Փաստ ինֆո

Արցախյան երրորդ՝ 44-օրյա պատերազմում զոհված զինծառայողների ծնողները, հարազատները ՔԿ շենքի մոտ են: Զոհված զինծառայող Մխիթար Գալեյանի հորեղբայրը՝ Արթուր Գալեյանն այսօր հրավիրվել է ՔԿ:

Հիշեցնենք, որ մայիսի 18-ին ռազմական ոստիկանությունը ձերբակալել էր Մխիթար Գալեյանի հորը՝ Գարիկ Գալեյանին, եւ նրա եղբորը՝ Արթուր Գալեյանին: Դատարանը, սակայն, Գալեյան եղբայրներին ազատ արձակելու որոշում է կայացրել։ Ըստ Քննչական կոմիտեի՝ նրանք մեղադրվում են զորամաս ապօրինի մուտք գործելու, իշխանության ներկայացուցչի նկատմամբ բռնություն գործադրելու եւ ծանր վիրավորանք հասցնելու մեջ: Նշենք, որ գործն ըստ քննչական ենթակայության ԱԱԾ ուղարկելու փոխարեն, Գալեյանների վերաբերյալ քրեական գործը վերցվում է ԶՔԳՎ վարույթից եւ տեղափոխվում Քննչական կոմիտե։ Այդ որոշումը զոհվածների հարազատների դժգոհությունն է առաջացրել։

ՔԿ շենքի մոտ Գարիկ Գալեյանը լրագրողների հետ զրույցում ասաց, որ հիմնավորում չի ներկայացվել, թե ինչու են գործը ԶՔԳՎ-ից տեղափոխել ՔԿ:

«Եղբայրս նոր ներս մտավ: Չգիտեմ, դրանից հետո կտեղեկանանք, թե ինչն է խնդիրը, գուցե կանչել ասում են՝ կարճում ենք, գուցե բարոյական ինչ-որ բան շարժվել է»,- նշեց Գարիկ Գալեյանը՝ տեղեկացնելով, որ իրեն դեռևս չեն հարցաքննել:

Ինչ վերաբերում է ՔԿ-ի կողմից տարածված հերքմանը, համաձայն որի՝ հերքել են, որ միջադեպ է եղել ծնողների և Քյարամյանի միջև, Գալեյանը նշեց, եթե կարող է Արգիշտի Քյարամյանն առանց իրեն վատ զգալու հերքել 30 ծնողի, այն էլ՝ այն ծնողների, որոնց հաշվին դեռ ինքը և իր ընտանիքը գոյություն ունեն և հայ են կոչվում, ինչ կարող է ասել:

«Ինչպես կարող է 30 ծնող սուտ ասել, որ ինքն իրեն ոչ ՔԿ նախագահին հարիր է պահել, ոչ ադեկվատ է պահել ծնողների նկատմամբ, ահաբեկել ծնողներին»,-նշեց Գալեյանը:

Աղբյուր` Փաստինֆո