Փաստ ինֆո

Ռուբեն Վարդազարյանի հրապարակած ձայնագրությունը հստակ ցույց է տալիս, որ Հայաստանում դատաիրավական համակարգ գոյություն չունի, ամեն բան գտնվում է վարչապետի գրպանում, իսկ ով չի ենթարկվում, նրանց նկատմամբ շինծու գործեր են «թխվում», ինչպես ձայնագրության մեջ անկեղծանում էր Ջհանգիրյան կոչվածը: «Փաստինֆո»-ի հետ զրույցում ասաց իրավապաշտպան Ավետիք Իշխանյանը:

Հիշեցնենք, որ Բարձրագույն դատական խորհրդի նախագահ (լիազորությունները կասեցված) Ռուբեն Վարդազարյանը այսօր հրավիրած մամուլի ասուլիսի ժամանակ հրապարակեց ԲԴԽ նախագահի պարտականությունները կատարող Գագիկ Ջհանգիրյանի հետ իր ունեցած զրույցի սկանդալային ձայնագրությունը: Ռուբեն Վարդազարյանը նաև հայտարարեց, որ հրաժարական տալու պահանջ իրեն ներկայացվել է Նիկոլ Փաշինյանի անունից առաջարկել է ԲԴԽ նախագահի պաշտոնից հրաժարական տալ։

Անդրադառնալով հրապարակված ձայնագրությանը՝ Ավետիք Իշխանյանը նկատում է՝ սա նշանակում է ոչնչացնել ողջ իրավական համակարգը.

«Սա վարչապետ կոչեցյալի տոտալիտար մտածելակերպի արդյունքն է և ամենատխուրն այն է, որ նրա կամակատարներն են ԱԱԾ պետը, ոստիկանապետը, Հակակոռուպցիոն կոմիտեի պետը, Գլխավոր դատախազը և, իհարկե, Ջհանգիրյանը, նրանք կատարում են բռնապետիկի հակաօրինական բոլոր հրահանգները» ,-ասաց Իշխանյանը:

Ինչ վերաբերում է ձայնագրության այն հատվածին, որ Գագիկ Ջհանգիրյանը հայտարարում է, թե չի ցանկանում Ռոբերտ Քոչարյանը հետ գա իշխանության, Ավետիք Իշխանյանը նկատում է՝ Գագիկ Ջհանգիրյանը ատում է երկրորդ նախագահին.

«Իսկ եթե ատում էր, ապա մինչև 2008թ-ը չպետք է աշխատեր Գլխավոր դատախազի տեղակալ, ամեն դեպքում, նա 2008թ-ին, հավանաբար, գայթակղվեց, որ իշխանափոխություն կլինի և ինքը կնշանակվի Գլխավոր դատախազ, սակայն այդպես չեղավ, ու այս ամենից հետո ինքն ատում է երկրորդ նախագահին, բացի սա՝ խոսքն ամենևին միայն Ռոբերտ Քոչարյանի մասին չէ։ Նիկոլ Փաշինյանը չի պատկերացնում, որ կարող է իշխանությունը զիջել որևէ մեկին, պատահական չէ, որ նա երբ եկավ իշխանության, խոսք բացեց մինչև 2050թ կառավարելու մասին, այսինքն ՝ այստեղ Քոչարյանի անունը որպես հիմնական թիրախ օգտագործելը միամտություն է, Ջհանգիրյանը ձևի համար որպես թիրախ ընտրել է Քոչարյանին, բայց, ընդհանրապես, ցանկացած գործչի՝ կլինի Վանեցյանը, Սերժ Սարգսյանը, Լևոն Տեր-Պետրոսյանը, իր արբանյակ կուսակցություններից որևէ մեկը կամ նույնիսկ իր կուսակցությունից որևէ մեկը, նա չի հանդուրժի , եթե վաղը նա կասկածի, որ Ալեն Սիմոնյանի մտքում կա իշխանություն վերցնել, հավատացած եղեք, նրա նկատմամբ քրգործ կհարուցվի»,-ասաց իրավապաշտպանը:

Մեր խնդրանքով Ավետիք Իշխանյանն անդրադարձավ նաև երեկ Ապարանում տեղի ունեցած աղմկահարույց սպանություններին՝ ՔՊ-ական պատգամավորների հարազատների մասնակցությամբ:

Ըստ նրա՝ Ապարանում տեղի ունեցածը անպատժելիության և ցինիզմի արդյունք է.

«Մենք ունեցել ենք դեպքեր, երբ, օրինակ, մարզպետի մասնակցությամբ կամ նրա լուռ համաձայնությամբ Վայքում դաժան ծեծի ենթարկվեց պայմանագրային զինծառայող Արա Մխիթարյանը, հիշենք նաև, թե այսօրվա ԱԺ փոխխոսնակն ինչպես ծեծեց լրագրողին, էլ չեմ ասում՝ ոստիկանական բիրտ գործողությունները՝ մարդկանց նվաստացնելու, ծեծելու և սրանց համար որևէ մեկը չպատժվեց, իսկ ամենացցուն դեպքը, երբ հղի կնոջը՝ Սոնա Մնացականյանին վարչապետի ավտոշարասյունը վթարի ենթարկեց և ոչ մեկը չպատժվեց։ Սա է մեր իրականությունը, և այս համատեքստում պետք է դիտարկել Ապարանում տեղի ունեցած դեպքերը»,-ասաց նա:

Իրավապաշտպանի խոսքով՝ պատգամավորների հարազատաները նման քայլի են գնացել՝ վստահ լինելով, որ իրենց թույլատրվում է ամեն ինչ՝ ընդհուպ մինչև մարդ սպանել.

«Ես վստահ եմ, որ սա տղամարդկային, «դուխով» հաշվեհարդար չէ, համոզված եմ, որ իրականում նրանք վախկոտ, ողորմելի երևույթներն են, ուղղակի իմանալով, որ իշխանությունն իրենց ձեռքին է և որևէ մեկը չի պատժվելու, իրենց մանկական բարդույթներից ազատվում են նման հաշվեհարդարներով»,-ասաց նա:

Հիշեցնենք, որ երեկ մամուլում լուրեր շրջանառվեցին, որ ՔՊ պատգամավոր Մաթևոս Ասատրյանի հարազատները և ՔՊ Արագածոտնի փոխմարզպետ Էդգար Փարվանյանի հորեղբոր որդին վիճաբանել են ապարանցի մի խումբ երիտասարդների հետ, ինչի հետեւանքով վերոնշյալ մարդիկ (Մաթոսի և Էդգարի բարեկամներն ու ընկերները) կալաշնիկովով կրակել են երիտասարդների վրա, կան զոհեր: Դեպքը տեղի է ունեցել Ապարանի Նիգավան միջնահատվածում։

Աղբյուր` Փաստինֆո