Փաստ ինֆո

Ոստիկանությունը հրաժարվում է հրապարակել, թե հունիսի 3-ին ժողովրդի ուղղությամբ կիրառված լուսաձայնային նռնակները երբ են ձեռք բերվել, այլ խոսքով՝ ժամկետանց են, թե ոչ՝ դա համարելով գաղտնի տեղեկատվություն։

Հիշեցնենք, որ հունիսի 3-ին ԱԺ ընդդիմադիր խմբակցությունների կողմից հրավիրվել էր արտահերթ նիստ՝ հայ-ադրբեջանական եւ հայ-թուրքական հարաբերությունների վերաբերյալ հայտարարություն ընդունելու օրակարգով, ինչը տապալվեց իշխող ուժի չներկայանալու պատճառով։ Քաղաքացիները քայլերթով շարժվել էին նախ դեպի Կառավարություն, ապա՝ կառավարական ամառանոցներ՝ պահանջելու, որ ՔՊ-ն մասնակցի արտահերթ նիստին։ Կառավարական ամառանոցների մոտ խաղաղ ակցիայի մասնակիցներին «դիմավորել» են ոստիկանական մեծաթիվ ուժեր՝ մի քանի ուղղությամբ փակելով քաղաքացիները ճանապարհը։ Արդյունքում, փաստացի, ակցիայի մասնակիցները հայտնվել էին շրջափակման մեջ, որի ժամանակ Դեմիրճյան-Պռոշյան փողոցների խաչմերուկում ոստիկանության ծառայողների կողմից անհամաչափ ուժի կիրառմանը զուգահեռ օգտագործվել են նաև հատուկ միջոցներ՝ լուսաձայնային նռնակներ, ընդ որում՝ առանց նախապես զգուշացնելու, որի հետեւանքով բազմաթիվ քաղաքացիներ ստացել են վնասվածքներ։ Նույն օրը «Հայրենիք» կուսակցության խորհրդի անդամ Արսեն Բաբայանը հայտարարեց, որ կիրառված լուսաձայնային նռնակները եղել են ժամկետանց։

«Ոստիկանության զորքերի սպառազինությունում կիրառված հատուկ միջոցների պիտանելիության ժամկետը լրացած է, իսկ 2017թ-ից հետո կոնկրետ «Սվիրել» տեսակի լուսաձայնային արկ ձեռք չի բերվել։ Դրանց պիտանելիության ժամկետը ընդամենը 4 տարի է»,- նշել էր նա։

«Փաստինֆո»-ն գրավոր հարցում էր ուղարկել ՀՀ ոստիկանություն՝ պարզելու, թե վերջին անգամ երբ են ձեռք բերվել հատուկ միջոց հանդիսացող լուսաձայնային նռնակները, որ երկրի արտադրության ու որքան։ Ինչքան գումար է ծախսվել, ինչին ի պատասխան ոստիկանությունը հայտարարել է, թե հայցվող տեղեկատվությունը գաղտնիք է։

«Ոստիկանության կողմից հատուկ միջոցների քանակի, արտադրող երկրի, ձեռք բերման և դրա նպատակով հատկացված գումարների վերաբերյալ տեղեկատվությունն ընդգրկված է ՀՀ ոստիկանության պետի 27.10.2020թ. թիվ 11-Ն հրամանով գաղտնագրված տեղեկությունների ցանկում և հրապարակման ենթակա չէ, ուստի նշված մասով տեղեկատվության տրամադրումը, համաձայն «Տեղեկատվության ազատության մասին» ՀՀ օրենքի 8-րդ հոդվածի 1-ին մասի 1-ին կետի՝ մերժվում է»,- նշված է ոստիկանության պաշտոնական գրության մեջ:

Մեր այն հարցին, թե ում հրահանգով են կիրառվեն հատուկ միջոցները՝ ոստիկանությունից հատնել են, որ կատարվում է ծառայողական քննություն։

«Լուսաձայնային կրակոցը կիրառվել է ՀՀ ոստիկանության զորքերի հատուկ միջոցների կիրառման վաշտի զինծառայողների կողմից, որի կապակցությամբ ՀՀ ոստիկանության ներքին անվտանգության վարչությունում կատարվում է ծառայողական քննություն, ուստի նշված հատուկ միջոցի կիրառման հանգամանքների հետ կապված հայցվող տեղեկատվությունը կարող է տրամադրվել ծառայողական քննության արդյունքներով»,- հայտնել է ոստիկանության շտաբը, որի տրամադրած տեղեկատվությունը «Փաստինֆո»-ին փոխանցել է հասարակայնության հետ կապերի ու լրատվության վարչությունը։

Գրավոր հարցմամբ ոստիկանությունից փորձել ենք նաև պարզել, թե ինչով էր պայմանավորված հունիսի 3-ին երթի մասնակիցների ճանապարհը՝ Դեմիրճյան փողոցում փակելու ոստիկանության ծառայողների գործողությունները, ով է տվել նման հրահանգ, քանի որ Դիմադրություն շարժումը բազմիցս երթեր իրականացրել է Պռոշյան, Պարոնյան փողոցներում և երբևէ ոստիկանության ծառայողները չէին փակել ճանապարհները, ինչին ի պատասխան ոստիկանությունից հայտնել են, թե հավաքի կազմակերպչի կողմից չի պահպանվել «Հավաքների ազատության մասին» ՀՀ օրենքի 28-րդ հոդվածի պահանջը և ՀՀ կառավարությունից դեպի կառավարական ամառանոցներ երթ իրականացնելուց առաջ Դեմիրճյան փողոցով երթը շարունակելու վերաբերյալ նախապես տեղեկացում չի տրվել:

«Հաշվի առնելով, որ ակցիայի մասնակիցների երթուղին նախատեսված է եղել Պարոնյան-Պռոշյան փողոցներով, ինչպես նաև հիմք ընդունելով «Հավաքների ազատության մասին» ՀՀ օրենքի 19-րդ հոդվածի 1-ին մասի 3-րդ կետի պահանջը, հասարակական կարգի պատշաճ պահպանման և ապահովման նպատակով Պռոշյան-Դեմիրճյան խաչմերուկի Դեմիրճյան հատվածում տեղակայվել են ոստիկանական ուժեր, որոնք նպատակ չեն ունեցել խոչընդոտել նախատեսված երթին և երթուղուն»,- նշել են ոստիկանությունից եւ, արձագանքելով ոստիկանության ծառայողների կողմից անհամաչափ ուժի կիրառման դեպքերին, տեղեկացրել են, որ ոստիկանների գործողությունների իրավաչափությունը պարզելու կապակցությամբ նշանակվել է 8 ծառայողական քննություն։ Ոտիկանության ծառայողների կողմից առերևույթ հանցավոր դրսևորումներ թույլ տալու դեպքերի առթիվ քրեական գործեր հարուցված լինելու վերաբերյալ տեղեկատվություն առկա չէ, ոստիկանության որևէ ծառայողի լիազորություն չի կասեցվել:

Նույն աղբյուրի փոխանցմամբ՝ Դեմիրճյան-Պռոշյան փողոցների խաչմերուկում տեղի ունեցած իրադարձություններից հետո տարբեր վնասվածքներով տարբեր բուժհիմնարկներ դիմել է ՀՀ ոստիկանության 41 ծառայող, որից 7-ը բեկորային վնասվածքներով։ Ասել է թե՝ տուժել են հենց ոստիկանության զորքերի կողմից կիրառված հատուկ միջոցների հետեւանքով։
Հեղինակ՝ Իզաբել Սահակյան

Աղբյուր` Փաստինֆո