Փաստ ինֆո

Հայաստանում ԱՄՆ նոր դեսպանի թեկնածուն փորձառու դիվանագետ է, աշխատել է և՛Մոսկվայում, և՛ Բրյուսելում և ԱՄՆ Պետդեպարտամենտում:«Փաստինֆո»-ի հետ զրույցում ասաց միջազգայնագետ Սուրեն Սարգսյանը:

Ինչպես արդեն հայտնել ենք, ԱՄՆ նախագահ Ջո Բայդենը Հայաստանում ԱՄՆ նոր դեսպանի պաշտոնում առաջարկել է Ուկրաինայում ԱՄՆ դեսպանի նախկին պաշտոնակատար Քրիստինա Քվիենի թեկնածությունը:

Միջազգային հարցերով փորձագետ Սուրեն Սարգսյանը կարծում է, որ նոր դեսպանի նշանակմամբ ամերիկյան քաղաքականության մասով որևէ փոփոխություն չի լինի, քանի որ դեսպանը գալիս է սպասարկելու Վաշինգտոնի արտաքին քաղաքական առաջնահերթությունների կոնկրետ ուղղությունները.

« Տակտիկական որոշակի փոփոխություններ հնարավոր է լինեն՝ կապված մեր երկրում տիրող իրավիճակի հետ, բայց ամերիկյան քաղաքականության փոփոխություն չի լինի»,-ասաց նա:

Հատկանշական է, որ Հայաստանում ԱՄՆ դեսպան է նշանակվելու դիվանագետ, որի պաշտոնավարման ընթացքում Ուկրաինայում հեղափոխություն, պատերազմ և այլ շատ իրադարձություններ են տեղի ունեցել:

Սուրեն Սարգսյանը, սակայն, կարծում է, որ ճիշտ չէ հարցն այդ տեսանկյունից դիտարկելը, քանի որ սա ընդամենը մասնագիտական նշանակում է.

«Մենք էլ ունեցել ենք դեսպան, որը հետագայում դեսպան է նշանակվել Ուկրաինայում՝ Մարի Յովանովիչը, սրանով առաջնորդվելը սխալ է, նրանք Ամերիկայի արտաքին քաղաքական գերատեսչությունում աշխատած պրոֆեսիոնալներ են, որոնք տարբեր տարիներին տարբվեր երկրներում են աշխատել, ուտի որևէ արտառոց բան չկա, այդ մարդիկ աշխատում են ԱՄՆ պետդեպարտամենտի համապատասխան ստորաբաժանումներում՝ Եվրոպայի և Եվրասիական ստորաբաժանումներում, պարզ է , որ այդ մարդկանց նշանակումները պետք է լինեն այդ ուղղություններով, հիմա որ Ուկրաինայում դեսպան է եղել, Ուկրաինայում էլ նման ճգնաժամ կամ պատերազմ է եղել, մեր մասով դա ի՞նչ կարող է նշանակել, ի՞նչ հետևություն պետք է անել, որևէ հետևություն պետք չէ անել, սա մասնագիտական նշանակում է, նույն հաջողությամբ Լին Թրեյսին աշխատել էր արաբական կամ միջինասիական երկրներում, դրանից հետևություն անենք ինչո՞ւ է նա նշանակվել Հայաստանում՝ ոչ իհարկե»,-ասաց Սուրեն Սարգսյանը:

Աղբյուր` Փաստինֆո