Փաստ ինֆո

ԲԴԽ նախագահ Ռուբեն Վարդազարյանը (լիազորությունները կասեցված են) չի ներկայացել իրեն կարգապահական պատասխանատվության ենթարկելու վերաբերյալ միջնորդության քննությանը՝ վատառողջ լինելու պատճառով։ Այս մասին «Փաստինֆո»-ի հետ զրույցում ասաց Վարդազարյանի ներկայացուցիչ, փաստաբան Արամ Օրբելյանը։

Ինչպես արդեն տեղեկացրել ենք՝ ԲԴԽ նախագահ (լիազորությունները կասեցված) Ռուբեն Վարդազարյանի դեմ կարգապահական վարույթ է հարուցվել՝ ԲԴԽ երեք անդամի նախաձեռնությամբ։ Վարույթ հարուցելու համար դիմել են Գրիգոր Բեքմեզյանը, Լիպարիտ Մելիքջանյանը, Դավիթ Խաչատուրյանը։ Որպես հիմք օգտագործվել է լրատվականներից մեկում հրապարակված հարցազրույցը, որում Վարդազարյանն անդրադարձել է ՍԴ որոշմանը՝ կապված Գագիկ Ջհանգիրյանի՝ ԲԴԽ անդամ ընտրվելու դիմումին։

Թեև Ռուբեն Վարդազարյանի ներկայացուցիչ Արամ Օրբելյանը նշել էր, որ չի կարող մասնակցել նիստին, քանի որ գտնվում է Սյունիքի մարզում՝ մասնակցելու նախապես նշանակված դատական նիստին, ուստի՝ խնդրում է հետաձգել այն՝ ԲԴԽ-ն հետաձգման միջնորդությունը մերժելուց հետո անցել է Վարդազարյանին կարգապահական պատասխանատվության ենթարկելու միջնորդության քննությանը՝ առանց վերջիններիս մասնակցության։

Փաստաբան Արամ Օրբելյանը «Փաստինֆո»-ի հետ զրույցում ասաց, որ 30 րոպե առաջ է դուրս եկել Սյունիքի մարզի ընդհանուր իրավասության դատարանից, ուներ մի քանի դատական նիստեր, ինչի մասին ծանուցել էր ԲԴԽ-ին՝ խնդրելով հետաձգել նիստը, դեռևս չի հասցրել ծանոթանալ ԲԴԽ նիստի տեսաձայնագրությանը, սակայն որքանով հասցրել է տեղեկանալ՝ մերժել են վարույթը կարճելու և նիստը հետաձգելու միջնորդությունները, սակայն անդրադարձ չի կատարվել ևս մեկ միջնորդության, որով խնդրել են պատասխան ներկայացնելու ժամկետը երկարացնել, ինչն ուղղակիորեն նախատեսված կառուցակարգ է։ Մասնավորապես, ԲԴԽ աշխատակարգը նախատեսում է կառուցակարգ, համաձայն որի՝ կարգապահական պատասխանատվության ենթարկելու միջնորդությունը ստանալուց հետո երկու շաբաթ ժամանակ կա՝ պատասխան տրամադրելու համար, իսկ մինչև ժամանակի ավարտը կարելի է ներկայացնել միջնորդություն՝ խնդրելով երկարացնել ժամկետը։ Այսինքն՝ Օրբելյանը նիստը հետաձգելուց բացի միջնորդել է նաև ժամանակ տրամադրել, սակայն այս միջնորդությունը չի քննարկվել, որոշում չի կայացվել՝ մերժելու կամ բավարարելու մասին, Օրբելյանի գնահատմամբ՝ դրանով չի էլ կարելի ենթադրել, որ չի քննարկվել, չեն ասել՝ երկարացվել է, ուրեմն՝ չի երկարացվել, որովհետև անհրաժեշտ ՝ որոշում՝ առնվազն մինիմալ պատճառաբանություններով։

Նրա փոխանցմամբ՝ արդեն երկու-երեք օր է, ինչ Ռուբեն Վարդազարյանը վատառողջ է, իսկ թե ինչու հապճեպ քննվեց միջնորդությունն առանց իրենց մասնակցության՝ Օրբելյանը գուշակություններով չցանկացավ զբաղվել, սակայն արձանագրեց՝ արդար դատաքննության իրավունքի խախտում կա, որովհետև լսված լինելու իրավունքի խնդիր կա, պետք է պարզաբանվեն մոտիվները, նպատակները։

