Փաստ ինֆո

Ուզբեկստանի եւ Ադրբեջանի իշխանությունները 19 փաստաթուղթ են ստորագրել, այդ թվում՝ երկու երկրների նախագահներ Շավքաթ Միրզիեեւի եւ Իլհամ Ալիեւի բանակցությունների արդյունքում ռազմական, ռազմատեխնիկական եւ արդյունաբերական համագործակցության մասին համաձայնագրեր, հաղորդում է Ուզբեկստանի նախագահի մամուլի ծառայությունը:

Ալիևը հունիսի 21-22-ը պետայցով գտնվում է Ուզբեկստանում։ Մամուլի ծառայության տվյալներով, Տաշքենդի «Կուկսարոյ» նստավայրում կայացած արդյունավետ բանակցությունների արդյունքում կայացել է փաստաթղթերի ստորագրման արարողությունը:

Միրզիեեւն ու Ալիեւը ստորագրել են հռչակագիր' Ուզբեկստանի եւ Ադրբեջանի միջեւ ռազմավարական գործընկերության խորացման եւ համակողմանի համագործակցության զարգացման մասին, հաղորդում է մամուլի ծառայությունը: Պետությունների ղեկավարների ներկայությամբ ստորագրվել է 18 փաստաթուղթ երկու երկրների կառավարությունների, նախարարությունների և գերատեսչությունների միջև: «Դրանք, մասնավորապես, տարածաշրջանների, արդյունաբերության, միջազգային ավտոմոբիլային հաղորդակցության, անօրինական միգրացիայի դեմ պայքարի, բույսերի կարանտինի եւ պաշտպանության, ռազմական եւ ռազմատեխնիկական համագործակցության մասին համաձայնագրեր են, ինչպես նաեւ զբոսաշրջության ոլորտում համագործակցության ծրագիր», - ասված է հաղորդագրության մեջ:

Այդ փաստաթղթերը կոչված են նպաստելու Ուզբեկստանի եւ Ադրբեջանի միջեւ փոխգործակցության մի շարք հեռանկարային ուղղությունների շուրջ գործնական համագործակցության խորացմանը, հավելել են Միրզիեեւի մամուլի ծառայությունում:

Աղբյուր` Փաստինֆո