեջանում եւ Հայաստանում սահմանների սահմանագծման եւ սահմանազատման համար ստեղծված երկու  հանձնաժողովներին: «Կոնկրետ առաջարկներ կան այդ կապակցությամբ։ Ուրախ կլինեմ դրանք քննարկել Ձեզ հետ»,- ասել է Լավրովը։

Լավրովը նաեւ նշել է, որ Հայաստանի և Ադրբեջանի միջև հարաբերությունների կարգավորումը Ռուսաստանը դիտարկում է որպես Հարավային Կովկասում խաղաղության և կայունության ապահովման, Բաքվի և Երևանի միջև վստահության և լիարժեք համագործակցության վերականգնման առանցքային պայման։

Աղբյուր` Փաստինֆո