«Որքանով հասկացա՝ փորձ չի արվել պարզելու պարոն Վարդազարյանի բացակայության պատճառը, չգիտեմ՝ հեռախոսով կապ հաստատվել է, թե ոչ»,- նշեց Օրբելյանը՝ արձանագրելով, որ ստացվել է, որ անձը՝ իր մասնագիտական կյանքի անկախությանը վերաբերող գործընթացին չի մասնակցել։

Մեր զրուցակիցը նկատեց, որ նիստի ընթացքում քննարկվել է նույնիսկ հրապարակումը, թե իբրև իրենք անակնկալներ են խոստանում, թե ինչ անակնկալներ՝ Օրբելյանը չգիտի, թե ինչու է լրագրողը նման բան գրել, սակայն փորձ չի արվել պարզելու, թե ինչ դատական նիստի պետք է մասնակցեր ինքը Սյունիքում, ինչի համար չէր ներկայացել, նա նշեց, որ մասնակցում էր Հայաստանում կարևորագույն կորպորատիվ վեճերից մեկին։ Պրակտիկայում չի եղել դեպք, որ օբյեկտիվորեն մի քանի օր հետաձգելու խնդրանք լինի, դատարանը մի քանի օրով չհետաձգի։

«Այս պայմաններում ինչ-որ նիստ չհետաձգելը մի քանի օրով՝ անձին պաշտպանության իրավունքից՝ արդար դատաքննության իրավունքից զրկում է, հետևաբար, ցանկացած որոշում՝ կասկածի տակ է դրվում»,- նշեց Օրբելյանը։

Բացի այդ՝ փաստաբանը ուշադրություն հրավիրեց այն հանգամանքին, որ ինքնին պահանջել, որ անձը պարտադիր պետք է ներկա գտնվի, խնդրահարույց է, ոտնահարում է փաստաբանության ամբողջ ինստիտուտը և, եթե չկան հարցադրումներ, որ պետք է տրվեն կոնկրետ անձին, օրինակ՝ հարցազրույցի ժամանակ ինչու է նման պնդում արել, կոնտեքստից կտրված է, թե ոչ, ապա՝ այդ պարագայում անձը պետք է ներկա գտնվի։

Հարցին ի պատասխան, թե արդյո՞ք այս պայմաններում կայացված որոշումը հնարավոր կլինի վիճարկել հետագայում՝ նկատի ունենալով, որ խախտվում է անձի արդար դատաքննության իրավունքը՝ փաստաբանը հիշեցրեց դատավոր Արայիկ Մելքումյանի գործը, որով ՍԴ-ն արձանագրել էր, որ այն փաստը, որ ԲԴԽ որոշումների դատական կարգով բողոքարկման հնարավորություն չնախատեսելը բխում է առկա սահմանադրական իրավակարգավորումներից և չի խախտում անձի դատական պաշտպանության և արդար դատաքննության իրավունքները։ Սակայն, եթե անձի արդար դատաքննության իրավունքի խախտմամբ որոշում է կայացվում, ապա կոնվենցիայի իմաստով դատարան համարվելը կասկածի տակ է առնվում։ Միևնույն ժամանակ, եթե առկա կլինի սահմանադրականության հետ կապված հարցեր, ապա դրանք ենթակա են բողոքարկման։ Օրբելյանը հույս հայտնեց, որ գործը կվերսկսվի, քանի որ կիրառելի է Վարչական դատավարության օրենսդրությունը, Ռուբեն Վարդազարյանի՝ բացակայության վերաբերյալ պատճառները հաշվի չեն առնվել խորհրդակցական սենյակ հեռանալիս։

«Անկախ ամեն ինչից՝ դատավորի լիազորությունների, ԲԴԽ անդամ-դատավորի լիազորությունների հետ կապված գործով իդեալական վարույթ չանելն ինքնին արդեն խնդրահարույց է՝ դատավորի անկախության տեսանկյունից»,- նշեց Օրբելյանը։

Հեղինակ՝ Իզաբել Սահակյան

Աղբյուր` Փաստինֆո