Փաստ ինֆո

«Դիմադրության շարժումը ստեղծում է ոլորտային տարբեր հանձնախմբեր, որոնցից յուրաքանչյուրն ունենալու է կոնկրետ ուղղվածություն և զբաղվելու է այդ ոլորտում առկա խնդիրներով: Ինչպես «Փաստինֆո»-ին տեղեկացրին շարժման անդամները, հանձնախմբերը ստեղծվում են, մասնավորապես, ԱԺ հանձնաժողովների հենքի վրա, այսպիսով՝ գործելու են պաշտպանության ու անվտանգության, սոցիալ-տնտեսական, միջազգային կազմակերպությունների հետ աշխատող հանձնախմբեր, առանձին ձևավորվելու է նաև Արցախի հարցերով զբաղվող հանձնաժողով:

Հանձնաժողովները դեռևս ձևավորման փուլում են, ինչպես տեղեկացանք, այս փուլում ընտրվում են հանձնաժողովի անդամները, որից հետո կընտրվեն ղեկավարներ, յուրաքանչյուր խումբ ունենալու է 15-17 անդամ, ընդ որում՝ հանձնաժողովներում ընդգրկված չեն լինելու միայն «Հայաստան» դաշինքի անդամները, կլինեն նաև այլ քաղաքական ուժերի ներկայացուցիչներ և փորձագետներ:

Նախանշված է , որ մինչև հաջորդ ուրբաթ օրը խմբերը պետք է արդեն ձևավորված լինեն:

«Փաստինֆո»-ի հետ զրույցում «Հայաստան» խմբակցության պատգամավոր Գեղամ Նազարյանն ասաց, որ հանձնախմբերը աշխատանք են տանելու ինչպես Երևանում, այնպես էլ մարզերում և Արցախում.

«Մեր խնդիրն է, որ ժողովուրդը հասկանա՝ երկրին ինչ է սպառնում, ինչ խնդիրներ կան և ինչպես ենք մենք պատկերացնում այդ խնդրի լուծումները, ի վերջո, մարդկանց չի կարելի մեղադրել, որ ինքն այլ մտածողություն ունի, այդ մարդու հետ պետք է զրուցել և բացատրել խնդիրները, պետք է գնալ, օրինակ` Շիրակի մարզ կամ Լոռի՝ հասկանալ, մարդիկ ի՞նչ խնդիրներ ունեն, ինչպես են նրանք մտածում, ինչպես են պատկերացնում ապագան, ինչին է հավատում կամ ինչին չի հավատում, այդ խնդիրը մեզ մոտ բաց է, մենք ինչքան էլ խոսենք հանրության հետ, սուտն այնքան շատ է, որ մարդիկ թյուրընկալման մեջ են, ճիշտ չի մարդկանց մեղադրել, որ նրանք խաբվել են կամ թյուրընկալման մեջ են»,-ասաց նա:

Աղբյուր` Փաստինֆո